અર્થતંત્ર / માર્કેટને સૌથી વધુ જીવંત રાખતું FMCG સેક્ટર પણ હવે મંદીના ભરડામાં, લોકોની ખરીદ શક્તિ તળિયે

• માંગમાં ઘટાડાની સૌથી વધારે અસર ગ્રામીણ વિસ્તારોમાં જોવા મળી : રિપોર્ટ
• વર્ષ 2019 FMCG ઉદ્યોગ માટે લગભગ 4 ટકાના ઘટાડા સાથે મુશ્કેલીભર્યુ વર્ષ રહ્યું
• આ પહેલા IMFએ ભારતના આર્થિક વૃદ્ધિ દરનું પૂર્વાનુમાન ઘટાડીને 4.8 ટકા કર્યું છે

વર્ષ 2018માં આ સેક્ટરમાં 13.5 ટકાનો ગ્રોથ નોંધવામાં આવ્યો હતો. એવામાં ગત એક વર્ષમાં એફએમસીજી (FMCG) સેક્ટરમાં 3.8 ટકાનો ઘટાડો નોંધવામાં આવ્યો છે. ડેટા એનાલિટિક્સ ફર્મ નીલસને મંગળવારે (21 જાન્યુઆરી, 2020) એ પોતાની રિપોર્ટમાં જણાવ્યું કે માંગમાં ઘટાડાની સૌથી વધારે અસર ગ્રામીણ વિસ્તારોમાં જોવા મળી છે. 

રિપોર્ટમાં બતાવામાં આવ્યું કે, 2019ના પહેલા ત્રિમાસિક ગાળામાં માંગમાં 13.6 ટકાનો ગ્રોથ નોંધવામાં આવ્યો, જે બીજા ત્રિમાસિક ગાળામાં ઘટીને 10.3 ટકા અને ત્રીજા ત્રિમાસિક ગાળામાં ઘટીને 7.9 ટકા પર પહોંચી ગયો. 

જોકે, વર્ષ 2018ના અંતિમ ત્રણ મહીનામાં આ સેક્ટરમાં બેગણાથી વધારે એટલે કે 15.7 ટકાનો ગ્રોથ નોંધવામાં આવ્યો હતો. વર્ષ 2018ના ત્રીજા ત્રિમાસિક ગાળા (જુલાઇ-સપ્ટેમ્બર) માં આ સેક્ટરમાં સૌથી વધારે ગ્રોથ નોંધવામાં આવ્યો જે 16.2 ટકા હતો. 

નીલસન ગ્લોબલ કનેક્ટના દક્ષિણ એશિયા જોનના અધ્યક્ષ પ્રસૂન બસુએ કહ્યું,'વર્ષ 2019 એફએમસીજી (FMCG) ઉદ્યોગ માટે લગભગ 4 ટકાના ઘટાડા સાથે મુશ્કેલીભર્યુ વર્ષ રહ્યું. આ વર્ષે પણ સ્થિતિમાં ખુબ જ વધારે બદલાવ નજરે પડતો નથી.' નોંધનીય છે કે, આંતરરાષ્ટ્રીય નાણા ભંડોળ (IMF) એ ભારતના આર્થિક વૃદ્ધિ દરનું પૂર્વાનુમાન ઘટાડીને 4.8 ટકા કરી દીધું છે.