રિપોર્ટ / ભારતમાં આ એક કારણથી વર્ષમાં થાય છે 12 લાખ લોકોના મોત

ભારતમાં દિવસેને દિવસે હવાનું પ્રદૂષણ સતત વધતું જઈ રહ્યું છે. અનેક શહેરોનું વાતાવરણ તો એટલું પ્રદૂષિત થઈ ગયું છે કે, અનેક પ્રકારના કાયદા લાગુ કરવાની પણ નૌબત આવી ગઈ છે. તેવામાં એક ચોંકાવનારો રિપોર્ટ સામે આવ્યો છે. જે પ્રમાણે, એક જ વર્ષમાં હવા પ્રદૂષણના કારણે ભારતમાં 12 લાખ લોકોનાં મોત થયાં છે. ત્યારે શું છે હકીકત જુઓ આ અહેવાલમાં. 

દેશનું વાતાવરણ દિન પ્રતિદિન ખુબ પ્રદૂષિત થતું જઈ રહ્યું છે. અને તેનું ગંભીર પરિણામ પણ ભારત ભોગવી રહ્યું છે. માત્ર એક વર્ષમાં જ ભારતમાં હવાના પ્રદૂષણે દેશના 12 લાખ લોકોનો ભોગ લઈ લીધો છે. અમેરિકાના હેલ્થ ઈફેક્ટ્સ ઈન્સ્ટીટ્યૂટે તેમના રિપોર્ટ સ્ટેટ ઓફ ગ્લોબલ એર 2019માં દાવો કર્યો છે. જેમાં 2017 દરમિયાન હાર્ટએટેક, લંગ કેન્સર, ડાયાબિટીસ જેવા રોગોના કારણે વિશ્વમાં 50 લાખ લોકોના મોત થયા છે. જેમાંથી 30 લાખ લોકોના મોત પીએમ 2.5ના કારણે થયા હતા.

અમેરિકાના આ રિપોર્ટ પ્રમાણે વધતા પ્રદૂષણના કારણે, આવનારી પેઢી પર તેની ખુબ અસર પડી રહી છે.. એશિયામાં જન્મનારા બાળકોનું આયુષ્ય અઢી વર્ષ ઓછું થયું છે. વૈશ્વિક સ્તરે આ કારણે બાળકોનું આયુષ્ય 20 મહિના ઘટવાના અણસાર છે. જોકે ભારતમાં પ્રદુષણ સામે લડવા માટે મહત્વની યોજનાઓ બનાવાઈ છે. 

પ્રધાનમંત્રી ઉજ્જવલા યોજના, નેશનલ ક્લીમ એર પ્રોગ્રામ અને બીએસ-4 બનાવી જેવી યોજનાઓ બનાવાઈ છે. અને જો આ યોજના યોગ્ય રીતે લાગુ થશે તો સારા પરિણામો મળી શકશે. પરંતુ એક વર્ષમાં 12 લાખ લોકોના મોત ગંભીર આંકડો છે. ત્યારે આશા રાખીએ કે, ભારત સરકાર આ આંકડાને ગંભીરતાથી લઈ પ્રદૂષણને ઘટાડવાની દીશામાં કોઈ સારા પગલાં ઉઠાવશે.