જન્માષ્ટમીના તહેવારો નજીક આવી રહ્યા છે ત્યારે આ તહેવારોમાં ફરસાણ અને મીઠાઈ બનાવવા માટે તેલનો ઉપયોગ બમણો થઈ જાય છે ત્યારે ગૃહિણીઓની મજબૂરીનો લાભ લેવાની તક ઝડપી લઈને બ્રાન્ડેડ ઓઇલ મિલરોએ સિંગતેલના ભાવ વધારી દેતાં ગૃહિણીઓનાં બજેટ તહેવારો ટાણે જ ખોરવાયા છે.
બ્રાન્ડેડ ઓઇલ મિલરો દ્વારા ઊંચા ભાવ બોલાતાં સિંગતેલના ભાવમાં ભડકો થયો છે. માત્ર ત્રણ તફાવતે માંડ સ્થિર થયેલા તેલના ભાવ ફરી વધી ગયા છે. ભાવ વધવાના કારણે તેલનો ડબો ૧૮૦૦ની સપાટી કુદાવી ૧૯૦૦ આસપાસ પહોંચ્યો છે. હાલમાં પરિસ્થિતિ એવી છે કે તહેવારો નજીક હોવા છતાં જોઈએ તેવી તેલની ખરીદી નીકળી નથી.
ગઈ કાલે ડબે ફરી રૂ. ર૦ વધ્યા બાદ હાલમાં નવા ટીનનો ડબો ૧૮૬૦થી છે જ્યારે ૧પ કિલો લેબલ ટીનનો ભાવ રૂ.૧૮૪૦ આસપાસ છે. વેપારીઓ જણાવી રહ્યા છે કે હજુ પણ ભાવ વધશે. બે દિવસમાં એક ડબે રૂપિયા ૪૦નો વધારો જોવા મળ્યો છે.
આ માટે વાવેતરના દાણાની માગમાં વધારો થયો હોવાનું સૂત્રો જણાવી રહ્યા છે. માગમાં વધારો થવાની સાથે દાણાના ભાવમાં પણ વધારો થયો છે તો બીજી તરફ કપાસિયા તેલમાં પણ ૧૦ રૂપિયાનો ભાવ વધારો નોંધાયો છે. કપાસિયા તેલના ડબાનો ભાવ ૧ર૭૦ રૂપિયે પહોંચ્યો છે