ચીનના વુહાન શહેરથી કોરોના વાઈરસનો ચેપ ફેલાવા લાગ્યો છે અને હવે તે પાડોશી દેશ સિંગાપોર અને વિયેતનામ સુધી પહોંચી ગયો છે. ચીનમાં આ જીવલેણ વાઈરસથી મૃત્યુ પામેલા દર્દીઓની સંખ્યા વધીને ૨૫ થઈ જતાં તંત્ર દોડતું થઈ ગયું છે. સરકારે પુષ્ટિ કરી છે કે ૮૫૦થી વધુ લોકો કોરોના વાઈરસથી પીડિત છે.
રાષ્ટ્રીય સ્વાસ્થ્ય આયોગે અહેવાલ આપ્યો છે કે, વાઈરસના કારણે જે ૨૫ લોકોનાં મોત થયાં છે, તેમાંથી ૨૪ લોકોનાં મોત મધ્ય ચીનના હુબેઈ પ્રાંતમાં અને એકનું મોત ઉત્તર ચીનના હેબેઈમાં થયું છે. આ વાઈરસથી મૃત્યુ પામનારાઓની સરેરાશ ઉંમર ૭૩ વર્ષ છે. મૃતકોમાં સૌથી મોટી ઉંમરની વ્યક્તિ ૮૯ વર્ષનો હતી, જ્યારે સૌથી નાની ૪૮ વર્ષની હતી.
અમેરિકાના પાંચ એરપોર્ટ પર થર્મલ સ્ક્રીનિંગ કરવામાં આવી રહ્યું છે. લંડનથી મોસ્કો સુધીના એરપોર્ટ પર પણ સઘન તપાસ કરવામાં આવી રહી છે. વર્લ્ડ હેલ્થ ઓર્ગેનાઈઝેશને ખુલાસો કર્યો છે કે, પ્રભાવિત લોકોના સંપર્કમાં આવતા આ વાઈરસ ફેલાઈ શકે છે. એવું માનવામાં આવે છે કે, આ વાઈરસ જાનવરથી ફેલાયો છે.