ગુજરાતી ઘરમાં સામાન્ય રીતે નાસ્તામાં રવા ઉપમા બનતો હોય છે. પરંતુ શું તમે કોર્ન ઉપમા ચાખ્યો છે? જો ના તો આજે જ ચાખવાનો મોકો તમને મળશે. કારણ કે હવે તમે તમારા રસોડે માણી શકો છો ટેસ્ટી કોર્ન ઉપમા. તમે એકનો એક ઉપમા ખાઈને કંટાળ્યા છો તો તમે આ ટ્વિસ્ટ ટ્રાય કરી શકો છો. આ નવી ફ્લેવરનો ઉપમા તમને અલગ ટેસ્ટ આપશે અને તમને મજા પણ આવશે. હાલમાં શિયાળાની સીઝન ચાલી રહી છે ત્યારે તમે આ ટેસ્ટી ઉપમાને કોઈ પણ સમયે ટ્રાય કરી શકો છો. તે હેલ્ધી હોવાની સાથે તમારી ભૂખને પણ સંતોષે છે. તો જાણી લો સરળ રેસિપી.
કોર્ન ઉપમા
સામગ્રી
અડધો કપ બાફેલા મકાઈના દાણા
અડધો કપ વટાણા
1 કપ મકાઈના દલિયા
2 ચમચી ઝીણી સમારેલી ડુંગળી
2 ચમચી આદુંની પેસ્ટ
1 ચમચી લીલા મરચાં
4 ચમચી લીંબુનો રસ
1 ચમચી રાઈ
2 ચમચી તેલ
2 કપ પાણી
મીઠું સ્વાદાનુસાર
ગરમ મસાલો
રીત
સૌપ્રથમ કૂકરમાં તેલ ગરમ કરો. ગરમ તેલમાં રાઈ ઉમેરો. રાઈ ફૂટે એટલે તેમાં આદું, ડુંગળી અને લીલા મરચાં નાખીને બે મિનિટ માટે સાંતળો. ત્યાર બાદ તેમાં બાકીની બધી જ સામગ્રી નાખીને બરાબર મિક્સ કરી લો. હવે કૂકરને બંધ કરીને એક સીટી લો. કૂકર ઠંડુ થાય એટલે મકાઈ ઉપમાને સર્વિંગ પ્લેટમાં કાઢીને કોથમીરથી ગાર્નિશ કરીને ગરમા-ગરમ સર્વ કરો.