ઉનાળામાં જ્યારે તાપમાનનો પારો 40 ડિગ્રીને પાર કરે ત્યારે પંખા કે કૂલર પણ રાહત નથી આપતા. એવામાં AC વરદાનરૂપ લાગે છે. આજકાલ તો મોટાભાગની ઑફિસ સેન્ટ્રલી AC હોય છે, એટલે કે આખો દિવસ ઓફિસમાં તો ગરમી ના લાગે પરંતુ બહાર નીકળીએ તો ખબર પડે. દિવસ આખો ઑફિસમાં AC અને રાત્રે ઘરે આવાની ACમાં ઉંઘવાનું હોય ત્યારે ગરમીથી તો રાહત મળે છે, પરંતુ સ્વાસ્થ્યને નુકસાન પહોંચે છે.
AC રૂમમાં હોઇએ ત્યારે બારી-બારણાં બંધ જ હોય કારણકે તો જ તો રૂમ ઠંડો થાય. આવામાં તાજી હવા મળતી નથી જે સ્વાસ્થ્ય માટે નુકસાનકારક છે. તાજી હવાના અભાવે આખો વખત થાક લાગ્યા કરે. AC ડફ્ટ સાફ ના કર્યુ તો શ્વાસ સંબંધિત બિમારીઓ અને ફેફસામાં ઇન્ફેક્શન થઇ શકે છે.
ઘણી વાર ઊંઘતા હોઈએ ત્યારે ACના લીધે રૂમ એકદમ ઠંડો થઈ જાય છે સ્લીપ મોડ ઓન કરવાનું ભૂલી જવાય તો ઘણી વખત સહન ન થાય એટલી હદે ઠંડી વધી જાય છે. વધારે ઠંડકના કારણે માથામાં અને પીઠમાં દુખાવો થાય છે. જરૂર કરતા વધાર ઠંડીના લીધે સાંધામાં દુખાવો થઇ શકે છે. જે ધીમે-ધીમે સંધિવાને આમંત્રણ આપે છે.
AC હવામાંથી ભેજ શોષી લે છે એટલુ જ નહી સ્કિન અને વાળમાંથી પણ ભેજ શોષે છે. જેના કારણે સ્કિન અને વાળ ડ્રાય થઇ જાય છે. ત્વચામાં કરચલીઓ પડે છે અને સાથે જ સ્કિન સંબંધિત અન્ય સમસ્યાઓ થાય છે.
શું ઉપાય કરશો?
- તમે ઑફિસમાં તો AC બંધ નથી કરી શકતા પરંતુ આની ટેવ ના પાડો. ઘરમાં ઓછામાં ઓછો ACનો ઉપયોગ કરો અને નોર્મલ તાપમાનમાં રહેવાનો પ્રયાસ કરો. ACમાં બેસતા હોવ તો વારંવાર સ્કિન પર મોઈશ્ચરાઈઝર લગાવવું.
- ACમાં બેસો ત્યારે સતત પાણી પીતા રહેવુ જોઇએ. ઓફિસમાં વચ્ચે-વચ્ચે ઊભા થઈને એસીના બદલે જ્યાં તાજી હવા મેળવી શકો તેવી જગ્યાએ જાવો. ઑફિસ પછી સાંજે અથવા તો ઑફિસ જતા પહેલા સવારે ગાર્ડનમાં ચાલવા જાઓ જેથી જરૂરી ઓક્સિજન મળી રહે.