IPLની ૧૩મી સિઝન ૧૯ સપ્ટેમ્બરથી UAEમાં શરૂ થવાની છે. બધી જ આઠ ટીમ UAE પહોંચી ચૂકી છે. આ દરમિયાન ચેન્નઈ સુપર કિંગ્સ (CSK)ના મહત્ત્વપૂર્ણ ખેલાડી સુરેશ રૈનાએ બધાંને ચોંકાવી દેનારો નિર્ણય કર્યો. તે અચાનક જ UAEથી સ્વદેશ પાછો ફર્યો. આની પાછળ શરૂઆતમાં અંગત કારણ જણાવવામાં આવ્યું હતું, પરંતુ હવે આ મામલામાં ટીમના બોસ N શ્રીનિવાસને એક મોટું નિવેદન આપ્યું છે. તેમણે તો એટલે સુધી કહી નાખ્યું કે, 'સફળતા તેના પર સવાર થઈ ગઈ છે.'
મને લાગે છે કે તે પાછો ફરવા ઇચ્છશે, સિઝન શરૂ નથી થઈ, તેને સમજાશે કે તે શું (૧૧ કરોડ રૂપિયા) છોડીને ગયો છેઃ શ્રીનિવાસન
રૈના હોટલના રૂમથી ખુશ નહોતો અને તે કોરોના બાબતે કડક પ્રોટોકોલ ઇચ્છતો હતો
BCCIના ભૂતપૂર્વ અધ્યક્ષ અને CKSના માલિક શ્રીનિવાસને એ સમાચારોની પુષ્ટિ કરી દીધી છે, જેમાં કહેવામાં આવ્યું હતું કે સુરેશ રૈના ખરાબ હોટલ રૂમ અને કોરોનાના ડરના કારણે IPL છોડીને સ્વદેશ પરત ફર્યો છે. હોટલ રૂમ અંગે રૈના અને ટીમના કેપ્ટન M S ધોની વચ્ચે પણ વિવાદ થયો. કેપ્ટન ધોનીએ રૈનાને મનાવવાની બહુ જ કોશિશ કરી હતી, પરંતુ તે માન્યો નહીં અને ટૂર્નામેન્ટ છોડવાનો નિર્ણય કર્યો.
CKSના માલિક શ્રી નિવાસન
ક્રિકેટર તૂંડમિજાજી અભિનેતા જેવા હોય છે
એક ઇન્ટરવ્યૂમાં CKSના માલિક શ્રીનિવાસને એક મોટું નિવેદન આપ્યું છે. તેમણે જણાવ્યું, ''રૈનાએ અચાનક ટીમનો સાથ છોડી દેતાં ટીમને ધક્કો લાગ્યો છે, પરંતુ કેપ્ટન ધોનીએ સ્થિતિને સંભાળી લીધી છે. ક્રિકેટરો જૂના જમાનાના તૂંડમિજાજી અભિનેતા જેવા હોય છે. ચેન્નઈ સુપર કિંગ્સ પરિવાર જેવી છે અને બધા સિનિયર ખેલાડીઓ સાથે રહેવાનું શીખી ચૂક્યા છે.
ઘણી વાર સફળતા માથા પર સવાર થઈ જાય છેઃ શ્રીનિવાસન
આટલેથી તેઓ અટક્યા નહોતા. તેમણે વધુમાં કહ્યું, ''રૈના એપિસોડમાંથી ટીમ બહાર આવી ગઈ છે. હું સમજું છું કે જો તમે ખુશ ના હો તો પાછા ફરી જાવ. હું કોઈ પર કંઈક કરવા માટે દબાણ લાવી શકું નહીં. ઘણી વાર સફળતા તમારા માથા પર ચડી જાય છે. મારે ધોની સાથે વાત થઈ છે. કેપ્ટને મને વિશ્વાસ અપાવ્યો છે કે જો કોરોના કેસ વધી જશે તો પણ ચિંતાની વાત નથી. મારી પાસે મજબૂત કેપ્ટન છે. ધોની આવી બધી ચીજોથી બેફિકર રહે છે અને તેનાથી ટીમને ઘણો આત્મવિશ્વાસ મળે છે.''
રૈનાને સેલરી નહીં મળે
શ્રીનિવાસનને વિશ્વાસ છે કે સુરેશ રૈના પાછો ફરશે. તેમણે જણાવ્યું, ''મને લાગે છે કે તે પાછો ફરવા ઇચ્છશે. સિઝન શરૂ નથી થઈ અને તેને સમજાશે કે તે શું (૧૧ કરોડ રૂપિયા) છોડીને ગયો છે. તેને આ (સેલરી) નહીં મળે.''
શો વિવાદ છે?
CSKની ટીમ ૨૧ ઓગસ્ટે દુબઈ પહોંચી હતી ત્યારથી રૈના હોટલના રૂમથી ખુશ નહોતો અને તે કોરોના બાબતે કડક પ્રોટોકોલ ઇચ્છતો હતો. તે ધોની જેવો રૂમ ઇચ્છતો હતો, કારણે તેના રૂમની બાલ્કની યોગ્ય નથી. આ બધા CSKની ટીમના બે ખેલાડીઓ (ફાસ્ટ બોલર દીપક ચહર અને વિકેટકીપર બેટ્સમેન ઋતુરાજ ગાયકવાડ) સહિત કુલ ૧૩ સભ્યના કોરોના રિપોર્ટ પોઝિટિવ આવ્યા તો રૈના વધુ ડરી ગયો હતો.