બોલિવૂડ એક્ટર સુશાંતની મોતે બધાંને હચમચાવી નાખ્યા છે. બોલિવૂડના તેના ઘણાં મિત્રો સુશાંતથી જોડાયેલી યાદો શેર કરી રહ્યાં છે. ત્યારે હવે બોલિવૂડ એક્ટ્રેસ શ્રદ્ધા કપૂરે સુશાંતને યાદ કરતાં સોશિયલ મીડિયા પર એક ઈમોશનલ પોસ્ટ શેર કરીને કેટલીક વાતો શેર કરી છે.
સુશાંતના જવાથી બધાં દુઃખી
તેના ફેન્સ અને બોલિવૂડ ફ્રેન્ડ તેની સાથે જોડાયેલી યાદો શેર કરી રહ્યાં છે
સુશાંતની છેલ્લી ફિલ્મ છિછોરેમાં તેની સાથે કામ કરી ચૂકેલી એક્ટ્રેસ શ્રદ્ધા કપૂરે લખ્યું કે, જે પણ થયું તેને સ્વીકારવું ખૂબ જ મુશ્કેલ છે. એક મોટું ખાલીપણું છે. તે દરેક વસ્તુ અને દરેક જગ્યાએ સુંદરતા જોઈ લેતો હતો. તે પોતાની જ ધૂનમાં નાચતો હતો. હું છિછોરેના સેટ પર તેના આવવાની રાહ જોતી હતી. એક એક્ટર હોવાની સાથે તે એક ખૂબ જ સારો માણસ પણ હતો.
શ્રદ્ધાએ આગળ લખ્યું- હું એકવાર તેના ઘરે ગઈ હતી અને તેણે મને તેના ટેલિસ્કોપથી ચંદ્ર બતાવ્યો હતો અને હું એ દ્રશ્ય જોઈને સ્તબ્ધ થઈ ગઈ હતી. તે આ ફીલિંગને બધાંની સાથે શેર કરવા માટે ઉત્સુક રહેતો હતો. તે નાની-નાની વાતોમાં રસ લેતો હતો અને પોતાની ખુશી શોધી લેતો હતો. હકીકતમાં તે અલગ જ વ્યક્તિ હતો. હું તેને મિસ કરીશ. પ્રિય સુશ.