ચિંતાજનક / કોરોનાગ્રસ્ત અમદાવાદીઓ પર તોળાતુ સંકટ, દર્દીઓનો 'શ્વાસ રૂંધાયો'

• અમદાવાદમાં ઓક્સિજનનો જથ્થો ખૂટવાની શરૂઆત
• ખાનગી હોસ્પિટલના તબીબનો દાવો
• વધુ રૂપિયા આપવા છતા નથી મળતો ઓક્સિજન

કોરોનાગ્રસ્ત દર્દીઓ ઉપર તોળાતુ સંકટ

રાજ્યમાં કોરોનાની મહામારી વચ્ચે અમદાવાદીઓ માટે માઠા સમાચાર સામે આવ્યાં છે. કોરોના વિસ્ફોટ વચ્ચે અમદાવાદમાં ઓક્સિજનની અછત ઉભી થઇ ગઈ છે. લોકોને રૂપિયા ચૂકવ્યાં બાદ પણ ઓક્સિજન નથી મળી રહ્યો. 

120 રૂપિયામાં મળતો ઓક્સિજન હવે 500 રૂપિયા આપવા છતા નથી મળતો: ડૉક્ટર 

ખાનગી હોસ્પિટલના ડૉક્ટર કહી રહ્યા છે કે શહેરની ખાનગી હોસ્પિટલ પાસે પૂરતો ઓક્સિજનનો જથ્થો નથી. 120થી 130 રૂપિયામાં મળતો ઓક્સિજન હવે 500 રૂપિયા આપવા છતાં મળતો નથી. કોરોના મહામારી વધી રહી છે ત્યારે ઑક્સીજન ખૂટી પડતાં દર્દીઓના જીવને જોખમ છે. સરકાર ઓક્સિજનનો જથ્થો પર્યાપ્ત રહે એવી વ્યવસ્થા કરે તેવી તબીબોએ માગ કરી છે.

અમદાવાદમાં માઇક્રોકન્ટેઇનમેન્ટ ઝોનમાં વધારો 

અમદાવાદમાં સતત વધતાં કહેરના કારણે માઇક્રોકન્ટેઇનમેન્ટ ઝોનમાં વધારો કરવામાં આવ્યો છે. આજે વધુ 35 સોસાયટીઓ માઈક્રોકન્ટેઇનમેન્ટ ઝોનમાં મૂકવામાં આવી છે. અત્યાર સુધી 318 વિસ્તાર માઈક્રોકન્ટેઇનમેન્ટમાં છે. 

અમદાવાદના પશ્ચિમ વિસ્તારની સ્થિતિ બની કફોડી 

અમદાવાદમાં કોરોના સંક્રમણમાં સતત વધારો જોવા મળી રહ્યો છે. તેમાં પણ ખાસ કરીને શહેરના પશ્વિમ વિસ્તારમાં જેવા કે ગોતા,થલતેજ, નવરંગપુરા, ઘાટલોડિયામાં સતત કોરોના સંક્રમણ વધી રહ્યુ છે. આ વિસ્તારના ટેસ્ટિંગ ડોમ પર જોવા મળી રહી છે અને તમામ વિસ્તારોમાં ટેસ્ટિંગ શરૂ થાય તે પહેલા જ લોકોની લાઈનો જોવા મળી રહી છે.