પત્ર / આંતરરાષ્ટ્રીય શૂટરે લોહીથી અમિત શાહને લખ્યો પત્ર, નિર્ભયાના દોષિતોને ફાંસી પર લટકાવવાની કરી માંગ

• શૂટર વર્તિકા સિંહે પોતાના લોહીથી કેન્દ્રીય ગૃહ મંત્રી અમિત શાહને પત્ર લખ્યો
• વર્તિકા સિંહે દિલ્હી ગેંગરેપના દોષિતોને ફાંસી આપવાની માંગ કરી
• વર્તિકા સિંહ દિલ્હી સ્થિત ઇન્દ્રપ્રસ્થ કોલેજ ફોર વિમેનના વિદ્યાર્થી સંઘની અધ્યક્ષ રહી ચૂકી છે
   

આ મામલાના ચારેય દોષિતોને પહેલા જ મોતની સજા સંભળાવવામાં આવી ચૂકી છે અને આ તમામ હાલ દિલ્હીની તિહાડ જેલમાં બંધ છે. નોંધનીય છે કે, 16 ડિસેમ્બર 2012ના દિવસે દેશની રાજધાની દિલ્હીમાં થયેલા ગેંગરેપ બાદથી જ દોષિતોને મળનારી સજા પર આખા દેશની નજર ટકી છે. 

વર્તિકા સિંહે અમિત શાહને પોતાના લોહીથી પત્ર લખીને કહ્યું કે, આ ગેંગરેપના દોષિતોને મારા દ્વારા ફાંસીની સજા આપવી જોઇએ...તેથી આખા દેશમાં એ સંદેશો જશે કે એક મહિલા પણ કોઇને સજા સંભળાવી શકે છે. આ પત્ર લખનાર વર્તિકા સિંહે બાદમાં મીડિયા સાથે વાતચીતમાં કહ્યું કે, હું ઇચ્છું છુ કે અભિનેત્રીઓ અને મહિલા સાંસદ મને સપોર્ટ કરે. મને આશા છે કે તેથી સમાજમાં બદલાવ આવશે.

નોંધનીય છે કે, વર્તિકા સિંહ ઉત્તર પ્રદેશના પ્રતાપગઢના રાયચંદ્રપુરમાં રહે છે. વર્ષ 2013-14 સુધી દિલ્હી સ્થિત ઇન્દ્રપ્રસ્થ કોલેજ ફોર વિમેનના વિદ્યાર્થી સંઘની અધ્યક્ષ પણ રહી ચૂકી છે. 2012માં વર્તિકાએ જર્મની અને 2013માં સિંગાપુરમાં આયોજિત શૂટિંગ કોમ્પિટિશનમાં ભાગ લીધો હતો. તે રાષ્ટ્રીય અને રાજ્ય સ્તર પર યોજાનારી શૂટિંગ કોમ્પિટિશનમાં ગોલ્ડ મેડલ હાંસલ કરી ચૂકી છે.