માસ્ટર બ્લાસ્ટર સચિન તેંડુલકરની ગણના દુનિયાના ઓલટાઈમ ગ્રેટેસ્ટ બેટ્સમેનમાં થાય છે. તેમણે પોતાની બેટિંગથી કેટલાય બોલર્સના પરસેવા છોડાવી દીધા છે. સચિન તેંડુલકર જ્યારે પણ પાકિસ્તાન સામે મેળાના પર ઉતરતા હતા ત્યારે બોલર્સની જોરદાર ધોલાઈ કરતા. એવામાં શોએબ અખ્તરે સચિન તેંડુલકર પર એક નિવેદન આપ્યું છે.
શોએબ અખ્તરે સચિન સાથે પહેલી મેચનો અનુભવ શેર કર્યો
શોએબે કહ્યું તે પોતાના જ એટિટ્યુડમાં હતા
તે મેચમાં શોએબે પહેલી જ બોલ પર સચિનને આઉટ કર્યા હતા
પોતાના ક્રિકેટ કરિયરમાં સચિન અને શોએબનો ઘણીવાર મુકાબલો થયો છે. હાલમાં જ રાવલપીંડી એક્સપ્રેસ નામથી મશહૂર શોએબ અખ્તરે સચિન સાથેની પહેલી મુલાકાતની વાત શેર કરી છે.
સચિનને તે વખતે ઓન ગોડ ઓફ ક્રિકેટ તરીકે સંબોધવામાં આવતા હતા. દુનિયાભરમાં તેમના ચાહકો હતા. સચિન અને શોએબનો આમનોસામનો વર્ષ 1999માં ભારત અને પાકિસ્તાન વચ્ચે કોલકાતામાં રમાયેલ એક ટેસ્ટ મેચમાં થયો. શોએબ અખ્તરે પાકિસ્તાની ચેનલને આપેલ એક સાક્ષાત્કારમાં કહ્યું કે તે પોતાના એટિટ્યુડમાં જ હતો અને સચિન સામે પહેલીવાર બોલિંગ કરતા સમયે તેમના મનમાં કોઈ જ ભય ન હતો.
શોએબ અખ્તરે કહ્યું કે 'સચિન તે સમયે બેટિંગના હિરો હતા. મેં સાંભળ્યું હતું કે તે ગોડ છે. મેં પોતાની જાતને પૂછ્યું-આ ગોડ છે ? આની તો હવે વાત નહીં. હું તેમને ઓળખતો ન હતો. તે પોતાના એટિટ્યુડમાં હતા અને હું મારા એટિટ્યુડમાં હતો. હું તેમને પહેલી જ બોલમાં આઉટ કરવા માંગતો હતો અને થયું પણ એવું જ'
નોંધનીય છે કે કોલકાતા ટેસ્ટમાં સચિન શોએબની પહેલી જ બોલ પર ક્લીન બોલ્ડ થઇ ગયા હતા. શોએબ અખ્તર પહેલીવાર ભારત સામે મેદાનમાં હતા અને આ મેચમાં તેમણે વીવીએસ લક્ષ્મણ, રાહુલ દ્રવિડ અને વેંકટેશ પ્રસાદની પણ વિકેટ લીધી હતી.