ક્રિકેટ / શું ભેદભાવ? પાકિસ્તાની ક્રિકેટ ટીમનો ઈતિહાસઃ 67 વર્ષમાં માત્ર 2 હિન્દુ ક્રિકેટર રમ્યા

• પાકિસ્તાનમાં હિન્દુ ક્રિકેટરોની છે આવી હાલત
• શોએબ અખ્તરે શેર કરી હિન્દુ ક્રિકેટર પ્રત્યે ભેદભાવ કહાણી
• શોએબનો વીડિયો થઈ રહ્યો છે વાયરલ

એક તરફ ઘણા દિગ્ગજ મુસ્લિમ ક્રિકેટરોએ ભારતનું પ્રતિનિધિત્વ કર્યું છે ત્યારે પરેશાન કરનારી વાત છે કે પાકિસ્તાન તરફથી તેના 67 વર્ષના ક્રિકેટ ઇતિહાસમાં માત્ર બે હિંદુ ક્રિકેટર- દાનિશ કનેરિયા અને અનિલ દલપત રમી શક્યા છે.

ઓક્ટોબર-1952માં પાકિસ્તાને પોતાની પ્રથમ ટેસ્ટ શ્રેણી રમી હતી અને એ પણ ભારત સામે. દિલ્હીમાં એ મુકાબલો રમાયો હતો અને ભારતે ઇનિંગ્સ અને 70 રનથી શાનદાર જીત હાંસલ કરી હતી. અબ્દુલ કરદારની કેપ્ટનશિપમાં પાકિસ્તાની ટીમને પાંચ ટેસ્ટની શ્રેણીમાં 1-2થી હારનો સામનો કરવો પડ્યો હતો.
પાકિસ્તાન તરફથી 61 ટેસ્ટ અને 18 વન ડે રમનારા દાનિશ આ મુસ્લિમ દેશ તરફથી આંતરરાષ્ટ્રીય ક્રિકેટ રમનારો બીજો હિંદુ ખેલાડી હતો. એ પહેલાં અનિલ દલપત પાકિસ્તાન તરફથી આંતરરાષ્ટ્રીય રમનારો પ્રથમ હિંદુ ખેલાડી હતો.

અનિલ દલપતની કરિયર બહુ લાંબી ચાલી નહોતી. તે ફક્ત નવ ટેસ્ટ અને 15 વન ડે રમ્યો. તે વિકેટકીપર-બેટ્સમેન હતો, પરંતુ વધુ સફળ ના રહ્યો. તેના નામે ટેસ્ટમાં કુલ 167 રન અને વન ડેમાં કુલ 87 રન નોંધાયેલા છે. તે માત્ર બે વર્ષ (1984-86) જ પાકિસ્તાની ટીમનો હિસ્સો રહ્યો હતો. તેણે વિકેટની પાછળ ટેસ્ટમાં 25 અને વન ડેમાં 15 ખેલાડીને શિકાર બનાવ્યા હતા. અનિલે 2002માં આરોપ લગાવ્યો હતો કે, ''પાકિસ્તાનના ભૂતપૂર્વ કેપ્ટન ઇમરાન ખાનને કારણે તેની ક્રિકેટ કરિયર બરબાદ થઈ ગઈ. તેના કારણે જ મને બહુ ઓછી તક મળી. હું વધુ ક્રિકેટ રમી શક્યો હોત.''