નિવેદન / સુશાંત સિવાય પણ દેશમાં ઘણું બધું થઇ રહ્યું છે, આત્મહત્યાની ઉજવણી થઇ રહી છે : શિવસેના લાલચોળ

• સુશાંતની આત્મહત્યાની ઉજવણી કરવામાં આવી રહી છે : શિવસેના 
•  દેશમાં સુશાંત સિવાય પણ ઘણી બધી ઘટનાઓ થઇ રહી છે : શિવસેના 
• સુશાંતના કેસમાં શું શોધવાનું બાકી છે? : શિવસેના 

સંજય રાઉતે આરોપ લગાવ્યો કે સુશાંત સિંહ રાજપૂતની આત્મહત્યાએ હવે ઉજવણીનું સ્વરૂપ ધારણ કરી લીધું છે. શિવસેનાનાં  મુખપત્ર સામનામાં સુશાંત સિંહ મુદ્દે મોટા સવાલ કરવામાં આવ્યા છે. તેમણે કહ્યું કે સુશાંતના મૃત્યુને આટલો સમય થઈ ગયો છે, પરંતુ હજી પણ એના જ વિશે વાત કરવામાં આવી રહી છે. આ ઘટના બાદ કલાકાર દ્વારા સમાજનાં જીવન પર શું અસર પડે છે તે સુશાંતના આપઘાત કેસમાં બહાર આવ્યું છે.

સુશાંત સિંહ કેસમાં જ્યાં એક તરફ લોકો કહી રહ્યા છે કે સુશાંત સિંહને ન્યાય મળવો જોઈએ. આ સિવાય ફિલ્મ જગતમાં સગાવાદ મુદ્દે ઘણા બધા કલાકારોની જનતાએ હવા કાઢી નાખી છે ત્યારે રાઉતે આ મુદ્દે મોટા સવાલો કર્યા છે. તેમણે કહ્યું કે ‘સુશાંતના કેસમાં શું શોધવાનું બાકી છે? પોલીસ કોની તપાસ કરી રહી છે? તે એકલો રહેતો હતો. તેની માનસિક સ્થિતિ સારી નહોતી અને નિષ્ફળતાની હતાશામાં તેણે બાંદ્રા સ્થિત તેના ઘરે ગળેફાંસો ખાઇને પોતાનો જીવ દીધો, 

સંજય રાઉતે કહ્યું કે દેશમાં સુશાંત સિવાય પણ ઘણી બધી ઘટનાઓ થઇ રહી છે, કોરોનાનો કહેર છે અને ચીની હુમલામાં સૈનિકો શહીદ થઇ ગયા છે પણ હજુ  સુશાંતની આત્મહત્યાના જ સમાચાર મળી રહ્યા છે. તેમણે કહ્યું  પુણેમાં રહેતા રાજેશ શિંદે નામના વ્યક્તિએ પત્ની અને બે પુત્રી સાથે મળીને આત્મહત્યા કરી લીધી. તે આત્મહત્યાની ફાઇલ બંધ છે અને સુશાંતની આત્મહત્યાની ઉજવણી કરવામાં આવી રહી છે.