રાજનીતિ / વેન્ટિલેટર પર છે શિંદે સરકાર, ફેબ્રુઆરી નહીં જોઈ શકે: સંજય રાઉતના નિવેદનથી મહારાષ્ટ્રમાં ખળભળાટ 

• શિવસેનાના નેતા સંજય રાઉતનું મોટું નિવેદન 
• મહારાષ્ટ્રમાં એકનાથ શિંદે સરકાર વેન્ટિલેટર સપોર્ટ પર
• ફેબ્રુઆરી સુધીમાં એકનાથ શિંદે સરકાર પડી જશે

શિવસેનાના નેતા સંજય રાઉતે એક મોટું નિવેદન આપ્યું હતું કે, મહારાષ્ટ્રમાં એકનાથ શિંદે સરકાર વેન્ટિલેટર સપોર્ટ પર છે અને ફેબ્રુઆરી સુધીમાં તે પડી જશે. આ સાથે સંજય રાઉતે કહ્યું કે, જો ન્યાયતંત્ર પર દબાણ લાવવામાં નહીં આવે, તો શિંદે જૂથના 16 ધારાસભ્યોને ગેરલાયક ઠેરવવામાં આવશે. સુપ્રીમ કોર્ટ હાલમાં ગયા વર્ષે જૂનમાં ઉદ્ધવ ઠાકરે અને શિંદે જૂથોમાં શિવસેના પક્ષના વિભાજન અને પક્ષપલટા વિરોધી કાયદા હેઠળ ગેરલાયક ઠરવા સંબંધિત કેસની સુનાવણી કરી રહી છે. 10 જાન્યુઆરીએ સર્વોચ્ચ અદાલત શિંદે છાવણીના 16 ધારાસભ્યોને ગેરલાયક ઠેરવવાની માંગણી સહિતની અરજીઓની બેચની સુનાવણી કરશે.

સંજય રાઉતે કહું કે, આ ગેરકાયદેસર સરકાર વેન્ટિલેટર સપોર્ટ પર છે અને તે ફેબ્રુઆરી જોઈ શકશે નહીં. જો ન્યાયતંત્ર પર દબાણ નહીં લાવવામાં આવે તો 16 ધારાસભ્યો (શિંદે જૂથના) ટૂંક સમયમાં ગેરલાયક ઠરશે. રાજ્ય સરકારમાં ભ્રષ્ટાચારનો આરોપ લગાવતા રાઉતે જણાવ્યું હતું કે, વિપક્ષે વિધાનસભાના તાજેતરના શિયાળુ સત્ર દરમિયાન મુખ્યમંત્રી અને અબ્દુલ સત્તાર સહિત ઘણા મંત્રીઓના રાજીનામાની માંગ કરી હતી. રાજ્યસભાના સાંસદે દાવો કર્યો, પરંતુ રાજ્ય સરકાર મૌન છે. તેનું અસ્તિત્વ પણ નથી. તે પાણીમાં ભેંસની જેમ નિષ્ક્રિય છે. રાજ્ય સરકારમાં બે જૂથો છે (એકનાથ શિંદે અને દેવેન્દ્ર ફડણવીસ) અને દરેક પોતપોતાના મુદ્દાઓમાં વ્યસ્ત છે.

રાજ ઠાકરે શું કહ્યું ? 

મહારાષ્ટ્ર નવનિર્માણ સેનાના વડા રાજ ઠાકરેની દાદર (શિવસેનાનું મુખ્યમથક) માં સેના ભવન પાસે રેલી યોજવાની યોજના વિશે પૂછવામાં આવ્યું ત્યારે રાઉતે કહ્યું કે, આઇકોનિક બિલ્ડિંગની સામે મેળાવડો કરવા ઇચ્છતા કોઈપણ પર કોઈ પ્રતિબંધ ન હોવો જોઈએ. તેમણે કહ્યું કે, શિવસેના શિવાજી પાર્કમાં MNS વડાના ઘરની નજીક રેલીઓ કરે છે. સંજય રાઉતે આરોપ લગાવ્યો હતો કે, બૃહન્મુંબઈ મ્યુનિસિપલ કોર્પોરેશનને રેલી માટે પરવાનગી મળશે કારણ કે, MNS માટે મૈત્રીપૂર્ણ રાજ્ય સરકાર છે અને એ પણ કારણ કે રાજ ઠાકરેની રેલી ભાજપ દ્વારા જ પ્રાયોજિત કરવામાં આવી રહી છે. રાઉતે કહ્યું, 'પરંતુ અમને પરવાનગી મળતી નથી. અમારે પરવાનગી મેળવવા માટે સંઘર્ષ કરવો પડે છે કારણ કે સરકાર અમારાથી ડરે છે.