વૈવાહિક સમસ્યા / 'લગ્નના ફિલ્ડમાં ફેલ થયો', ભારતનો આ સ્ટાર ક્રિકેટર લઈ રહ્યો છે છુટાછેડા, ફરી લગ્નને લઈને કર્યો ખુલાસો

• ભારતના સ્ટાર ક્રિકેટર શિખર ધવનનું આયશા મુખરજી સાથેનું લગ્નજીવન પડી ભાંગ્યું
• હાલ તલાકનો કેસ ચાલી રહ્યો છે
• ધવન બોલ્યો- લગ્નના ફિલ્ડમાં હું ફેલ રહ્યો, મને તેનો કંઈ અનુભવ નથી

ભારતીય ટીમના સ્ટાર ઓપનર શિખર ધવનને ક્રિકેટના મેદાન પર હોય કે અંગત જીવનમાં તે પોતાનું જીવન મુક્તપણે જીવવાનું પસંદ કરે છે. જો કે આ બંને જગ્યાએ તે મુશ્કેલ સમયમાંથી પસાર થઇ રહ્યો છે. એક તરફ તે ટીમ ઇન્ડિયામાંથી બહાર છે તો બીજી તરફ પત્ની આયશા મુખર્જી સાથે તેના છૂટાછેડા થઇ રહ્યા છે. હાલમાં જ તેણે પોતાની પર્સનલ લાઈફ વિશે વાત કરતા અનેક રહસ્યો ખોલ્યા છે. આ સમય દરમિયાન તેણે પોતાના છૂટાછેડા અંગે મૌન પણ તોડ્યું છે. ધવનનું કહેવું છે કે તેને બીજા પર આંગળી ચીંધવી પસંદ નથી, તે લગ્નના ફિલ્ડમાં એટલા માટે નિષ્ફળ રહ્યો કારણ કે તેને તેનો અનુભવ નથી. 

તલાક વિશે શું બોલ્યો ધવન 

એક ઈન્ટરવ્યૂમાં પોતાના ડિવોર્સ વિશે વાત કરતા ધવને કહ્યું કે, "હું એટલા માટે નિષ્ફળ ગયો કારણ કે જ્યારે કોઈ પણ વ્યક્તિ કોઈ નિર્ણય લે છે તો અંતિમ નિર્ણય તેનો હોય છે. મને બીજા તરફ આંગળી ચીંધવી ગમતી નથી. હું નિષ્ફળ ગયો કારણ કે મને તે ક્ષેત્ર વિશે કોઈ ખ્યાલ નહોતો. જો તમે મને ક્રિકેટ વિશે એ જ વાતો પૂછી હોત જે હું આજે 20 વર્ષ પહેલા કરી રહ્યો છું, તો મને આ બધી બાબતોની જાણ ન હોત. આ બધું અનુભવ વિશે છે. શરૂઆતનાં એક-બે વર્ષ માનવી સાથે વિતાવો, બંનેનાં મૂલ્યો મેળ ખાય છે કે નહીં તે જુઓ. ધવને કહ્યું કે તે પણ એક મેચ હતી. અત્યારે મારા છૂટાછેડાનો કેસ ચાલી રહ્યો છે, જ્યારે એ પતી ગયા પછી મારે લગ્ન કરવાનાં છે ત્યારે મારે કેવા પ્રકારની પાર્ટનર જોઈએ છે, લગ્ન કરવાં હોય તો કોની સાથે રહી શકું એ ક્ષેત્રે હું વધુ હોશિયાર બનીશ. જ્યારે હું 26-27 વર્ષનો હતો અને રમી રહ્યો હતો ત્યારે તે સમયે મારો કોઈ સંબંધ નહોતો, જોકે મને મજા આવતી હતી. જ્યારે હું પ્રેમમાં પડ્યો ત્યારે હું ખતરો જોઈ શક્યો  નહોતો અને હવે જ્યારે ફરી પ્રેમમાં પડીશ ત્યારે તો જો કોઈ ખતરો લાગતો હશે તો તે હું દૂર કરવાનો પ્રયાસ કરીશ. 

લગ્નનો બાઉન્સર મારા માથે વાગ્યો 
ધવને એવું પણ કહ્યું કે લગ્ન મારે માટે એક બાઉન્સર હતો જે મારા માથા પર વાગ્યો અને મને પાડી દીધો. હવે ભૂલ થઈ ગઈ. હવે ધ્યાન રાખીશ. 

કોણ છે શિખર ધવનની પત્ની 
શિખર ધવને 2012માં આયેશા મુખર્જી સાથે લગ્ન કર્યાં હતાં, આયેશાના આ બીજા લગ્ન હતા. આ લગ્નથી ધવનને એક પુત્ર પણ છે, જેનો જન્મ 2014માં થયો હતો. ધવનના પુત્રનું નામ જોરાવર છે. સપ્ટેમ્બર 2021 માં, સમાચાર આવ્યા હતા કે બંનેએ છૂટાછેડા લેવાનો નિર્ણય લીધો છે. હાલ તેમના છૂટાછેડાનો કેસ ચાલી રહ્યો છે એટલે જોરાવર પોતાની માતા સાથે મેલબોર્નમાં રહે છે. ધવન અવારનવાર તેને મળવા ત્યાં જાય છે.