ડિગ્રી કૌભાંડ / અમદાવાદનાં પિતા-પુત્રી વચ્ચે થયો એવો વિવાદ કે જાણી સૌ કોઈ દંગ રહી ગયા

બોગસ ડિગ્રી કૌભાંડ અનેક વાર પ્રકાશમાં આવતા હોય છે. અને તેમાં તંત્ર, વ્યક્તિ કે જનતા આમને સામને હોય છે. પરંતુ અમદાવાદમાં તાજા જ બહાર આવેલા બોગસ ડિગ્રી કૌભાંડે સગાં પિતા-પુત્રીને સામ-સામે ઊભા કરી દીધાં છે. દીકરીનો બોગસ ડિગ્રી વિવાદ સામે આવ્યો તો દીકરીએ પિતાની સામે એક નહીં પરંતુ અનેક આંગળી ચિંધી દીધી. તો કોણ છે આ પિતા-પુત્રી જેનાં વિવાદથી ઘરની વાતોનું થઈ રહ્યું છે વતેસર તે જોઈએ આ અહેવાલમાં.

અમદાવાદનાં ગોમતીપુરમાં ચાલતી શેઠ સી.એલ. હિન્દી શાળાનાં શિક્ષિકા માધુરી તોમર વિવાદમાં ફસાયા છે. બોગસ સર્ટીના આધારે શિક્ષિકા તરીકે નોકરી કરવાનો તેમના પર આક્ષેપ થઈ રહ્યો છે. તમને જાણીને નવાઈ લાગશે કે આ આક્ષેપ કોઈ બીજાએ નહીં પરંતુ ખુદ તેમના પિતાએ કર્યો છે. કોંગ્રેસનાં આગેવાન  અને શેઠ સી.એલ.હિન્દી શાળાનાં સંચાલક એવાં કિશનસિંહ તોમરે પોતાની પુત્રી વિરુદ્દ બોગસ ડિગ્રીનાં સહારે નોકરી મેળવવાનો આક્ષેપ કર્યો છે.

કિશનસિંહની પુત્રી તેમની શાળામાં જ શિક્ષિકા તરીકે ફરજ બજાવે છે. લખનઉ યુનિવર્સિટીનાં સર્ટિફિકેટમાં ખરાઈ કરતાં પુત્રીના બોગસ સર્ટિ અંગે ભાંડો ફૂટ્યો હતો. જો કે, પુત્રીએ પોતાના પિતા દ્વારા કરવામાં આક્ષેપો પાયાવિહોણાં ગણાવ્યાં છે. એટલું જ નહીં માધુરીએ પોતાના પિતા સામે અનેક પ્રકારના આરોપોની ઝડી વરસાવી દીધી છે. માધુરીનું કહેવું છે કે તેના પિતા કિશનસિંહ તોમર તેને દરેક પ્રકારનાં હકોથી દૂર રાખવા આ પ્રકારે પરેશાન કરી રહ્યાં છે.
 


પુત્રીની બોગસ ડિગ્રી પર પોતાની જ સ્કૂલમાં એક પિતા જ્યારે સવાલ ઉઠાવે છે ત્યારે આ વાત ચર્ચાનો વિષય જરૂર બને છે કેમ કે પાપ છાપરે ચડીને  કેવી રીતે પોકારે છે તેનું આ ઉદાહરણ છે. ઘરના આંતરિક કલહની વાત બોગસ ડિગ્રી પર આરોપ રૂપે જ્યારે બહાર આવે છે ત્યારે શિક્ષણજગતમાં અંદરખાને મેળાપીપણામાં કેટલું ચાલતું હશે તે વિચારવાનો મુદ્દો છે. પિતાપુત્રીના વિવાદના સંવાદો વચ્ચેથી શિક્ષણ જગતમાં ચાલતા કૌભાંડોનાં સૂર સાંભળવા મળે છે.

શાળા સંચાલક પિતાએ પુત્રીને પાંચ વર્ષ નોકરીમાં રાખી હવે તેમને પુત્રીની બોગસ ડિગ્રી ધ્યાન પર ચડી છે તો આ તરફ એક પુત્રીને પિતાના એક શિક્ષિકા સાથે અફેરથી માંડીને શાળામાં ચૂંટણીઓ ન યોજાવા વિશે ફરિયાદો કરવાનો સમય મળ્યો છે. શાળા સંચાલક પિતાનો આરોપ છે કે નોકરીએ રાખ્યા પછી સ્કૂલમાં માધુરીની દાદાગીરી શરૂ થઈ હતી. લખનૌ યુનિવર્સિટીમાં તેમની ડિગ્રી વિશે તપાસ કરી તો માધુરીની ડિગ્રી બોગસ નિકળી હતી.

શ્વેતા સિંહ નામની યુવતીની ડિગ્રીમાં માધુરીનું નામ બતાવાયું હતું. તો પુત્રીએ પિતા પર વળતા આક્ષેપો શરૂ કરી દીધા છે. માધુરીએ પિતા પર આક્ષેપ કર્યા છે કે,આ બોગસ ડિગ્રીની વાત ખોટી છે. .5 વર્ષ પહેલા DEOની મંજૂરીથી મારી ભરતી કરાઇ હતી. મારા પર અમદાવાદ છોડવા માટે દબાણ કરવામાં આવે છે. મને કાયમી કરવામાં જ નથી આવી મારા પિતાએ લોકો પાસેથી ઘણું બધુ પડાવેલું છે. મે ચૂંટણીની માગ કરી એટલે આવા આક્ષેપ કરે છે એટલું જ નહીં. મારા પિતાનું એક શિક્ષિકા સાથે અફેર છે. આ આક્ષેપોમાં કટેલુ વજૂદ છે તે પોલીસ તપાસનો વિષય છે. હવે આ મામલે સ્કૂલનાં પ્રિન્સિપાલે માધુરી તોમર અને વિજય કલહંસ વિરુદ્ધ પોલીસ ફરિયાદ નોંધાવી છે.

માધુરી તોમરે બોગસ ડિગ્રીનાં આધારે 57 મહિના નોકરી કરી જેનાં કારણે શિક્ષણ વિભાગ પર સવાલ ઉભા થઈ રહ્યાં છે. તો આ મામલામાં જિલ્લા શિક્ષણાધિકારીની સાંઠગાંઠ હોવાની શંકા ઊભી થઈ રહી છે કેમકે, અન્ય રાજ્યની ડિગ્રી હતી તો પણ માત્ર ડીઈઓ કચેરીથી વેરિફાઈ કરીને નોકરી આપી દેવામાં આવી અને હવે પાંચ વર્ષ બાદ એ જ ડિગ્રીની તપાસ કમિશનર ઓફિસથી કરાવવામાં આવે છે. આ તમામ બાબતો શિક્ષણજગતમાં ચાલતા સગાવાદ સામે આંગળી ચીંધી રહી છે. હવે જોવાનું એ રહેશે ઘરમાં સમાધાન સાથે જ  ડિગ્રી સાચી બની જશે કે પછી સગાવાદની આડમાં નોકરી કરતા અનેક શિક્ષકો પર સરકાર આકરી બનશે?