રહસ્યમય ઘટના / આણંદના વધુ એક ગામની સીમમાં અવકાશી પદાર્થ પડતા ઘેટાનું મૃત્યુ, જુઓ શું કહી રહ્યાં છે વૈજ્ઞાનિકો

• ફરી આણંદની કાસોર ગામની સીમમાં પડયો અવકાશી પદાર્થ
• અવકાશી પદાર્થ ઘેટા ઉપર પડતા ઘેટાનું મૃત્યુ
• અગાઉ ઉમરેઠમાં અવકાશી ગોળા પડવાની બની હતી ઘટના

ફૂટબોલની સાઈઝથી થોડા મોટા અને બંને તરફ વેલ્ડીંગ કરાયેલ ગોળાએ સૌ કોઇમાં કુતૂહલતા જગાવી છે. ત્યારે આણંદ જિલ્લામાં અલગ-અલગ ત્રણ સ્થળ પરથી ગોળા જેવો અવકાશી પદાર્થ મળી આવ્યા બાદ હવે આણંદની કાસોર ગામની સીમમાં વધુ એક અવકાશી પદાર્થ મળી આવતા સૌ કોઇ ચોંકી ગયા છે. ફૂટપટ્ટી આકારનો એક અવકાશી પદાર્થ ઘેટા ઉપર પડતા ઘેટાનું મૃત્યુ થયું છે. અગાઉ ઉમરેઠમાં પણ અવકાશી ગોળા પડવાની ઘટના બની હતી.

તમામ લોકો સવાલ કરી રહ્યાં છે કે આ તો વળી શું હશે?

જો કે, આકાશમાંથી એક ગોળો જમીન પર પડી આવતા તમામ લોકો સવાલ કરી રહ્યાં છે કે આ તો વળી શું હશે? રોજ ગામમાં પડતા ગોળાને લઇને લોકોના મનમાં અનેક સવાલો થાય છે કે આખરે આ અવકાશી ગોળો શું હશે? આકાશમાંથી કેમ આવા ગોળી પડી રહ્યા છે ? ક્યાંક એલિયનની તો કોઇ વાત નથી ને?

જો કે તમને જણાવી દઇએ કે, અવકાશી પદાર્થને લઇને ખગોળવિદ દિવ્યદર્શન પુરોહિતનું નિવેદન સામે આવ્યું છે. ખગોળવિદે અનુભવના આધારે અવકાશી પદાર્થ અંગે નિષ્કર્ષ કાઢતા કહ્યું છે કે અવકાશી પદાર્થ કોઇ માનવનિર્મિત પદાર્થ હોઇ શકે છે. અવકાશી પદાર્થ ફિશિંગ ઓબ્જેક્ટ કે હિલિયમ પ્રેસરાઇઝ વેસલ હોઇ શકે છે. અવકાશી પદાર્થ અંગે તેના પરના લખાણ, મેલ્ટિંગ પોઇન્ટ અને મટિરિયલ પરથી જાણી શકાય પણ હાલ તો અવકાશી પદાર્થને લઇને કોઇ નિષ્કર્ષ પર આવવું મુશ્કેલ છે.

આકાશમાંથી ગોળા, રોકેટમાંથી પાર્ટ છુટા પડ્યાની ચોંકાવનારી પ્રાથમિક માહિતી

આણંદ જિલ્લામાં અલગ અલગ ત્રણ સ્થળ પરથી ગોળા જેવો અવકાશી પદાર્થ મળી આવ્યા બાદ આજે ખેડા જિલ્લામાંથી પણ ગોળા જેવો પદાર્થ મળ્યો હતો. બે જિલ્લામાંથી અલગ અલગ જગ્યાએથી શંકાસ્પદ પદાર્થ મળી આવતાં તંત્રએ ઈસરોની મદદ લેવાનો નિર્ણય કર્યો છે. પ્રાથમિક તપાસમાં આ પદાર્થ સેટેલાઈટમાંથી છૂટો પડેલો ભાગ હોવાનું અનુમાન છે. ભૂમેલ ગામમાં અક્ષર પોલ્ટ્રી ફાર્મ પાસેથી મળી આવેલ આકાશી ગોળો ચકલાસી પોલીસ દ્વારા FSLમાં મોકલી આપી વધું તપાસ હાથ ધરવામાં આવી છે.

ગોળાની જાણકારી માટે પોલીસ દ્વારા ઈસરોની લેવાશે મદદ

આણંદ જિલ્લાના ઉમરેઠ તાલુકાના શીલી, ખાનકૂવા અને દાગજીપુરા બાદ નડિયાદ નજીક ભૂમેલ ગામમાં આવી ઘટનાઓ  બનતાં લોકોમાં કુતૂહલ સાથે ભયનો માહોલ જોવા મળી રહ્યો છે. છેલ્લા ત્રણ દિવસથી આકાશમાંથી વરસી રહેલા ગોળા જેવા શંકાસ્પદ પદાર્થની તપાસ માટે પોલીસ દ્વારા  ઈસરોની મદદ લેવાનો નિર્ણય કરાયો છે. ઈસરોની તપાસ બાદ શંકાસ્પદ પદાર્થના રહસ્ય પરથી પડદો ઊંચકાય તેવી શક્યતા છે.

શું છે સમગ્ર મામલો?

સમગ્ર ચરોતર પંથકમાં છેલ્લા ત્રણ-ચાર દિવસથી અવકાશમાંથી રાત્રિ સમયે ગોળા જેવો પદાર્થ પડવાની ઘટનાઓ બની રહી છે. આણંદ જિલ્લા બાદ ગત રાત્રે ખેડા જિલ્લામાં પણ આવી ઘટના બની હતી. નડિયાદ તાલુકાના ભૂમેલ ગામની સીમમાં આવેલા પોલ્ટ્રી ફાર્મના ખુલ્લા વિસ્તારમાં ગત રાત્રે લગભગ બે-અઢી વાગ્યાની આસપાસ એક ગોળાકાર જેવો પદાર્થ અહીં ખાબક્યો હતો.‌ મધરાત બાદ ધડામ કરતો અવાજ આવતાં અક્ષર પોલ્ટ્રી ફાર્મમા સૂઇ રહેલા મહેન્દ્ર પટેલ ઊંઘમાંથી ઉઠી ગયા હતા. દરવાજો ખોલી જોતાં ખુલ્લામાં એક ગોળાકાર પદાર્થ પડ્યો હતો. જેમાંથી ધુમાડો પણ નીકળતો હતો. વહેલી સવારે મહેન્દ્ર પટેલેએ આ વાતની જાણ ગામના સરપંચને કરી હતી, આથી સરપંચે ઘટનાસ્થળે જઇ ચકલાસી પોલીસને જાણ કરી હતી.પ્રાથમિક તપાસમાં આ પદાર્થ સેટેલાઈટમાંથી છૂટો પડેલો ભાગ હોવાનું અનુમાન છે.