રાજ્યના અનેક જિલ્લાઓમાં મેઘરાજાની ધમાકેદાર એન્ટ્રી થઇ છે. ત્યારે નર્મદા, તાપી સહિતની અનેક નદીઓ છલોછલ થઇ ગઇ છે. રાજ્યના ખેડા જિલ્લામાં પણ ભારે વરસાદથી શેઢી નદી બે કાંઠે વહી રહી છે જેથી આસપાસના ગામોમાં પાણી ઘુસ્યા છે. નીચાણવાળા વિસ્તારોને અલર્ટ કરાયા છે.
આજે વહેલી સવારથી ખેડા જિલ્લામાં ભારે વરસાદ વરસી રહ્યો છે. ગળતેશ્વર, ઠાસરા, નડિયાદ, મહેમદાવાદ, ડાકોર, ખેડા, મહુધા, કઠલાલ અને કપડવંજમાં વરસાદ વરસી રહ્યો છે. ત્યારે નદીઓમાં પાણીની આવક થતા નીચણવાળા વિસ્તારોમાં પુરની સ્થિતિ સર્જાઇ છે.
શેઢી નદીમાં પાણીની આવક થતા લાટ ગામનો સંપર્ક કપાયો
ગળતેશ્વર અને ઠાસરા તાલુકા સાથે ઉપરવાસમાં બારે મેઘ ખાંગા થતા શેઢી નદીમાં અચાનક ભારે પાણી આવ્યા હતા. જેને લઇ ઠાસરા તાલુકાના પીપલવાડાથી દીપકપુરા અને હિંમતનગર લાટ ગામનો સંપર્ક કપાઈ ગયો છે અને હજુ પણ શેઢી નદીમાં પાણી ની આવક વધી રહી છે સાથે ભારે વરસાદ થાથાવત રહેવાને કારણે પુરની પરિસ્થિતિ ઉભી થઇ છે.
નીચાણવાળા ગામોને સાવધ રહેવા સૂચના
ગળતેશ્વર તાલુકાના વાડદ ગામમાં પણ પાણી ફરી વળ્યા છે. જેમાં ૬૪ કેવીનું સબ સ્ટેશન બેટમાં ફેરવાયું છે તો વડાદ ગામની શાળા અને દેરી પણ પાણીમાં ગરકાવ થઇ ગઈ છે. હાલ તો તંત્ર દ્વારા શેઢી નદીના નીચાણવાળા ગામોને સાવધ રહેવા સૂચના આપવામાં આવી છે ત્યારે હજુ પણ ભારે વરસાદ યથાવત રહેતા સ્થાનિકોમાં ચિંતાનું મોજું ફરી વળ્યું છે.
ખેડા ગળતેશ્વરમાં શાળામાં પાણી ભરાયા
ગળતેશ્વરમાં ભારે વરસાદના પગલે ગામમાં પાણી પાણી થઈ ગયું છે. ત્યારે શાળામાં પાણી ભરાતા વિદ્યાર્થીઓને રજા અપાઈ. ભારે વરસાદથી શેઢી નદીના જળ સ્તરમાં સતત વધારો થઈ રહ્યો છે. નદીના સ્તરમાં વધારો થતા લોકોમાં ચિંતા વધી રહી છે.
નડિયાદમાં ધોધમાર વરસાદ
નડિયાદમાં 4 ઇંચ જેટલો વરસાદ વરસ્યો છે. નડિયાદમાં નીંચાણવાળા વિસ્તારોમાં પાણી ભરાયા છે. જેમાં નાના કુંભનાથ રોડ, શ્રેયસ ગરનાળા, ખોડિયાર માતા ગરનાળા, માઇમાતા ગરનાળા, કોલેજ રોડ વિસ્તારોમાં પાણી ભરાયા છે.
SDRFની ટીમ ખડેપગે
ખેડા જિલ્લામાં ભારે વરસાદના પગલે SDRFની ટીમ સ્ટેન્ડબાય થઇ છે. નડિયાદના એસ.આર.પી કેમ્પમાં SDRFની ટીમને તૈનાત કરાઇ છે. કોઈપણ પરિસ્થિતિને પહોંચી વળવા નડિયાદ ફાયરની ટીમ ખડેપગે છે.
કલેક્ટર દ્વારા લોકોને સાવચેત રહેવા અપાઈ સૂચના
ખેડાના 10 તાલુકામાં વરસાદ થતા તંત્ર અલર્ટ થયુ છે. મહેમદાવાદ, ડાકોર, ઠાસરા, ખેડા, મહુધા, કઠલાલ, કપડવંજ અને ગળતેશ્વરમાં વરસાદ વરસી રહ્યો છે. ભારે વરસાદની આગાહીને લઈને કલેક્ટર દ્વારા લોકોને સાવચેત રહેવા સૂચના અપાઈ છે. નીચાણવાળા વિસ્તારોમાં રહેતા લોકોને સલામત સ્થળે ખસેડવાના આદેશ અપાયા છે.