SHE Team / અમદાવાદમાં મહિલાઓનો પીછો કરનારા રોમિયોની હવે ખેર નથી, પોલીસનો આ એક્શન પ્લાન

શહેરમાં જેમ જેમ ભીડભાડ વધી રહી છે તેમ તેમ અસામાજિક તત્વોનો ત્રાસ પણ વધી રહ્યો છે. ચેઈન સ્નેચિંગથી માંડીને છેડતીના બનાવો વધી રહ્યા છે. ખાસ કરીને શહેરના ધમધમતા રોડ પર કે સોસાયટીઓના સૂનકારસ્તા પર એકલ દોકલ મહિલાઓની છેડતીના બનાવો વધી રહ્યા છે. તો શહેરના શાળા, કોલેજો કે શૈક્ષણિક પરિસરોના ગેટ પર અસામાજિક તત્વોના અડ્ડાઓ વધી રહ્યા છે. આ સંજોગોમાં મહિલાઓ અને સગીર વયની કન્યાઓની સુરક્ષા અંગે એક નવીજ સામાજિક ચિંતા ઊભી થઈ છે.

રાજ્યના પોલીસ વિભાગે મહિલાસુરક્ષા અંગેની આ ચિંતા દૂર કરવા માટે શી-ટીમની રચના કરી દીધી છે. આ ટીમ હાલ પ્રાયોગિક ધોરણે શહેરના ઝોન 1 અને ઝોન 7માં કાર્યરત થઈ  ગઈ છે. 

આ ટીમ સ્પેશિયલ જેકેટ સાથે સજ્જ

હાલ પ્રાયોગિક ધોરણે શહેરના ઝોન 1 અને ઝોન 7ના 15 પોલીસ મથકોમાં આ ટીમ કાર્યરત કરવામાં આવી છે. પ્રત્યેક ટીમમાં મહિલા પોલીસમાંથી 1 પીએસઆઈ, 4 મહિલા પોલીસકર્મી અને 2 પુરુષ પોલીસ કર્મી એમ કુલ સાત પોલીસકર્મીની ટીમ બનાવવામાં આવી છે. આ શી-ટીમે શહેરના જાહેર માર્ગો પર થતી મહિલાની છેડતી અટકાવવા અને ગુનેગારોને ઝડપી પાડવા માટે કામગીરી શરૂ કરી દીધી છે. શી ટીમ પીડિત મહિલા સુધી પહોંચી શકે તે માટે ફરિયાદ પેટી પણ મુકવામા આવશે અને જેના દ્વારા છેડતીની ફરિયાદો મળતાં પોલીસ કાર્યવાહી કરશે. શી-ટીમના મહિલા પોલીસકર્મીને હાલ તો ખાખી ડ્રેસ આપવામાં આવ્યા છે. પરંતુ નજીકના ભવિષ્યમાં આ ટીમ સ્પેશિયલ જેકેટ સાથે સજ્જ હશે. આ ટીમને બીજી શું મળશે સુવિધા સાંભળો પોલીસ અધિકારી પાસેથી...  

મહિલાઓનો બદ ઈરાદે પીછો કરનારા તત્વો થશે ઝબ્બે

હાલ આ શી-ટીમ પ્રાયોગિક ધોરણે કામે લાગી ગઈ છે. જો કે, તે હાલ તો શી-ટીમની મહિલા પોલીસકર્મી ફિલ્ડમાં સાદા ડ્રેસમાં જાય છે. તેમનું માનવું છે કે, સાદા ડ્રેસમાં પોતે હોવાથી ગુનેગારોને સરળતાથી ઝડપી શકાશે અને મહિલાઓ તથા સગીર કન્યાઓ પણ પોલીસ સાથે પણ ડર અને સંકોચ વગર પોતાની વાત રજૂ કરી શકશે. શી-ટીમના પોલીસકર્મીઓ હાલ જાહેરભીડભાડ વાળા સ્થળ જેવા કે મોલ મલ્ટિપ્લેકસમાં આવા ગુનેગાર તત્વો પર નજર રાખી રહી છે. મહિલાઓનો બદઈરાદે પીછો કરનારા તત્વોને ઝબ્બે કરવા સજ્જ બની છે.

પોલીસની નજર સામે જ ગુનાને અંજામ અપાય છે

એ વાતમાં કોઈ શંકા નથી પોલીસકર્મીઓ પોતાની ફરજ નિષ્ઠાપૂર્વક બજાવી રહ્યા છે. પરંતુ પોલીસે નિયમોના બંધનમાં રહીને કામ કરવાનું હોય છે અને ગુનેગારોને નિયમોનું કોઈ બંધન હોતું નથી. વળી, એવા પણ કિસ્સા ઓછા નથી જ્યાં પોલીસની નજર સામે જ ગુનાને અંજામ અપાઈ રહ્યો હોય અને પોલીસ મૂકપ્રેક્ષક બની રહીને જોતી રહી હોય. આ સંજોગોમાં ગુનેગારોને જબ્બે કરવા પોલીસની આ પહેલ કેટલી કારગત નીવડે છે તે જોવું રહ્યું.