અધ્યક્ષપદ / મોટા નેતા તેમની તરફ, કાર્યકર્તા મારી પડખે: થરૂરે દાવા સાથે કહ્યું, ચોંકાવનારા હશે અધ્યક્ષની ચૂંટણીના પરિણામ

• કોંગ્રેસના આગામી અધ્યક્ષ માટે લડાઈ
• દિગ્ગજ બે નેતાઓની બયાનબાજીઓ 
• શશી થરૂરે કહ્યા પોતાના આવનાર પ્લાન્સ

દેશની સૌથી જૂની રાજકીય પાર્ટી કોંગ્રેસનો આગામી અધ્યક્ષ કોણ હશે તે અંગે નિર્ણય લેવાનો સમય હવે ખૂબ નજીક છે. કોંગ્રેસના નવા પ્રમુખની પસંદગી માટે 17 ઓક્ટોબરે મતદાન થવાનું છે અને 19 ઓક્ટોબરે મતગણતરી બાદ પરિણામ આવશે. કોંગ્રેસ અધ્યક્ષની ચૂંટણીની તારીખ જેમ જેમ નજીક આવી રહી છે તેમ તેમ પ્રમુખ પદ માટેના બંને ઉમેદવારો શશિ થરૂર અને મલ્લિકાર્જુન ખડગે પોતપોતાના પક્ષમાં ડેલિગેટ્સ મેળવવા માટે સખત પ્રયાસ કરી રહ્યા છે.

કોંગ્રેસ પાર્ટીમાં પરિવર્તન લાવવા માંગું છું: થરુર
કોંગ્રેસ અધ્યક્ષની ચૂંટણીને લઈને શશિ થરૂરે મોટું નિવેદન આપ્યું છે. તેમણે કહ્યું છે કે જેઓ પરિવર્તન ઈચ્છે છે તેઓએ મને જીતાડવો જોઈએ. શશિ થરૂરે એમ પણ કહ્યું કે જે લોકો એવું વિચારે છે કે પાર્ટીમાં બધું બરાબર છે, તેમણે મને મત ન આપવો જોઈએ. તેમણે એમ પણ કહ્યું હતું કે 2014 અને 2019ની ચૂંટણીમાં જે મતદારો મતદાનથી દૂર ગયા હતા તેઓએ આવવું જોઈએ. હું કોંગ્રેસ પાર્ટીમાં પરિવર્તન લાવવા માંગુ છું.

કાર્યકર્તા મારી સાથે છે: થરુર
શશિ થરૂરે મીડિયા સાથે વાત કરતા કહ્યું કે મોટા નેતાઓ તે તરફ જોઈ રહ્યા છે પરંતુ કાર્યકર્તાઓ મારી સાથે છે. તેમણે કહ્યું કે કોંગ્રેસ અધ્યક્ષની ચૂંટણીના પરિણામો ચોંકાવનારા હોઈ શકે છે. શશિ થરૂરે નેહરુ-ગાંધી પરિવારની ઈચ્છાથી લઈને મોહર્રમ પર મલ્લિકાર્જુન ખડગેના નાચવાના નિવેદન સુધી દરેક મુદ્દા પર પોતાનો અભિપ્રાય વ્યક્ત કર્યો.

શશી થરૂરે પાર્ટીનું પુનર્ગઠન કરવાનું કહ્યું
કોંગ્રેસના અધ્યક્ષ પદના ઉમેદવાર શશિ થરૂરે કહ્યું કે હું પેરાશૂટથી આવ્યો નથી. તેઓ રાજ્યસભા અને લોકસભાની ચૂંટણીમાં ત્રણ વખત જીત્યા છે. તેમણે ટોણો માર્યો હતો કે તેઓ 2019ની ચૂંટણીમાં પણ જીત્યા હતા જ્યારે મલ્લિકાર્જુન ખડગે ચૂંટણી હારી ગયા હતા. શશિ થરૂરે કોંગ્રેસ અધ્યક્ષ તરીકે ચૂંટાયા બાદ પાર્ટીનું પુનર્ગઠન કરવાની તેમની યોજના વિશે પણ વાત કરી હતી.

મેનિફેસ્ટો પણ બહાર પાડ્યા હતા
નોંધપાત્ર રીતે, શશિ થરૂર કોંગ્રેસ અધ્યક્ષ પદની ચૂંટણીમાં દિગ્ગજ નેતા મલ્લિકાર્જુન ખડગેને સખત ટક્કર આપતા જોવા મળે છે. શશિ થરૂર અલગ-અલગ રાજ્યોની મુલાકાત લઈને પ્રતિનિધિઓ સાથે મુલાકાત કરી રહ્યા છે. શશિ થરૂરે તાજેતરમાં કોંગ્રેસ અધ્યક્ષની ચૂંટણી માટેના મેનીફેસ્ટો પણ બહાર પાડ્યા હતા. શશિ થરૂરની સતત જાહેરાતો પછી, મલ્લિકાર્જુન ખડગે પણ સક્રિય મોડમાં આવ્યા અને રાજ્યોની મુલાકાત લીધી અને પ્રતિનિધિઓને મળ્યા, તેમજ પ્રમુખ તરીકે ચૂંટાયા પછી 50 વર્ષથી ઓછી વયના નેતાઓને સંગઠનમાં 50 ટકા પોસ્ટ્સ આપવાના વચન આપ્યા હતા.