અઠવાડિયાના છેલ્લા દિવસે શેરબજારમાં મોટો કડાકો જોવા મળ્યો છે. 1000થી પણ વધારે પોઈન્ટના કડાકાના કારણે દુનિયાભરના શેરબજારમાં હાહાકાર મચ્યો છે. પળવારમાં રોકાણકારોને કરોડો રૂપિયાનું નુકસાન થયું છે. સવારે 9.34 મિનિટે બોમ્બે સ્ટોક એક્સચેન્જનો પ્રમુખ ઈન્ડેક્સ સેન્સેક્સ 1044.18 અંક એટલે કે 2.63 ટકાના ઘટાડા બાદ 38,686.68ના સ્તરે પહોંચ્યો છે. જ્યારે નિફ્ટી 301. 60 અંક એટલે કે 2.59 ટકાના ઘટાડા બાદ 11,331.60ના સ્તરે પહોંચી ચૂક્યો છે.
શુક્રવારે સેન્સેક્સમાં મોટો કડાકો
કોરોના વાયરસની અસર શેરબજારમાં વર્તાઈ
1000થી વધુ અંકના ઘટાડા બાદ સેન્સેક્સ 38,686.68 એ પહોંચ્યો
ચીનની બહાર પણ કોરોના વાયરસ ફેલાઈ જવાના કારણે વૈશ્વિક શેરબજારમાં ઘટાડો જોવા મળી રહ્યો છે. આ કારણે રોકાણકારો રૂપિયા રોકવાનું ઘટાડી રહ્યા છે. છેલ્લા 6 દિવસથી બજારમાં સતત ઘટાડો જોવા મળી રહ્યો છે. અમેરિકાના શેર માર્કેટ 2008 પછી સૌથી નીચા સ્તરે પહોંચ્યો છે. ડાઉ જોંસમાં એક દિવસમાં સૌથી મોટો એટલે તે 1,191 અંકનો ઘટાડો જોવા મળ્યો છે. તેમાં 4 ટકાનો ઘટાડો જોવા મળ્યો છે. દક્ષિણ કોરિયા, ઈટલી અને ઈરાનમાં પણ આ વાયરસનો પ્રભાવ જોવા મળ્યો છે. અમેરિકાની અર્થવ્યવસ્થા પર પણ તેનો પ્રભાવ પડે તેવી શક્યતા જણાઈ રહી છે.
વિકાસ દરના અનુમાનથી બજારમાં કડાકો
ચાલુ નાણાકીય વર્ષની ક્ષિમાહીમાં પણ વિકાસ દર 4.5 ટકા પર સ્થિર રહ્યો હતો. એસબીઆઈના સરકારી આંકડા અનુસાર આ અનુમાન રાખવામાં આવી રહ્યું છે. શુક્રવારે જીડીપી ગ્રોથ રેટના આંકડા જાહેર થશે. તેના કારણે પમ શેર માર્કેટમાં ઘટાડો જોવા મળી રહ્યો છે.
આવી રહી પ્રમુખ શેરની સ્થિતિ
પ્રમુખ શેરની વાત કરીએ તો આજે લગભગ દરેક કંપનીના શેર રેડ ઝોનમાં ખૂલ્યા હતા. મુખ્ય 9 રેડ ઝોનના શેરમાં ટેક મહિન્દ્રા, ટાટા મોટર્સ, યસ બેંક, જેએસડબલ્યૂ સ્ટીલ, વેદાંતા લિમિટેડ, ટાટા સ્ટીલ, ગેલ, ઈંફ્રાટોલ અને ઓએનજીસી સામેલ છે.
સેક્ટોરિયલ ઈન્ડેક્સ પર નજર
સેક્ટોરિયલ ઈન્ડેક્સ પર નજર કરીએ તો આજે દરેક સેક્ટર્સ રેડ ઝોનમાં ખૂલ્યા છે. તેમાં પીએસયૂ બેંક, આઈટી, ફાર્મા, પ્રાઈવેટ બેંક, ઓટો, રિયલ્ટી, મીડિયા, એફએમસીજી અને મેટલ સામેલ છે.
પ્રી ઓપન સમયે આવી રહી શેરમાર્કેટની સ્થિતિ
પ્રી ઓપન સમયે સવારે 9.12 મિનિટે શેરમાર્કેટ રેડ ઝોનમાં ખૂલ્યું, સેન્સેક્સ 658.19 અંક એટલે કે 1.66 ટકાના ઘટાડા બાદ 38,686.68ના સ્તરે રહ્યો. જ્યારે નિફ્ટી 251.30 અંક એટલે કે 2.16ના ઘટાડા સાથે 11,382ના સ્તરે રહ્યો.
ડોલરની સરખામણીએ 71.65ના સ્તરે ખૂલ્યો રૂપિયો
ડોલરની સરખામણીએ આજે રૂપિયામાં મોટો ઘટાડો જોવા મળ્યો છે. આજે રૂપિયો 38 પૈસાના ઘટાડા બાદ 71.93ના સ્તરે ખૂલ્યો હતો. છેલ્લા કારોબારી દિવસે ડોલરની સરખામણીએ રૂપિયો 71.55ના સ્તરે બંધ થયો હતો.
ગુરુવારે પણ રેડ ઝોનમાં બંધ થયું હતું બજાર
ગુરુવારે શેરબજાર રેડ ઝોનમાં બંધ થયું હતું. સેન્સેક્સ 143.30 અંક એટલે કે 0.36 ટકાના ઘટાડાની સાથે 39,745.66ના સ્તરે બંધ થયું હતું. નિફ્ટી 45.20 અંક એટલે કે 0.39 ટકાના ઘટાડાની સાથે 11,633.30 ના સ્તરે બંધ થયું હતું.
કોરોના વાયરસનો પ્રકોપના કારણે રોકાણકારો થયા સાવધ
કોરોના વાયરસનો પ્રકોપ હવે ચીનની બહાર દક્ષિણ કોરિયા, ઇટાલી, ઈરાન જેવા દેશોમાં ફેલાયો છે અને ઝડપથી ફેલાઈ રહ્યો છે. આ ફાટી નીકળવાનો ભય ફરીથી વિશ્વભરના શેરબજારોમાં પ્રભુત્વ ધરાવે છે. આને કારણે રોકાણકારો શેરબજારથી દૂર રહીને સોના, બોન્ડ જેવા સલામત સાધનોમાં રોકાણ કરી રહ્યા છે. ગુરુવારે એશિયન શેરબજારોમાં ફરી ઘટાડો જોવા મળ્યો.