સાઉદી ઓઇલ કંપની અરામકો પર થયેલા ડ્રોન હુમલાની અસર આજે ઘરેલુ શેરબજાર પર સતત બીજા દિવસે પણ જોવા મળી રહી છે. બપોરે 2 વાગ્યા બાદ સેન્સેક્સમાં 670 પોઇન્ટથી વધુનો ઘટાડો જોવા મળ્યો. હાલ સેન્સેક્સ 36,500ની આસપાસ કારોબાર કરતો દેખાઇ રહ્યો છે. આ પ્રકારે નિફ્ટીમાં 150 પોઇન્ટથી વધારેનો ઘટાડો નોંધાયો.
સાઉદી ઓઇલ કંપની અરામકો પર હુમલાની શેરબજાર પર જોવા મળી અસર
ડોલર સામે રૂપિયો ૨૩ પૈસા તૂટીને ૭૧.૮૨ની સપાટીએ ખૂલ્યો
સરકારના નિર્ણયની નથી દેખાઇ રહ્યી અસર
સેન્સેક્સ અને નિફ્ટીમાં ઘટાડાનો ટ્રેન્ડ ચાલુ રહ્યો છે. આ લખાઇ રહ્યું છે ત્યારે સેન્સેક્સ 36500 પર અને નિફ્ટી 10850 પર ટ્રેડ કરી રહી છે. વૈશ્વિક સ્તરે ક્રૂડમાં આવેલ ઉછાળાની રોકાણકારોના સેન્ટિમેન્ટ પર જબરજસ્ત અસર જોવા મળી રહી છે.
બેન્ક નિફ્ટીમાં અડધા ટકાનો ઘટાડો જોવા મળ્યો છે. આજના ટ્રેડિંગમાં આઇટી, ફાઇનાન્શિયલ અને પ્રાઇવેટ બેન્ક શેરમાં ઘટાડો જોવા મળ્યો છે. એચસીએલ ટેક, એક્સિસ બેન્ક અને એચડીએફસીમાં સૌથી વધુ ઘટાડો જોવા મળ્યો છે, જોકે વેદાંતામાં 2 ટકાની તેજી જોવા મળી છે. યસ બેન્ક અને એશિયન પેઇન્ટ્સના શેરમાં લેવાલી જોવા મળી રહી છે. સ્ટેટ ટ્રેડિંગ કોર્પોરેશનના શેરમાં ૧૭ ટકા જેટલો ઘટાડો જોવા મળ્યો છે. ઓટો, મેટલ, ફાર્મા, મીડિયા અને રિયલ્ટી ઇન્ડેક્સ ગ્રીન ઝોનમાં નજરે પડે છે.
રૂપિયો ૨૩ પૈસા તૂટ્યો
રૂપિયાની શરૂઆત આજે મોટા ઘટાડા સાથે થઈ હતી. ડોલર સામે રૂપિયો ૨૩ પૈસા તૂટીને ૭૧.૮૨ની સપાટીએ ખૂલ્યો છે. ગઇ કાલે પણ ડોલર સામે રૂપિયો ૬૮ પૈસા તૂટીને ૭૧.૫૯ની સપાટીએ બંધ રહ્યો હતો. આમ, ક્રૂડ ઓઈલમાં ઉછાળાને કારણે રૂપિયા પર દબાણ જારી છે.
નથી દેખાઇ રહ્યી સરકારના નિર્ણયની અસર
સાઉદી અરબના બે ક્રૂડ ઓઇલના પ્લાન્ટ પર ડ્રોનથી હુમલાને કારણે રોકાણકારોમાં ડરનો માહોલ બની ગયો છે. આ કારણે વેચવાલી જોવા મળી રહી છે. જોકે, ગત શનિવારે મંદ પડતી અર્થવ્યવસ્થાને ગતિ આપવા માટે સરકારની તરફથી ઘણા એલાન કરાયા હતા. પરંતુ તેનો બજારને ફાયદો મળ્યો નથી.