ભારતીય શેયર બજાર માટે ગુરુવારનો દિવસ સારો ન રહ્યો. સપ્તાહના ચોથા દિવસે સેન્સેક્સમાં 463 પોઇન્ટના કડાકા સાથે 37018 પર બંધ રહ્યો. જ્યારે નિફ્ટીની વાત કરીએ તો 137 પોઇન્ટ ઘટાડા સાથે 10980ના સ્તરે પહોંચી ગયો. કારોબાર દરમિયાન સેન્સેક્સ અને નિફ્ટી 6 મહીનાના નીચલા સ્તરે પંહોચી ગયા. સેન્સેક્સ 5 મહીનાના નીચલા સ્તરે બંધ રહ્યો.
બીએસઇ ઇન્ડેક્સના સેન્સેક્સમાં ઘટાડાને કારણે રોકાણકારોને 1.45 લાખ કરોડ રૂપિયાનું ધોવાણ થયું છે. કારોબારના અંતે વેદાંતા શેયર 5 ટકાથી વધારે તુટીને બંધ રહ્યો. આ જ પ્રકારે ટાટા મોટર્સ, એસબીઆઇ અને એરટેલના શેયરમાં પણ 4 ટકાથી વધારેનો ઘટાડો નોંધવામાં આવ્યો છે. આ ઉપરાંત યસ બેંક, ઇન્ફોસિસ, ટાટા સ્ટીલ, અને એલએન્ડટી શેયરમાં 2 ટકાનો ઘટાડો થયો.
શું છે કારણ
અમેરિકી ફેડ વ્યાજદરોમાં ઘટાડાનું કારણે ભારતીય બજારો પર તેની અસર રહી. ઉપરાંત રેટિંગ એજન્સી ક્રિસિલ દ્વારા જીડીપી ગ્રોથના અનુમાન ઘટાડવાને કારણે પણ બજારમાં સુસ્તી જોવા મળી. ક્રિસિલે જીડીપી ગ્રોથનું અનુમાન 0.20 ટકા ઘટાડ્યું છે.
કેફે કોફી ડેમાં 42 ટકાનો ઘટાડો
કેફે કોફી ડે (CCD) નાથી કોફી ચેન ધરાવતી કંપની કોફી ડે એન્ટરપ્રાઇઝના શેયર્સમાં ઘટાડાનું વલણ યથાવત છે. ગુરુવારે કંપનીના શેયર 12 ટકા ટુટી ગયા હતા. ત્રણ દિવસોમાં બીએસઇ (BSE)માં કંપનીના શેયરમાં 42 ટકાનો ઘટાડો જોવા મળ્યો છે.
ગુરુવારે કારોબારના અંતે કોફી ડે એન્ટરપ્રાઇઝના શેયર 110.95 રૂપિયાના ભાવે બંધ રહ્યા. કંપનીના ચેરમેન વી.જી.સિદ્ધાર્થ સોમવારે લાપતા થયા બાદ કંપનીના શેયર્સમાં ઘટાડો જોવા મળ્યો. સિદ્ધાર્થનો શબ બુધવારે સવારે મળી આવ્યો હતો.