વડાપ્રધાન નરેન્દ્ર મોદીની આગેવાનીમાં ગુરુવારે નવી સરકારની રચના થઇ છે. નવી સરકારની રચના બાદ ભારતીય શેર બજારની ઐતિહાસિક શરૂઆત થઇ. સપ્તાહના અંતે સેંસેક્સ 40 હજારને પાર ખુલ્લો. આપને જણાવીએ કે આ ભારતીય શેર બજારના ઇતિહાસમાં પહેલીવાર છે કે જ્યારે સેન્સેક્સની આવી શરૂઆત થઇ હોય.
વાત કરીએ નિફ્ટીની તો ખુલતાની સાથે જ નિફ્ટી 12000ને ક્રોસ કરી ગયો. નિફ્ટી 59 આંકની તેજી સાથે 12000ના સ્તર પર જોવા મળ્યો. આ પહેલા 23 મેએ એનડીએને બહુમત મળ્યાના સમાચાર બાદ શેર બજારે આ સ્તરને ટચ કર્યો હતો. ચૂંટણી પરિણામ વાળા દિવસે એટલે કે 23 મે સેન્સેક્સ 40124 પોઇન્ટ પહોંચી ગયો હતો. જે અત્યાર સુધીનો રેકોર્ડ છે.
શરૂઆતની સાથે જ કોલ ઇન્ડિયામાં સૌથી વધુ 3.32 ટકા તેજી જોવા મળી. આ રીતે એશિયન પેન્ટ, ભારતી એરટેલ, એચસીએલ અને એલએન્ડટી ઉપરાંત ટીસીએસના શેરમાં 1 ટકાથી વધુના વધારા સાથે ચાલી રહ્યા હતા. આ વચ્ચે ઓએનજીસીના શેર 1 ટકા તુટી ગયા છે. જેનું કારણ ઓએનજીસીનો નેટ પ્રોફિટ માર્ચ પૂર્ણ થતા ફોર્થ ક્વાર્ટરમાં 31 ટકા ઘટીને 4045 રૂપિયા પર આવી ગયો. કંપનીને ફોર્થ ક્વાર્ટર દરમિયાન ઉત્પાદનમાં ઘટાડા સાથે કિંમતમાં પણ આવેલા ઘડાટાને પગલે નુકશાન વેઠવું પડ્યું છે. કંપની મુજબ, જાન્યુઆરી-માર્ચ 2019માં ફોર્થ ક્વાર્ટર નેટ પ્રોફિટ ગત વર્ષની તુલનામાં 5915 કરોડ રૂપિયા સાથે ઘટીને 4045 કરોડ રૂપિયા રહી ગયો. ઓનજીસી ઉપરાંત, એનટીપીસી, મહિન્દ્રા એન્ડ મહિન્દ્રા, રિલાયન્સ અને એચયૂએલના શેર ઘટાડા સાથે કારોબાર કરતા જોવા મળ્યા.
કોલ ઇન્ડિયા કંપનીનો લાભ માર્ચ 2019માં સમાપ્ત ક્વાર્ટરમાં ચાર ગણો વધુ વધી 6024.2 કરોડ રૂપિયા થઇ ગયો. વધુ વેચાણ અને ઓછા ખર્ચને કારણે કંપનીના નફામાં વધારો નોંધાયો છે.