રશિયા અને યુક્રેન વચ્ચે યુદ્ધ શરુ ડાઉન થયેલા ભારતીય શેરબજારે શુક્રવારે શરુઆતી ટ્રે઼ડિંગમાં રિકવરી કરી
શેરમાર્કેટમાં જોરદાર રિકવરી
સેન્સેક્સમાં 1100 અંકનો વધારો
સ્થાનિક શેરબજારમાં શરુઆતી ટ્રેડિંગમાં રિકવરી
રશિયા અને યુક્રેન વચ્ચે યુદ્ધ શરુ થતા ઉંધા માથે પછડાયેલા બજારે શુક્રવારે શરૂઆતી ટ્રેડિંગમાં રિકવરી કરી હતી. સ્થાનિક શેરબજારમાં શુક્રવારે શરૂઆતી ટ્રેડિંગમાં રિકવરી જોવા મળી હતી. રશિયા પર નવા પ્રતિબંધો લાદવામાં આવ્યા બાદ ગુરુવારે અમેરિકી બજારો મજબૂત રહ્યા હતા. સ્થાનિક બજારને પણ વૈશ્વિક બજારના વલણોથી ટેકો મળી રહ્યો છે. જોકે, રોકાણકારો પર હજુ પણ દબાણ યથાવત જોવા મળ્યુ છે.મહત્વનું છે કે છેલ્લા સપ્તાહથી સ્થાનિક શેરબજારમાં ઘટાડાનો દોર ચાલી રહ્યો છે. આજની શરૂઆતી રિકવરી પહેલા સ્થાનિક બજાર સતત 7 દિવસથી ખોટમાં છે. એક દિવસ પહેલા જ બજારમાં બે વર્ષનો સૌથી મોટો ઘટાડો જોવા મળ્યો હતો.
પ્રી-ઓપન સેશનથી જ બજાર લીલુંછમ હતું. પ્રી-ઓપન સેશનમાં સેન્સેક્સ 800 પોઈન્ટ સુધી ચઢ્યો હતો. સિંગાપોર એક્સચેન્જ પર NSE ફ્યુચર્સ લગભગ 1.50 ટકા વધ્યા હતા. બજાર ખુલતાની સાથે જ BSE સેન્સેક્સ 811 પોઈન્ટથી વધુ વધીને 55,350 પોઈન્ટ પર પહોંચી ગયો હતો. NSEએ પણ એ જ તર્જ પર 1.74 ટકાના વધારા સાથે 16,500નો આંકડો પાર કર્યો હતો.
માર્કેટમાં ટૂંક સમયમાં જોરદાર રિકવરી
થોડા જ સમયમાં માર્કેટમાં વધુ રિકવરી જોવા મળી હતી. સવારે 09:40 વાગ્યે સેન્સેક્સ 1150 પોઈન્ટથી વધુના વધારા સાથે 55,700 પોઈન્ટની નજીક પહોંચી ગયો હતો. નિફ્ટી પણ 2.30 ટકાથી વધુ વધીને 16,600 ની સપાટી વટાવી હતી. આજે સ્થાનિક બજારને વૈશ્વિક વલણથી સમર્થન મળી રહ્યું છે. આ ઉપરાંત બજારમાં નીચા સ્તરની ખરીદીથી પણ મદદ મળી રહી છે.
એશિયન બજારો તેજીનો માહોલ
યુક્રેન પર ગઈકાલે થયેલા હુમલા બાદ યુએસ માર્કેટમાં ભારે વોલેટિલિટી જોવા મળી હતી. પહેલા તો માર્કેટમાં જોરદાર ઘટાડો થયો હતો, પરંતુ જ્યારે અમેરિકા અને અન્ય દેશોએ રશિયા સામે નવા પ્રતિબંધોની જાહેરાત કરી ત્યારે અમેરિકી શેરબજારમાં તેજી આવી. અંતે બજાર ઉછળીને બંધ થયું. આનાથી એશિયન બજારોને ટેકો મળ્યો અને આજે મોટાભાગના એશિયન બજારો તેજીમાં છે. જાપાનનો નિક્કી શરૂઆતના વેપારમાં 1.4 ટકા સુધર્યો હતો. એ જ રીતે દક્ષિણ કોરિયાનો કોસ્પી 1.2 ટકા અને હોંગકોંગનો હેંગસેંગ 0.2 ટકા સુધર્યો હતો.
યુદ્ધનું ઔપચારિક એલાન થતા માર્કેટ તૂટ્યુ હતું
રશિયાના રાષ્ટ્રપતિ વ્લાદિમીર પુતિને યુક્રેન સામે યુદ્ધની ઘોષણા કરતા ગુરુવારે બજાર કકડભૂસ થયુ હતું. સેન્સેક્સે 1300 પોઈન્ટથી વધુના ભારે ઘટાડા સાથે કારોબારની શરૂઆત કરી. દિવસના કારોબારમાં સેન્સેક્સ 2700 પોઈન્ટથી વધુ તૂટ્યો હતો. બજાર બંધ થયું ત્યારે સેન્સેક્સ 2,702.15 પોઈન્ટ (4.72 ટકા) ઘટીને 54,529.91 પર અને નિફ્ટી 815.30 પોઈન્ટ (4.78 ટકા)ના ઘટાડા સાથે 16,247.95 પર હતો. ભારતીય શેરબજારમાં આ એક દિવસનો સૌથી મોટો ઘટાડો હતો. અગાઉ માર્ચ 2020માં કોવિડને કારણે બજારમાં આવો ઘટાડો જોવા મળ્યો હતો.