સ્ટોક માર્કેટ ઓપનિંગ / માર્કેટમાં ધમાકેદાર તેજી: સેન્સેક્સ 57 હજારને પાર, નિફ્ટીએ પણ લગાવી છલાંગ

• ભારતીય શેરબજારમાં આજે તેજી
• સેન્સેક્સ ફરી 57 હજારને પાર
• નિફ્ટી પણ 17,097 એ ખુલ્યો

ભારતીય શેરબજારે બુધવારના સવારે વધારા સાથે કારોબારની શરૂઆત કરી હતી. વૈશ્વિક બજારના સકારાત્મક સંકેતોના આધારે સેન્સેક્સ ફરી 57 હજારને પાર ચાલ્યો ગયો છે તો નિફ્ટીમાં પણ ઉછાળો જોવા મળ્યો.

સેન્સેક્સે 149 પોઈન્ટના વધારા સાથે 57,125 પર ખુલીને ટ્રેડિંગ શરૂ કર્યું

સવારના કારોબારમાં સેન્સેક્સે 149 પોઈન્ટના વધારા સાથે 57,125 પર ખુલીને ટ્રેડિંગ શરૂ કર્યું હતું. નિફ્ટી પણ 28 પોઈન્ટના વધારા સાથે 17,097 પર ખુલ્યો અને ટ્રેડિંગ શરૂ થયું. LIC IPOની રાહ જોઈ રહેલા રોકાણકારોએ થોડા સમય બાદ વેચાણ શરૂ કર્યું અને બંને એક્સચેન્જ લાલ નિશાનની નજીક આવી ગયા. તમને જણાવી દઇએ કે, સવારે 9.27 વાગ્યે સેન્સેક્સ 17 પોઈન્ટના વધારા સાથે 56,992 પર અને નિફ્ટી 5 પોઈન્ટના વધારા સાથે 17,073 પર ટ્રેડ કરી રહ્યો હતો.

જાણો આજે રોકાણકારો ક્યાં દાવ અજમાવશે?

રોકાણકારોએ શરૂઆતના વેપારમાં જ બ્રિટાનિયા ઈન્ડસ્ટ્રીઝ, ઓએનજીસી, ટાટા મોટર્સ, બજાજ ઓટો, ટાટા સ્ટીલ, આઈટીસી, એક્સિસ બેંક, ઈન્ફોસિસ, મારુતિ અને પાવર ગ્રીડ કોર્પ જેવી કંપનીઓના શેર પર સટ્ટો લગાવવાનું શરૂ કર્યું હતું. આ કારણે આ સ્ટોક્સ ટોપ ગેનરની શ્રેણીમાં આવ્યાં. બીજી તરફ Hindalco Industries, અપોલો હોસ્પિટલ્સ, ભારતી એરટેલ, શ્રી સિમેન્ટ્સ અને એચડીએફસી લાઈફમાં વેચાણ શરૂ થઇ ગયું અને આ કંપનીઓના શેર ટોપ લુઝર બની ગયા. આ કંપનીઓના શેરમાં લગભગ 2 ટકાનો મોટો ઘટાડો જોવા મળ્યો હતો.

શું છે અમેરિકા અને યુરોપીય બજારોની હાલત?

અમેરિકામાં ફેડ રિઝર્વ પોતાના વ્યાજ દરોમાં 22 વર્ષમાં સૌથી મોટો વધારો કરશે. અગાઉ રોકાણકારો સાવધ દેખાઈ રહ્યાં છે, પરંતુ વ્યાજમાં વધારાને કારણે ફુગાવો અંકુશમાં આવવાની અપેક્ષાએ બજારને સકારાત્મક સંકેત મળ્યા છે. આ જ કારણ છે કે, અમેરિકાના મુખ્ય સ્ટોક એક્સચેન્જ Nasdaq છેલ્લાં ટ્રેડિંગ સેશનમાં 0.22 ટકાનો ઉછાળો જોવા મળ્યો હતો.

યુરોપિયન બજારોમાં પણ તેજીનું વાતાવરણ હતું અને તમામ મોટા એક્સચેન્જો વધારા પર બંધ રહ્યાં હતા. જર્મનીના શેરબજારમાં 0.72 ટકા અને ફ્રાન્સના શેરબજારમાં 0.79 ટકાનો ઉછાળો જોવા મળ્યો. એ સિવાય લંડન સ્ટોક એક્સચેન્જ પણ 0.22 ટકાના વધારા સાથે બંધ થયો હતો.

એશિયન બજારોમાં મિશ્ર વલણ

એશિયાના મોટા ભાગના બજારોમાં આજે સવારના કારોબારમાં મિશ્ર વલણ જોવા મળ્યું હતું. સિંગાપોર સ્ટોક એક્સચેન્જ 0.63 ટકાના વધારા સાથે ટ્રેડ થઈ રહ્યો હતો, જ્યારે તાઈવાન 0.52 ટકા અને કોસ્પી 0.05 ટકાના વધારા સાથે ટ્રેડ થઈ રહ્યો હતો. જો કે, આજે સવારના કારોબારમાં જ હોંગકોંગ શેરબજારમાં 0.59 ટકાનો ઘટાડો જોવા મળ્યો છે.