રાજકારણ / UPAની કમાન સોંપાઈ શકે છે શરદ પવારને, પ્રથમ વખત હશે કોઈ બિનકોંગ્રેસી

• વિપક્ષી રાજકારણમાં મોટા બદલાવની તૈયારી
• UPAના અધ્યક્ષ બની શકે છે શરદ પવાર
• હાલમાં UPAના ચેઅરપર્સન છે સોનિયા ગાંધી

કોંગ્રેસની આગેવાનીવાળા વિપક્ષોના ગંઠબંધન UPAમાં બદલાવની તૈયારી

એક તરફ દેશના ખેડૂતો સરકારના નવા કાયદાઓ સામે વિરોધ કરી રહ્યા છે એવામાં વિપક્ષનું રાજકારણ પણ બદલાવા જઈ રહ્યું છે. રાજકારણમાં હવે શરદ પવાર કેન્દ્રની રાજનીતિમાં આવે તે મુદ્દે ચર્ચા થઇ રહી છે. નોંધનીય છે કે આ હાલમાં જ ખેડૂતોના આંદોલન મુદ્દે બધા નેતાઓએ રાષ્ટ્રપતિને મળવા જવું જોઈએ તેની પણ આખી રણનીતિ શરદ પવારે જ બનાવી હતી. 

રાહુલ ગાંધી UPAનો ચહેરો હશે જ્યારે અધ્યક્ષ શરદ પવાર હશે

કેન્દ્રમાં મોદી સરકાર બન્યા બાદથી UPAની બધી પાર્ટીઓ વિભાજીત થઇ ગઈ હતી અને એકતાની કમી જોવા મળી છે. એક તરફ જ્યાં કેન્દ્રમાં શાસન કરી રહેલ NDAમાંથી વિવિધ ઘટકદળો છૂટા પડી રહ્યા છે ત્યાં હવે UPAમાં બધી પાર્ટીઓ એક થાય અને નવી શરૂઆત કરે તેવી યોજના પર કામ કરવામાં આવી રહ્યું છે. દિલ્હીના રાજકારણમાં જે ચર્ચા ચાલી રહી છે તે અનુસાર UPAના ચેરપર્સન તરીકે શરદ પવારની વરણી થઇ શકે છે જ્યારે રાહુલ ગાંધી આ આખા ગઠબંધનનો ચહેરો રહેશે. મહારાષ્ટ્રમાં ભાજપ સામે બધી પાર્ટીઓને ભેગી કરવામાં શરદ પવારનો જ ફાળો હતો. 

શરદ પવાર મહારાષ્ટ્રમાં થયા હતા હિટ 

સૂત્રો અનુસાર જ્યારે હાલમાં જ સોનિયા ગાંધીને કહેવામાં આવ્યું હતું કે વિપક્ષનો નવો મોરચો બનાવવો જોઈએ ત્યારે સોનિયાએ કહ્યું હતું કે અત્યારે આ કામ માત્ર શરદ પવાર જ કરી શકે છે. નોંધનીય છે કે હાલમાં મહારાષ્ટ્રમાં ઉદ્ધવ ઠાકરેની સરકાર ચાલી રહી છે જેમાં શિવસેના કોંગ્રેસ અને એનસીપી ભેગા થઈને સરકાર ચલાવી રહ્યા છે.  મુખ્યત્વે આ પાર્ટીઓની વિચારધારા એક સરખી નથી છતાં સરકાર બનાવવામાં સફળ રહેલા શરદ પવારને હવે કેન્દ્રમાં સરકાર સામે લડવા માટે મેદાનમાં ઉતારવામાં આવે તેવી શક્યતા છે.  

રાષ્ટ્રીય કોંગ્રેસના નવા અધ્યક્ષની નિમણૂંક થાય પછી થશે તમામ બદલાવો

નોંધનીય છે કે અત્યાર સુધી UPAમાં કોંગ્રેસનો દબદબો હતો અને કોંગ્રેસી નેતા જ UPA ચેરપર્સન બનતા પરંતુ અત્યારે કોંગ્રેસ પોતે પોતાના અધ્યક્ષ શોધવામાં ગોથા ખાઈ રહી છે. સોનિયા ગાંધી કાર્યકારી અધ્યક્ષ છે અને રાહુલ ગાંધીને અધ્યક્ષ બનવું નથી, એવામાં માનવામાં આવી રહ્યું છે કે નવા અધ્યક્ષ નિમાઈ જાય પછી UPAમાં ફેરફાર થશે. 

UPAમાં છે કોણ-કોણ?

કોંગ્રેસ, DMK, RJD, NCP, JMM, IUML, MDMK, JKNC, RSP, VCK, AIUDF