આમ ખટ્ટે હૈ / ચૂંટણી પહેલા અમરેલી ભાજપમાં મોટી તિરાડ, રૂપાલાના નજીકના મનાતા નેતાએ AAPની પકડી વાટ, કહ્યું ભાજપ તાનાશાહની પાર્ટી છે

• વિધાનસભાની ચૂંટણી અગાઉ અમરેલી જિલ્લામાં ભાજપને ઝટકો
• જિલ્લા ભાજપના પૂર્વ પ્રમુખ શરદ લાખાણી AAPમાં જોડાયા
• ભાજપ એટલે પ્રાઈવેટ લિમિટેડ કંપની: શરદ લાખાણી

ગુજ્રરાત વિધાનસભા-2022ની ચુંટણી પૂર્વે લગભગ તમામ પાર્ટીઓએ પોતાના સમીકરણો ગોઠવવા શરુ કરી દીધા છે.ત્યારે કેન્દ્રિય મંત્રી પરસોત્તમ રૂપાલાના અમરેલીમાં ભાજપમાં ભડકો થયો છે.  છેલ્લા 28-30 વર્ષથી ભાજપ માટે દિવસ-રાત એક કરનારા શરદ લાખાણીએ ગઈકાલે જ આમ આદમી પાર્ટીમાં જોડાવાની જાહેરાત સોશિયલ મીડિયા મારફત કરી દીધી હતી. જિલ્લા ભાજપના પૂર્વ પ્રમુખ શરદ લાખાણીએ  મહેશ સવાણીની હાજરીમાં AAPનો ખેસ ધારણ કર્યો છે. સાથે જ જિલ્લા યુવા ભાજપના પૂર્વ પ્રમુખ મુકેશ તેરૈયા પણ AAPમાં જોડાયા છે. જેના પડઘા કમલમ-ગાંધીનગર સુધી પડ્યા હોય તેવું દેખાઈ રહ્યું છે. વિધાનસભાની ચૂંટણી અગાઉ અમરેલી જિલ્લામાં ભાજપને મોટો ઝટકો પડ્યો છે તેવું વિશેષજ્ઞો માની રહ્યા છે. 

ભાજપના શાસકો તાનાશાહ છેઃ શરદ લાખાણી
28 વર્ષ કેસરિયા કર્યો બાદ શરદ લાખાણીએ આપનું ઝાડુ પકડતા જ ભાજપ પર આરોપોની ઝડી વરસાવી હતી. AAPમાં જોડયા બાદ શરદ લાખાણીનું નિવેદન આપતા કહ્યું હતું કે ભાજપથી કોઈ મોહભંગ નથી થયો, જનતાની પીડા જોઇને AAPમાં જોડાયો છું. આ સાથે ભાજપ પર મોટો આરોપ લગાવતા ભાજપના  શાસકો તાનાશાહ હોવાનો દાવો કર્યો છે. તેમજ ભાજપ પાર્ટીને પ્રાઈવેટ લિમિટેડ કંપની સાથે સરખાવી છે. વિધાનસભા ચૂંટણી પહેલા અમરેલી ભાજપમાં મોટા ડખાના એધાણ વર્તાઇ રહ્યા છે. 

ઉલ્લેખનીય છે કે,શરદ લાખાણી થોડા સમયથી ભાજપ પ્રત્યેની નારાજગી સોશિયલ મીડીયાના માધ્યમથી વ્યક્ત કરી રહ્યા હતા. એટલું જ નહિ અલગ-અલગ મોરચે સરકારની વિફળતાને પણ ઉજાગર કરી રહ્યા હતા. અમરેલી જીલ્લા પંચાયત અને પાર્ટીમાં અમરેલી પ્રમુખ રહી ચુકેલા શરદ લાખાણીએ પંથકમાં પક્ષનું પ્રભુત્વ જમાવવા ભારે જહેમત ઉઠાવી હતી.વિધાનસભા ચુંટણીને એક વર્ષની વાર છે ત્યારે,અમરેલીમાંથી પાર્ટી માટે ઉઠેલો નારાજગીનો સૂર અમરેલી પુરતો જ રહે છે કે તેની દૂરોગામી અસર પણ જોવા મળશે? તેવો ગણગણાટ સામાન્ય કાર્યકર્તાઓમાં  ચાલી રહ્યો છે.તાજેતરમાં જ કેન્દ્રિય મંત્રી પરસોત્તમ રૂપાલા જનઆશિર્વાદ યાત્રા માટે આવ્યા હતા.હવે અમરેલી ભાજપના પૂર્વ પ્રમુખ શરદ લાખાણીનું આ પગલું,રાજ્યમાં ભાજપ માટે કેવી અસર છોડશે તે તો આગળના સમયમાં જ ખબર પડશે પણ હાલ ભાજપમાંથી આપ અને આપમાંથી ભાજપમાં જોડાવાના ખેલ શરૂ થઈ ગયા છે બંને પાર્ટીઓ એકબીજાની વિકેટ ખેરવી પોતાનો દમ બતાવી રહી હોય તેવું સ્પષ્ટ દેખાઈ રહ્યું છે.