રાજકારણ / BIG NEWS: લોકસભા ચુંટણી પહેલા કોંગ્રેસનો મોટો દાવ, શક્તિસિંહ ગોહિલ ગુજરાત કોંગ્રેસના નવા અધ્યક્ષ

• ગુજરાત કોંગ્રેસનું સુકાન શક્તિસિંહ ગોહિલના હાથમાં
• શક્તિસિંહ ગોહિલ ગુજરાત કોંગ્રેસના નવા અધ્યક્ષ બન્યા

ગુજરાત કોંગ્રેસને લઈ ફરી એકવાર મોટા સમાચાર સામે આવ્યા છે. વાત જાણે એમ છે કે, છેલ્લા કેટલાય દિવસોથી ચાલતી ચર્ચાનો અંત આવ્યો છે, ગુજરાત કોંગ્રેસને નવા પ્રદેશ પ્રમુખ મળ્યા છે. વિગતો મુજબ કોંગ્રેસ પ્રદેશ પ્રમુખ પદ માટે ગુજરાતના જાણીતા ચેહરો નામ સામે આવ્યું છે. ગુજરાત કોંગ્રેસનું સુકાન શક્તિસિંહ ગોહિલને સોંપવામાં આવ્યું છે.

હાઈકમાન્ડે ગુજરાત પ્રદેશ પ્રમુખની નિમણૂક કરી
ગુજરાત કોંગ્રેસને નવા પ્રદેશ પ્રમુખ મળ્યા છે. મહત્વનું છે કે, ગુજરાત કોંગ્રેસના અગ્રણી નેતાઓ દિલ્હી દરબારમાં પહોંચ્યા હતા, જ્યાં હાઈકમાન્ડે ગુજરાત પ્રદેશ પ્રમુખની નિમણૂક કરી છે. નોંધનીય છે કે, ગુજરાતના કોંગી નેતાઓની હાઇકમાન્ડ સાથે મહત્વની બેઠક થઈ હતી. આ બેઠકને લઈ જગદીશ ઠાકોર, અમિત ચાવડા, અર્જુન મોઢવાડીયા, શક્તિસિંહ ગોહિલ, ભરતસિંહ સોલંકી સહિતના નેતાઓ દિલ્હીમાં હાજર રહ્યાં હતાં. 

શક્તિસિંહ ગોહિલની રાજકીય કારકિર્દી
તેઓ હાલ રાજ્યસભાના સાંસદ છે તેમજ AICCના રાષ્ટ્રીય પ્રવક્તા પણ છે. 1991 થી 1995 દરમિયાન સરકારના વિવિધ વિભાગ સંભાળ્યા હતા તેમજ નાણાં, આરોગ્ય, શિક્ષણ, નર્મદા વિભાગના મંત્રી તરીકે રહી ચુક્યા છે. 2007થી 2012 સુધી વિધાનસભામાં વિપક્ષના નેતા રહી ચુક્યા છે તેમજ 1989માં ગુજરાત રાજ્ય યુવા કોંગ્રેસના મહાસચિવ પણ રહી ચૂક્યા છે. શક્તિસિંહનો જન્મ 4 એપ્રિલ 1960માં ભાવનગર જિલ્લાના લિમડા ગામે થયો હતો. લિમડાના શાહી પરિવારના તે મોટા પુત્ર છે. શક્તિસિંહે બીએસસી, એલએલએમ, કોમ્પ્યૂટરમાં ડિપ્લોમા અને પત્રકારત્વમાં ડિપ્લોમા કર્યું છે. ગોહિલ 1986માં ભાવનગર જિલ્લા યુવા કોંગ્રેસ પાર્ટીના અધ્યક્ષ હતા અને 1989માં ગુજરાત રાજ્ય યુવા કોંગ્રેસના મહાસચિવ પણ રહી ચૂક્યા છે.

શક્તિસિંહ ગોહિલનું નોલેજ તેમનો પ્લસ પોઈન્ટ છે
શક્તિસિંહ ગોહિલે સ્થાનીક ચૂંટણી લડી ભાવનગર જિલ્લા પંચાયતના ઉપાધ્યક્ષ બન્યા હતી. 1990માં તે એઆઇસીસીના સદસ્ય બન્યા અને અહીંથી જ તેમની રાજકીય કારર્કિર્દીની શરૂઆત થઇ. કોંગ્રેસના બહુ ઓછા નેતા છે જે ટેકનિકલ વાતોના પણ માહિતગાર છે અને ભાષા પર પણ સારી પકડ હોય. શક્તિસિંહને આવા જ એક કોંગ્રેસી નેતા છે જે સજાગ પણ છે અને સ્માર્ટ પણ.

શક્તિસિંહ ગોહિલને પ્રમુખ બનવાના કારણો શું હોઈ શકે
કોંગ્રેસના રાજ્યસભાના સંસદ 
કોંગ્રેસ હાઇકમાન્ડ સાથે નિકટના સબંધ 
સંગઠન ઉપર સારી પકડ 
કોંગ્રેસના ધારદાર વક્તા 
કોંગ્રેસની સરકારમાં માજી મંત્રી અને નેતા વિપક્ષ પણ રહી ચુક્યા છે 
2 વાર પ્રધાન, 2 રાજ્યોના પ્રભારી અને સફળ રાજકીય રણનીતિકાર છે શક્તિસિંહ ગોહિલ, 34 વર્ષથી રાજકારણમાં

લોકસભાની ચૂંટણીને લઈ હાઇકમાન્ડ એક્શનમાં 
ગુજરાત વિધાનસભાની ચૂંટણીમાં કારમી હાર અને સત્ય શોધક કમિટીના રિપોર્ટમાં ગુજરાત કોંગ્રેસના કેટલાક નેતાઓએ ટિકિટનો વેપલો કર્યો હોવાનું સામે આવતા હાઇકમાન્ડ એક્શનમાં આવી છે. જેને લઈ કોંગ્રેસના પ્રદેશ પ્રમુખ બદલ્યા હોવાની માહિતી છે. મહત્વનું છે કે, અમિત ચાવડાની નેતા વિપક્ષ તરીકે નિમણુંક બાદ અધ્યક્ષ બદલવાનું નક્કી હતું. એક તરફ કોંગ્રેસ પાટીદાર ચેહરાને પ્રદેશ અધ્યક્ષ બનાવે તેવી શક્યતા હતી પરંતું અનુભવ અને સિનિયરની રેસમાં શક્તિસિંહ હતા જેમને પ્રમુખ બનાવાયા છે. 

દિપક બાબરિયાને સોંપાઈ જવાબદારી
કોંગ્રેસ હાઈકમાન્ડે દિપક બાબરિયાને દિલ્હી અને હરિયાણાના પ્રભારી બનાવાયા છે અત્રે તમને જણાવી દઈએ કે, બાબરિયા આ પહેલા પણ મધ્યપ્રદેશના પ્રભારી રહી ચૂક્યા છે તેમજ કર્ણાટકના યુવા નેતા મન્સૂર અલી ખાન તેલંગાણાના સહ-પ્રભારી તરીકે નિયુક્ત થયા છે અને વર્ષા ગાયકવાડની મુંબઈ કોંગ્રેસના અધ્યક્ષ તરીકે નિમણૂક કરવામાં આવી છે.

દિપક બાબરીયા કેમ જવાબદારી સોંપાઈ
સંગઠનનો મોટો અનુભવ 
મધ્યપદેશમાં પ્રભારી તરીકેની નિભાવી ચુક્યા છે જવાબદારી 
દીપક બાબરીયા ગાંધી પરિવારના ખાસ નજીકના નેતા ગણાય છે
બાબરીયા કોંગ્રેસ હાઈકમાન્ડના નજીકના વ્યક્તિ 
કર્ણાટકમાં મુખ્‍યમંત્રીનું કોકડુ ઉકેલવા કોંગ્રેસે ગુજરાતના દિપક બાબરીયાને જવાબદારી સોંપાઈ હતી 
મધ્ય પ્રદેશમાં કોંગ્રેસની સરકાર બની કમલનાથ CM બન્યા ત્યારે બાબરીયા હતા પ્રભારી