રિઝર્વ બેન્ક ઓફ ઈન્ડિયાના ગવર્નર શક્તિકાંત દાસે બુધવારે કહ્યું કે દેશમાં ડીજીટલ પેમેન્ટને પ્રોત્સાહન આપવા માટે RBI યુપીઆઈ આધારિત ફીચર ફોન પ્રોડક્ટ લોન્ચ કરવાના પ્રયાસ કરી રહ્યું છે. જો હકીકતમાં આ વસ્તુ શક્ય છે તો નિશ્ચિત રીતે દેશમાં ડીજીટલ પેમેન્ટના ગ્રાફમાં સારો વધારો થઇ શકે છે.
RBI ડીજીટલ પેમેન્ટને પ્રોત્સાહન આપવા વધુ એક પ્રયાસ કરશે
યુપીઆઈ આધારિત ફીચર ફોન પ્રોડક્ટ લોન્ચ કરવાના પ્રયાસ
જો આ શક્ય થશે તો ડીજીટલ પેમેન્ટના ગ્રાફમાં વધારો થશે
દેશમાં ફીચર ફોનનો ઉપયોગ કરનારા લોકોની સંખ્યા વધુ
મહત્વનું છે કે અત્યારે દેશમાં ફક્ત સ્માર્ટફોન યુઝર જ યૂપીઆઈ દ્વારા ડીજીટલ પેમેન્ટ કરવામાં સક્ષમ છે, જ્યારે ફીચર ફોનમાં આ પ્રકારની પેમેન્ટ કરવાની કોઈ સુવિધા આપવામાં આવી નથી. ટ્રાઈ મુજબ, ભારતમાં કુલ મોબાઈલ ફોન યુઝરની સંખ્યા 118 કરોડ છે. જેમાંથી 74 કરોડ યુઝર સ્માર્ટ ફોનનો ઉપયોગ કરે છે. જેનો સીધો અર્થ એ છે કે દેશમાં ફીચર ફોનનો ઉપયોગ કરનારા લોકોની સંખ્યા વધુ છે.
દેશમાં સરેરાશ 44 કરોડ લોકો ચલાવે છે ફીચર ફોન
ટ્રાઈ મુજબ, આખા દેશમાં 44 કરોડ લોકો ફીચર ફોનનો ઉપયોગ કરે છે. એટલેકે જો દેશમાં 44 કરોડ લોકો ઈચ્છે તો પણ ડીજીટલ પેમેન્ટ કરી શકતા નથી. RBI ની ઈચ્છા છે કે જે લોકોની પાસે ફીચર ફોન છે, તેઓ પણ સ્માર્ટફોન યૂઝરની જેમ સરળતાથી યુપીઆઈ પેમેન્ટ કરી શકે.
અત્યારે ફીચર ફોનમાં નથી ડિજીટલ પેમેન્ટની સુવિધા
દેશમાં ઉપયોગમાં લેવામાં આવતા ફીચર ફોન બેસિક કેટેગરીના મોબાઈલ ફોન હોય છે. જેનાથી ફક્ત વોઈસ કોલ અને ટેકસ્ટ મેસેજ કરી શકાય છે. આ સિવાય હવે ભારતમાં કેટલાંક એવા ફીચર ફોન પણ છે, જેમાં ઈન્ટરનેટની મદદથી મર્યાદિત સંસાધનોનો ઉપયોગ કરી શકાય છે. પરંતુ દેશમાં અત્યાર સુધી કોઈ એવો ફીચર ફોન આવ્યો નથી. જેના દ્વારા યુપીઆઈ પેમેન્ટ કરી શકાય. તેથી આરબીઆઈનો પ્રયાસ છે કે ટૂંક સમયમાં દેશમાં આવી પ્રોડક્ટ લોન્ચ કરવામાં આવશે. જેનાથી ફીચર ફોન યુઝર પણ યુપીઆઈ પેમેન્ટની સાથે જોડાઈને દેશને ડીજીટલ બનાવવાની દિશામાં આગળ વધે.