નવસારીના જમાલપોરમાં આવેલ શક્તિ મલ્ટી કો.ઓ.હા.સો.લિ. નામની ખાનગી બેંક રાતોરાત બંધ થઇ જતા ખળભળાટ મચ્યો હતો. ખાનગી બેંકના સંચાલકોએ રાતોરાત બેંક બંધ કરી દેતા ખાતેદારોએ જમાલપોર પોલીસ ચોકીએ હોબાળો મચાવ્યો હતો. મહત્વનું છે કે, બેંકના સંચાલક સહિત પાંચ જેટલા લોકો મહારાષ્ટ્રની જેલમાં છેલ્લા છ મહિનાથી સજા કાપી રહ્યા છે.
બેંકના સંચાલકો હાલ મહારાષ્ટ્રની જેલમાં
4500થી વધુ ખાતાધારકો હતા બેંકના
અંદાજિત 75 કરોડ રૂપિયા લોકોના ડૂબ્યા
જમાલપોર CNG પેટ્રોલપંપની સામે બે વર્ષ પહેલા શક્તિ મલ્ટી કો.ઓ.હા.સો.લિ. બેંક શરૂ થઈ હતી. બેંક સંચાલક દ્વારા ઊંચા વ્યાજની લાલચ આપતા લોકોને ખાતા ખોલાવ્યા હતા. સંચાલકે રોકાણ કરવા જણાવ્યું હતું અને લોકોએ વિશ્વાસ પણ કર્યો હતો. નવસારી જિલ્લામાં ચાર તાલુકામાં 4500થી વધુ ખાતેદારો હતા. આ તમામ ખાતાધારકોએ અંદાજીત 75 કરોડ રૂપિયા જેટલી બેંકમાં જમા કરાવી હતી. ત્યારે બેંકે ગતરોજ અચાનક બેંકનાં પાટીયા ઉતારી દેતા અને સામાન લઈને બેંક બંધ કરી દેતા ખાતેદારો સ્થળે દોડી આવ્યા હતા. બેંકની સામે જ આવેલી પોલીસ ચોકીમાં અરજી આપી ડૂબેલા નાણા પરત કરાવવા ખાતેદારોએ જણાવ્યું હતું.
બેંકની જગ્યા પર હતી નાસ્તાની દુકાન
27 જાન્યુઆરીની રાત્રીએ બેંકના સંચાલકો બેંક બંધ કરીને ફરાર થઇ ગયા હતા. રાતોરાત બેંકના પાટીયા ગાયબ થઇ ગયા હતા. બીજા દિવસે સવારે જ્યારે ખાતાધારકો પૈસા ભરવા અને ઉપાડવા માટે બેંક પર આવ્યા તો બેંકનું ઉઠામણું થઇ ગયું હોવાની માહિતી મળી હતી. અહીં બેંકની જગ્યા પર નાસ્તાની દુકાન જોવા મળી હતી. આ વાત વાયુવેગે ફેલાતા બેંકની બહાર મોટી સંખ્યામાં ખાતાધારકો એકઠા થઇ ગયા અને ત્યારબાદ તમામ લોકોએ જમાલપોર પોલીસ ચોકી પર જઈને હોબાળો કર્યો હતો.
બેંકના સંચાલકો 6 મહિનાથી છે જેલમાં
જોકે આ મામલે પોલીસે તપાસ હાથ ધરી છે. મળતી માહિતી અનુસાર, શક્તિ મલ્ટી કો.ઓ.હા.સો.લીના મુખ્ય ભેજાબાજ હેમંત જામલે અને તેના અન્ય 5 સાગરીતો હાલ છેતરપિંડીનાં ગુનામાં છેલ્લા 6 મહિનાથી મહારાષ્ટ્રની જેલની સજા કાપી રહ્યા છે.