તારકમહેતા કા ઉલ્ટા ચશ્માના વધુ એક કલાકારે શૉમાંથી એક્ઝિટ લેવાનું મન બનાવ્યું. તેઓ એક મહિનાથી શૂટિંગ પર ન ગયા હોવાની ચર્ચા
શૈલેષ લોઢા છોડી રહ્યા છે શૉ ?
એક મહિનાથી નથી કરી રહ્યા શૂટિંગ
તારક મહેતા કા ઉલ્ટ ચશ્મા શૉ ક્વિટ કર્યાની ચર્ચા
તારક મહેતા કા ઉલ્ટા ચશ્મા. આ એક એવો શો છે જે ઘર ઘરમાં ફેમસ બન્યો છે. તેના દરેક પાત્રો કોઇને કોઇ રીતે આપણા અંગત જીવનમાં જોવા મળે જ છે. દરેકના જીવનને લગતી વાતો હસી ખુશી સાથે દર્શાવીને એક સારો મેસેજ આપનારી આ સિરિયલના લાખો લોકો દિવાના છે. જેઠાલાલ, ભીડે, રોશન, પોપટલાલ આ બધા પાત્રોને જોવાની તમને મજા આવતી હશે. પરંતુ આ શોમાંથી એક બાદ એક કલાકારની એક્ઝિટ થઇ રહી છે. દિશા વાકાણી, નેહા મહેતા, ગુરુ ચરણસિંહ અને હવે વધુ એક કલાકાર શોને અલવિદા કહેશે તેવા સમાચારો સામે આવ્યા છે.
શૈલેષ લોઢા છોડશે તારક મહેતા ?
જી, હા તારક મહેતાકા ઉલ્ટા ચશ્માના તારક મહેતા આ શો છોડી શકે છે તેમ જાણવા મળ્યું છે. એક ખાનગી ટીવીના રિપોર્ટ અનુસાર વર્ષોથી આ શૉ સાથે જોડાયેલા શૈલેષ લોઢાએ આ શો ક્વિટ કરવાનો નિર્ણય લીધો છે. તેમણે આ લોકપ્રિય શોને અલવિદા કહેવાનું મન બનાવી લીધું છે. સૂત્રોના હવાલા પ્રમાણે મળતી જાણકારી મુજબ સામે આવ્યું છે કે શૈલેષ લોઢા છેલ્લા 1 મહિનાથી શો માટે શૂટિંગ કરી રહ્યા નથી. શોમાં પરત ફરવાનો પણ તેમનો કોઈ ઈરાદો નથી.
શું શૈલેષ મેકર્સથી છે નારાજ ?
સુત્રો જણાવે છે કે શૈલેષ લોઢા તેમના કોન્ટ્રાક્ટથી ખુશ નથી. તેમને લાગે છે કે શોમાં તેમની તારીખોનો સારી રીતે ઉપયોગ કરવામાં આવતો નથી. શૈલેષે તારક મહેતા કા ઉલ્ટા ચશ્મા છોડવાનું બીજું કારણ એવું કહેવામાં આવી રહ્યું છે કે શોને કારણે પ્રતિભાશાળી કલાકારો અન્ય તકો શોધી શકતા નથી. તાજેતરના સમયમાં શૈલેષ લોઢાએ અસંખ્ય ઑફરો ઠુકરાવી દીધી છે. પરંતુ હવે શૈલેષ તેને મળેલા બીજા પ્રોજેક્ટને ગુમાવવા માંગતા નથી.
શૈલેષ લોઢાને સમજાવવાનો પ્રયાસ કરી રહ્યા છે
પ્રોડક્શન હાઉસ શૈલેષ લોઢાને મનાવવા અને શોમાં પાછા લાવવાનો પૂરો પ્રયાસ કરી રહ્યું છે. પરંતુ એવું લાગે છે કે શૈલેષ લોઢાએ પોતાનું મન બનાવી લીધું છે કે તે શોમાં પાછા નહીં આવે. શૈલેષે શોને અલવિદા કહ્યું તે અંગે હજુ સુધી કોઈ સત્તાવાર માહિતી સામે આવી નથી. તેમજ મેકર્સ તરફથી પણ કોઈ પ્રતિક્રિયા આવી નથી. એ વાત ચોક્કસ છે કે શૈલેષ લોઢાની વિદાયને કારણે મેકર્સ માટે શોની શૂન્યતા ભરવી ખૂબ મુશ્કેલ હશે. ચાહકો માટે પણ આ મોટો ફટકો હશે.
જેઠાલાલના પાકા મિત્ર લેશે વિદાય ?
શૈલેષ લોઢા શરૂઆતથી જ આ શો સાથે છે. તે શોના સૌથી મહત્વપૂર્ણ પાત્રોમાંથી એક છે. તેનો રોલ લોકો સાથે જોડાય છે અને તેને તારકના પાત્રમાં શૈલેષ લોઢા ગમે છે. જેઠાલાલ એટલે કે દિલીપ જોશી સાથે શૈલેષ લોઢાની મિત્રતા ચાહકોને ગમે છે. ત્યારે હવે જોવુ એ રહ્યું કે શૈલેષ લોઢા શૉ છોડશે કે નહી ?