શાહીદ કપૂરની ફિલ્મ 'કબીર સિંહ' સુપર હિટ ગયા બાદ હવે ફેન્સ તેની અપકમિંગ ફિલ્મ 'જર્સી'ની આતુરતાથી રાહ જોઈ રહ્યા છે. ત્યારે હાલમાં જ એવા સમાચાર આવ્યા કે આ ફિલ્મની શૂટિંગ દરમિયાન શાહીદ ગંભીર રીતે ઈજાગ્રસ્ત થઈ ગયો છે. મળતી માહિતી પ્રમાણે શૂટિંગ દરમિયાન શાહીદને લોઅર લિપ પર બોલ વાગી જવાને કારણે ત્યાં 13 ટાંકા આવ્યા છે. જોકે, શાહીદ ટ્વિટ કરીને તેની તબિયત હવે સારી હોવાના સમાચાર આપ્યા છે.
એવું કહેવાય છે કે, શાહિદ મોહાલી સ્ટેડિયમમાં શોટ પહેલાં એકદમ સારો હતો અને રિહર્સલ કરી રહ્યો હતો અને ત્યારે જ અચાનક બોલ તેના લોઅર લિપ પર વાગી જાય છે અને તેનો હોઠ કપાય જાય છે. ત્યાંથી લોહી વહેવા લાગે છે. પછી તેને તાત્કાલિક હોસ્પિટલ લઈ જવો પડે છે. આ સમાચાર સાંભળી તેની પત્ની મીરા કપૂર પણ ત્યાં પહોંચી જાય છે. સારવાર બાદ મોડી રાતે શાહીદ તેની પત્ની સાથે મુંબઈ પરત આવે છે.
મુંબઈ એરપોર્ટ પર શાહીદ અને મીરા કપૂર સ્પોટ થયા છે. સોશિયલ મીડિયા પર બંનેની તસવીરો વાયરલ થઈ રહી છે. આ દરમિયાન શાહીદ કપૂરે તેનો ફેસ માસ્કથી ઢાંકેલો હતો.
શાહિદે ટ્વિટ કરીને કહ્યું, ચિંતા કરવા બદલ આભાર. હાં મને ટાંકા આવ્યા છે પણ હું જલ્દી રિકવર કરી રહ્યો છું. જર્સીએ મારું થોડું બ્લડ લીધું છે પણ એક સારી સ્ક્રિપ્ટ માટે આટલું તો કરી જ શકાય. બધાં ખુશ રહો. માનવતા બધાંથી ઉપર છે.
મળતી માહિતી પ્રમાણે શાહીદ હવે શૂટિંગમાંથી બ્રેક લેશે. તે રિકવર થશે અને સોજો ઓછો થશે પછી તે ફરી શૂટિંગ શરૂ કરશે. ફિલ્મ જર્સી તેલુગુ ફિલ્મની હિન્દી રિમેક છે. આ ફિલ્મ એક ક્રિકેટરની કહાની છે. ફિલ્મમાં શાહીદની સાથે પંકજ કપૂર અને મૃણાલ ઠાકુર પણ મુખ્ય ભૂમિકામાં જોવા મળશે. આ ફિલ્મ ઓગસ્ટમાં રિલીઝ થવાની છે.