પાકિસ્તાનના ભૂતપૂર્વ કેપ્ટન શાહિદ આફ્રિદીએ એક અનોખી સદી ફટકારી છે. આ સદી સ્પર્ધાત્મક ક્રિકેટમાં શૂન્ય રને આઉટ થવાની છે. બાંગ્લાદેશ પ્રીમિયર લીગ (બીપીએલ) ટી-20 ટૂર્નામેન્ટમાં ઢાકા પ્લાટુન્સ તરફથી રાજશાહી રોયલ્સ વિરુદ્ધ રમેલી મેચમાં શૂન્ય રને આઉટ થતાં જ આફ્રિદીએ આ બદનામ રેકોર્ડ બનાવી નાખ્યો.
પાકિસ્તાનના ભૂતપૂર્વ કેપ્ટન શાહિદ આફ્રિદીએ એક અનોખી સદી ફટકારી
મેચમાં શૂન્ય રને આઉટ થયો આફ્રિદી
આફ્રિદીએ બનાવ્યો આ બદનામ રેકોર્ડ
આફ્રિદી ભલે વર્ષો પહેલાં આંતરરાષ્ટ્રીય ક્રિકેટને અલવિદા કહી ચૂક્યો હોય, પરંતુ વિભિન્ન દેશોમાં લીગ ક્રિકેટ રમી રહ્યો છે. બાંગ્લાદેશ પ્રીમિયર લીગમાં ઢાકા ટીમ તરફથી બેટિંગ કરવા ઊતરેલા આફ્રિદીને રવિ બોપારાએ પ્રથમ બોલે જ વિકેટકીપર લિટન દાસના હાથમાં ઝિલાવી દીધો. મેચમાં ઢાકાની ટીમ નવ વિકેટે માત્ર 134 રન જ બનાવી શકી. જવાબમાં રોયલ્સની ટીમે 10 બોલ બાકી હતા ત્યારે વિજયી લક્ષ્ય એક વિકેટ ગુમાવીને હાંસલ કરી લીધું.
આફ્રિદી આંતરરાષ્ટ્રીય ક્રિકેટમાં સૌથી વધુ વાર શૂન્ય રને આઉટ થવામાં સંયુક્ત રીતે નવમા સ્થાન પર છે. તે કુલ 44 વાર શૂન્ય રને આઉટ થઈ ચૂક્યો છે. આ મામલામાં તે ઝહીર ખાન અને શેન વોર્નની બરોબરી પર છે. આ ઉપરાંત આફ્રિદી 56વાર લિસ્ટ-એ, પ્રથમ શ્રેણી અને ટી-20 મેચમાં શૂન્ય રને આઉટ થયો છે. શ્રીલંકાનો સ્પિનર મુથૈયા મુરલીધરન આંતરરાષ્ટ્રીય ક્રિકેટમાં કુલ 59વાર શૂન્ય રને આઉટ થઈને આ યાદીમાં ટોચના સ્થાને છે.