દિલ્હીના રમખાણોમાં તપાસ કરી રહેલ દિલ્હી પોલીસના સ્પેશિયલ સેલે પોપ્યુલર ફ્રન્ટ ઓફ ઇન્ડિયા (PFI)ના પ્રેસિડેન્ટ પરવેઝ અને સેક્રેટરી ઇલિયાસની કહેવાતી પીએફઆઇ અને શાહીનબાગ ફંડિંગ વચ્ચે સાઠગાંઠના સંદર્ભમાં ધરપકડ કરી છે.
PFIએ શાહીનબાગના દેખાવકારોને નાણાં ભંડોળ પૂરું પાડયું હતું
દાનિશ પીએફઆઇની વિંગ કાઉન્ટર ઇન્ટેલિજન્સનો વડો છે : પોલીસ સૂત્ર
પોલીસે કહ્યું, 12 લોકોના એકાઉન્ટમાં પીએફઆઇએ પૈસા જમા કરાવ્યા હતા
પોલીસે દાવો કર્યો છે કે ઇલ્યાસે જ શાહીનબાગમાં સીએએ સામે ધરણા પર બેઠેલા લોકોને નાણાકીય ભંડોળ પૂરું પાડયું હતું ઇલિયાસ દિલ્હીના શિવવિહારમાં જ રહે છે. આ ઉપરાંત પરવેઝ અને ઇલિયાસ બંને પર દિલ્હીમાં તાજેતરનાં રમખાણો પણ ભડકાવવાનો પણ આરોપ છે.
દિલ્હી પોલીસના સ્પેશિયલ સેલ બંનેની સઘન પૂછપરછ કરી રહી છે. ખાસ કરીને શાહીનબાગના દેખાવકારોને નાણાભંડોળ પૂરું પાડવાના મામલામાં સખતાઇથી પૂછપરછ કરવામાં આવી રહી છે. આ અગાઉ દિલ્હી પોલીસના સ્પેશિયલ સેલે દાનિશ નામના એક શખ્સની ધરપકડ કરી હતી. દાનિશ સીએએ અને એનઆરસી વિરુદ્ધ પોસ્ટર વહેંચીને અપપ્રચાર ફેલાવી રહ્યો હતો.
પોલીસ સૂત્રોના જણાવ્યા અનુસાર દાનિશ પીએફઆઇની વિંગ કાઉન્ટર ઇન્ટેલિજન્સનો વડો છે અને જામિયામાં સીએએ વિરુદ્ધ થઇ રહેલા વિરોધ દેખાવોને કો-ઓર્ડિનેટ કરી રહ્યો હતો.
એવો પણ આરોપ છે કે 20 ડિસેમ્બર, 2019ના રોજ દેશભરમાં હિંસા ભડકાવવા માટે પોપ્યુલર ફ્રન્ટ ઓફ ઇન્ડિયાએ લોકોને પહેલેથી જ માનસિક રીતે તૈયાર કર્યા હતા.
પોલીસના જણાવ્યા અનુસાર મેરઠમાં 12 લોકોના એકાઉન્ટમાં પીએફઆઇએ પૈસા જમા કરાવ્યા હતા. જેમાંથી 4 એકાઉન્ટમાં રૂ.3 કરોડ કરતાં વધુ રકમ જમા કરાઇ હતી. તેને લઇને પોલીસે બેન્કોને નોટિસ મોકલીને એકાઉન્ટની માહિતી માગી હતી.
આ ઉપરાંત દિલ્હી પોલીસે જામિયાનગર વિસ્તારમાંથી આઇએસઆઇએસ સાથે સંકળાયેલ કાશ્મીરી દંપતીની ધરપકડ કરી હતી. આ દંપતી સીએએ વિરુદ્ધ ધરણાં પર બેઠેલા લોકોને ભડકાવવાનું કામ કરી રહ્યું હતું.