દિલ્હીમાં બે દિવસની હિંસા બાદ હવે બુધવારે શાંતિ જોવા મળી. ત્યારે હવે પોલીસને ગુપ્તચર એજન્સીઓ પાસેથી માહિતી મળી છે કે, રવિવારે શાહીન બાગમાં મોટી સંખ્યામાં લોકો એકત્રિત થઈ શકે છે. આ ભીડ ભેગી થવાના કારણે હિંસા ભડકી શકે છે.
નોર્થ- ઈસ્ટ દિલ્હી બાદ હવે શાહિન બાગની પોલીસને ચિંતા
ગુપ્ત એજન્સીના ઈનપુટ બાદ સતર્ક થઈ દિલ્હી પોલીસ
શાહિન બાગ વિસ્તારમાં રવિવારે મોટી સંખ્યામાં લોકો એકઠા થઈ શકે
આ કારણો સર દિલ્હી પોલીસ એલર્ટ થઈ છે
ગુપ્તચર એજન્સીએ આપેલી માહિતીમાં મોટી સંખ્યામાં લોકો હથિયાર સાથે શાહીન બાગમાં આવે તેવી શક્યતા છે. આ મામલે જાણકારી મળતા દિલ્હી પોલીસ એલર્ટ થઈ છે. દિલ્હીના તમામ વિસ્તારોમાં પોલીસનો ચૂસ્ત બંદોબસ્ત ગોઠવવામાં આવ્યો છે.
રસ્તા પરથી હટવા માટેનો કોઈ નિર્ણય લેવાશે
પોલીસ દ્વારા મોડી રાત્રે શાહીન બાગમાં વિરોધ કરનારા લોકો સાથે મિટિંગ કરવામાં આવી છે. અડધા કલાક સુધી ચાલેલી બેઠકમાં પોલીસે પ્રદર્શનકારીઓને શાહીન બાગના રસ્તા ખાલી કરવા અપીલ કરી હતી. આ બેઠકમાં પ્રદર્શનકારીઓને પોલીસને કહ્યું કે, શાહીન બાગમાં રસ્તા પરથી હટવા માટે આગેવાનો સાથે ચર્ચા કરવામાં આવશે. ત્યાર બાદ પ્રદર્શનકારીઓ દ્વારા રસ્તા પરથી હટવા માટેનો કોઈ નિર્ણય લેવાશે.
શાહીન બાગમાં હિંસા ભડકી શકે તેમ છે
ઉલ્લેખનીય છે જે દિવસે શાહીન બાગમાં એક રસ્તો ખોલવામાં આવ્યો હતો. એ જ રાતે મૌજપુરમાં મેટ્રો કોર્ટના બ્રિજ નીચે અડધી રાતે મોટી સંખ્યામાં મહિલાઓ રસ્તા પર આવી ગઈ હતી. તેવા થોડાક જ કલાકોમાં સીએએનું સમર્થન કરનારા અને વિરોધ કરનારા એમ બે જુથ વચ્ચે અથડામણ થઈ હતી. જેમાંથી આ હિંસાએ મોટુ સ્વરુપ ધારણ કર્યુ છે. ત્યારે હવે ગુપ્તચર એજન્સીઓ દ્વારા મળતી માહિતી પ્રમાણે શાહીન બાગમાં હિંસા ભડકી શકે તેમ છે. જેના કારણે પોલીસ આ સ્થળ ખાલી કરાવવા પ્રયાસ કરી રહી છે.