શાહરૂખ ખાનની કંપની રેડ ચિલીઝ OTT પ્લેટફોર્મ પર તેની વેબ સીરિઝ 'બેતાલ' રિલીઝ કરવા જઈ રહી છે. આ એક હોરર થ્રિલર વેબ સીરિઝ છે, જેનું ટ્રેલર 8 મેના રોજ રિલીઝ થયું હતું. આ સીરિઝ 'ઘૂલ' જેવી સીરિઝ બનાવનાર પેટ્રિક ગ્રાહમે ડિરેક્ટ કરી છે. ટ્રેલર જોયા બાદ કિંગ ખાનના ફેન્સની ઉત્સુકતા વધી ગઈ છે અને તેઓ સીરિઝ રિલીઝ થવાની રાહ જોઈ રહ્યા છે. આ દરમિયાન કિંગ ખાને તેના ફેન્સ માટે ટાસ્ક રાખ્યો છે. જેને પૂરો કરવા પર એવી જોરદાર ગિફ્ટ મળશે, જેના વિશે જાણીને લોકો ખુશ થઈ ગયા છે.
હકીકતમાં શાહરૂખ ખાને તેની આગામી વેબ સીરિઝ બેતાલને લઈને ફેન્સને એક ટાસ્ક આપ્યો છે. શાહરૂખ ઈચ્છે છે કે, લોકડાઉનની વચ્ચે લોકો એન્ટરટેન થાય અને આવી હોરર ઈનડોર ફિલ્મો બનાવે. આ ટાસ્ક હેઠળ ત્રણ વિજેતાઓને શાહરૂખ ખાનથી વીડિયો કોલ પર વાત કરવાનો મોકો મળશે. જેની જાણકારી કિંગ ખાને પોતે એક પોસ્ટ દ્વારા આપી છે.
શાહરૂખે પોસ્ટ શેર કરીને કેપ્શન લખ્યું- એક સારી હોરર ફિલ્મ કે સીરિઝ જોવાની કોને મજા ન પડે. મને તો મજા આવે છે, કારણ કે અત્યારે આપણે બધાં ઘરમાં કેદ છીએ. તો આપણને થોડો ખાલી સમય મળ્યો છે. એવામાં મેં વિચાર્યું કે, ક્વોરંટાઈન દરમિયાન આપણે બધાંએ થોડું કામ કરી લેવું જોઈએ. જે મજેદાર, સર્જનાત્મક અને હોરર હોય.
આ પોસ્ટની સાથે શાહરૂખ ખાને લોકોને આ શોર્ટ ફિલ્મ બનાવવાના કેટલાક રૂલ્સ પણ બતાવ્યા છે. જે અંતર્ગત સોશિયલ ડિસ્ટન્સિંગના નિયમો ફોલો કરવા જરૂરી છે. કોઈપણ કેમેરા યુઝ કરી શકાય છે. આ સિવાય ફિલ્મમાં ઉપયોગમાં લેવાયેલા પ્રોપ્સ પણ હોમમેડ હોવા જોઈએ. કિંગ ખાને વીડિયો મેલ કરવા માટે એક મેલ આઈડી પણ શેર કરી છે. જેના પર લોકો તેમના વીડિયો મોકલી શકે છે. વીડિયો શેર કરવાની છેલ્લી તારીખ 18 મે છે. આ ટાસ્કના 3 લકી વિજેતાઓને શાહરૂખ ખાનને વીડિયો કોલ કરવાનો મોકો મળશે. શાહરૂખ પોતે આ વિજેતાઓને કોલ કરીને તેમની સાથે વાત કરશે.