બોલિવુડ એક્ટર શાહરૂખ ખાનની ફિલ્મ ‘ઝીરો’ બોક્સઓફિસ પર કંઈ કમાલ ન કરી શકી. ત્યારથી સતત એક્ટર હવે કઇ ફિલ્મમાં જોવા મળશે તે વિશે ચર્ચા ચાલી રહી છે. જોકે શાહરૂખની આગામી ફિલ્મ કઇ હશે કે વિશે કોઇ જ સ્પષ્ટતા નથી. તાજેતમરાં જ શાહરૂખ ચીનમાં યોજાયેલા બેજિંગ ફિલ્મ ફેસ્ટિવલની ક્લોસિંગ સેરેમનીમાં ‘ઝીરો’ના સ્ક્રીનિંગમાં પહોંચ્યો હતો. અહીં એક રિપોર્ટરે શાહરૂખને નેક્સ્ટ ફિલ્મ વિશે સવાલ પૂછ્યો.
આગામી ફિલ્મ કઈ હશે તેના જવાબમાં શાહરૂખે કહ્યું, “મને લાગે છે કે જૂન સુધીમાં હું મારી નવી ફિલ્મ વિશે નિર્ણય કરીશ.''ચીનમાં આપેલા નિવેદન બાદ શાહરૂખે બીજા દિવસે અન્ય એક ઈન્ટરવ્યૂમાં જ પોતાનો જવાબ બદલી નાખ્યો અને કહ્યુ કે, જૂનમાં ફિલ્મ અનાઉન્સ કરવાનો પ્લાન કેન્સલ કરી દીધો છે.
શાહરૂખે કહ્યું, “મારી પાસે અત્યારે કોઈ ફિલ્મ નથી. હું કોઈ ફિલ્મનો ભાગ પણ નથી. સામાન્ય રીતે એવું હોય છે કે તમારી એક ફિલ્મ પતે ને તરત જ બીજી ફિલ્મનું શૂટિંગ શરૂ થઇ જતુ હોય છે. હું 3-4 મહિનાની અંદર નવી ફિલ્મમાં જોડાઈ જાઉં છું પરંતુ આ વખચે મને એવુ નથી લાગતુ. મારું હૃદય મંજૂરી નથી આપી રહ્યું. મને લાગે છે કે મારે હજુ થોડો સમય લેવો જોઇએ, ફિલ્મો જોવી જોઇએ, વાર્તાઓ સાંભળવી જોઇએ અને વધુ પુસ્તકો વાંચવા જોઇએ. મારા બાળકો કોલેજમાં છે. મારી દીકરી કોલેજ જાય છે અને દીકરાનું ભણવાનું પૂરુ થયુ છે. એવામાં હું મારા પરિવાર સાથે સમય વિતાવવા માંગુ છું.''
શાહરૂખને પૂછવામાં આવ્યું કે ફિલ્મની જાહેરાત કરવા માટે કોઈ મહિનો નક્કી કર્યો કે નહી? તો કિંગ ખાને કહ્યુ કે, ''મારા ખ્યાલથી કાલે મેં ક્યાંક કહ્યું હતું કે હું જૂનમાં મારી આગામી ફિલ્મની જાહેરાત કરીશ પણ હું કદાચ જૂનમાં પણ નિર્ણય નહીં કરી શકું. હું ત્યારે જ ફિલ્મ કરીશ જ્યારે ખરેખર ફિલ્મ કરવાનુ મન થશે. અત્યારે મારું મન નથી માનતું. ઘણા લોકો મારી પાસે વાર્તાઓ લઈને આવ્યા અને મેં 15-20 વાર્તાઓ સાંભળી. તેમાંથી 2-3 પસંદ આવી છે પરંતુ મેં ઈમોશનલી આ વિશે કોઇ નિર્ણય નથી કર્યો.''