સિદ્ધિ / 15 વર્ષની મહિલા ક્રિકેટ ટીમની આ યુવા ખેલાડીએ તોડ્યો તેંડુલકરનો 30 વર્ષ જુનો રેકોર્ડ

• 15 વર્ષની મહિલા ક્રિકેટ ટીમની યુવા ઓપનરની અનોખી સિદ્ધિ
• સચિનનો 30 વર્ષ જુનો રેકોર્ડ તોડ્યો 
• શેફાલીએ આ સિદ્ધિ 15 વર્ષ અને 285 દિવસમાં કરી હાંસલ

પોતાની પાંચમી ટી -20 મેચમાં શેફાલીએ 49 દડામાં 73 રનની વિસ્ફોટક ઇનિંગ્સ રમી હતી, જે તેની કારકિર્દીની પહેલી અર્ધસદી છે. આ વિસ્ફોટક ઇનિંગ્સમાં તેણે છ ચોગ્ગા અને ચાર છગ્ગા ફટકાર્યા હતા.

સચિનનો 30 વર્ષ જુનો રેકોર્ડ તોડ્યો 

આ સાથે, શેફાલી આંતરરાષ્ટ્રીય ક્રિકેટમાં અડધી સદી ફટકારનારી ભારતની સૌથી યુવા ક્રિકેટર બની ગઈ છે. શેફાલીએ સચિન તેંડુલકરનો 30 વર્ષ જુનો રેકોર્ડ તોડ્યો હતો. 

માત્ર 15 વર્ષની વયે પ્રાપ્ત કરી હતી આ સિદ્ધિ

શેફાલીએ આ સિદ્ધિ 15 વર્ષ અને 285 દિવસમાં હાંસલ કરી હતી, જ્યારે સચિને 16 વર્ષની અને 214 દિવસની ઉંમરે પ્રથમ અર્ધસદી ફટકારી હતી. સચિનની પહેલી આંતરરાષ્ટ્રીય અડધી સદી ટેસ્ટ ક્રિકેટમાં આવી હતી, જે તેણે પાકિસ્તાન સામે 24 ઓક્ટોબર 1989 ના રોજ ફૈસલાબાદમાં કરી હતી.

મહિલા ક્રિકેટ ટીમે વેસ્ટ ઇન્ડીઝને આપ્યો પરાજય

ભારતીય મહિલા ક્રિકેટ ટીમે પ્રથમ ટી -20 મેચમાં યજમાન વેસ્ટ ઇન્ડીઝને 84 રને હરાવી હતી. આ જીત સાથે ભારતે પાંચ મેચની ટી -20 શ્રેણીમાં 1-0થી લીડ મેળવી લીધી છે. ટોસ હાર્યા બાદ પ્રથમ બેટિંગ કરતા ભારતીય ટીમે ચાર વિકેટ પર 185 રનનો મોટો સ્કોર બનાવ્યો અને ત્યારબાદ વેસ્ટ ઇન્ડીઝની ટીમને નિર્ધારિત 20 ઓવરમાં નવ વિકેટે 101 રન પર રોકી દીધી હતી.