સાત રાજ્યોમાં એટીએમમાં છેડછાડ કરી નાણાં ઉપાડી લીધા બાદ ફરીથી બેન્કમાં ક્લેઈમ કરી નાણાં મેળવી બેન્કો સાથે લાખોની ઠગાઈ કરનાર હરિયાણાનાં મેવાત જીલ્લાની ગેંગનો શહેરના સાયબર ક્રાઈમ લેખે પર્દાફાશ કરી બે આરોપીઓમાં મુખ્ય સૂત્રધારને ઝડપી લીધા છે.
ગુજરાત, મહારાષ્ટ્ર, દિલ્હી, બિહાર, ઝારખંડ, તામિલનાડુ અને કર્ણાટક સહિતના સાત રાજ્યોમાં એટીએમમાં છેડછાડ કરી નાણાં ઉપાડી લીધા બાદ ફરીથી બેન્કમાં ક્લેઈમ કરી નાણાં મેળવી બેન્કો સાથે લાખોની ઠગાઈ કરનાર હરિયાણાનાં મેવાત જીલ્લાની ગેંગનો શહેરના સાયબર ક્રાઈમ લેખે પર્દાફાશ કરી બે આરોપીઓમાં મુખ્ય સૂત્રધાર ઈમરાન હનિફ (ઉ.વ. ૨૩) અને અઝરૂદ્દીન ઈલ્યાસ મેળા (ઉ.વ. ૨૩, રહે. બંને ગામ મુન્ધેતા, તા. પુન્હાના, જી. મેવાત)ને ઝડપી લઈ તેમની ગેંગના ત્રણ સાગરીતો અબ્દુલ સતાર, મુનફેદખાન અને શકીલ અબ્દુલ્લા હુસેનની શોધખોળ આદરી છે.
બંને આરોપીઓ પાસેથી પોલીસે વિવિધ બેન્કોનાં ૬૦ એટીએમ કાર્ડ, એટીએમમાં છેડછાડ કરવા માટે ઉપયોગમાં લેવાતી ડિસમિસ, ૪ માસ્ટર કી તથા બેન્કોના કમ્પલેન નંબર લખેલી નોટબુક કબજે કરી છે. આ ટોળકી છેલ્લા એકાદ વર્ષથી ગુના આચરતી હતી. અત્યાર સુધી જુદી જુદી બેન્કોને આ ટોળકીએ અંદાજે ૧૦ લાખથી વધુ રકમનો ચૂનો ચોપડી દીધો હતો. જે નાણાંની ઠગાઈ કરી છે તે બેંકોના જ છે. તત્કાળ બેન્કના અધિકારીઓને તેની જાણ થઈ ન હતી. મેવાતી ગેંગે શહેરમાં જુદા જુદા ૭ એટીએમમાં ૨૬ જેટલા ટ્રાન્જેક્શન કરી ૫.૨૧ લાખની ઠગાઈ કરી હતી.
શહેરમાં સ્થિત એસબીઆઈની મુખ્ય શાખાના આસિસ્ટન્ટ મેનેજર રમેશભાઈ જીવાભાઈ ચાવડાએ પોલીસને જણાવ્યું કે પોતે જ્યારે બેન્કોના નીતિ-નિયમો મુજબ પોતાનાં તાબા હેઠળના એટીએમ મશીનોમાં થયેલા ટ્રાન્ઝેકશનનું નાણાકીય રિકન્સિલેશન કરતા હતા ત્યારે એસબીઆઈના અમુક એટીએમમાં કેટલાક ટ્રાન્ઝેક્શન છેતરપિંડીથી કરવામાં આવ્યાનું ધ્યાને આવ્યું હતું.
તપાસ કરતા જાણવા મળ્યું કે, કેટલાક શખ્સો એટીએમમાંથી નાણાં ઉપાડી એટીએમ મશીન સાથે છેડછાડ કરી ઉપાડેલા નાણાં પોતાને મળ્યા નથી તેમ બેન્કોમાં ફરિયાદ કરી પોતાના એકાઉન્ટમાં રિફંડ મેળવી લેતા હતા. જેથી તેણે સાયબર ક્રાઈમ સેલમાં ગતરાત્રે ફરિયાદ નોંધાવતા એસીપી જી.ડી. પલસાણા, જે.એસ. ગેડમ અને પીએસઆઈ ડી.બી. ગઢવીએ તપાસ શરૂ કરી હતી. પોલીસે જે એટીએમ સેન્ટરો પર ઠગાઈ કરી હતી ત્યાંથી શકમંદોના ફોટોગ્રાફ્સ મેળવ્યા હતા.
ત્યાર બાદ ક્યા ક્યા એકાઉન્ટમાં રિફંડ મેળવવામાં આવ્યું છે તેની તપાસ કરી હતી. એકાઉન્ટ નંબરના આધારે મોબાઈલ નંબર મેળવી તેના સીડીઆર એટલે કે કોલ ડિટેઈલ રેકોર્ડ કઢાવી, પછી શકમંદો જે હોટલમાં રોકાતી વખતે જે આઈકાર્ડ આપતા હતા તેના પરથી ફોટા પોલીસ તેને બેન્કના એટીએમ સેન્ટરમાં મળેલા શકમંદોના ફોટા સાથે 'મેચ' કરતા તે થઈ ગયા હતા. આ રીતે મેવાતી ગેંગનો પર્દાફાશ તેના બે સભ્યો કે જેમાં મુખ્ય ઈમરાન છે તેને ઝડપી લીધો હતો.
એકલા ઈમરાને જ શહેરમાં જે ૨૬ ટ્રાન્ઝેક્શન થયા હતાં તેમાંથી ૧૪ તેણે કર્યાં હતાં. બાકીના તેની ગેંગના સભ્યોએ કર્યા હતા. આ ગુનાઓ આચરવા માટે આ ગેંગ પોતાના ગામમાં રહેતા લોકોના એટીએમ કાર્ડનો ઉપયોગ કરતા હતા. શહેરના સાયબર ક્રાઈમ પોલીસ મથકમાં નોંધાયેલો આ પ્રથમ ગુનો છે. ઝડપાયેલી ટોળકી શહેરમાં આવી હોટલમાં બે દિવસ રોકાઈ શક્ય હોય તેટલા એટીએમને નિશાન બનાવી પરત વતન જતી રહેતી હોવાથી હાથમાં આવતી ન હતી.