ગુનેગારોને સજા / દેશમાં આતંક ફેલાવતા ISISને મોતનો ફટકો, 14 આતંકીઓને ફાંસીની સજા, બે દિવસમાં NIA કોર્ટના બે ચુકાદા

• દેશમાં આતંકી ગતિવિધિઓ કરી રહેલા આતંકી સંગઠનનો મોટો ફટકો
• આજે લખનઉ કોર્ટે 7 આતંકીઓને ફટકારી ફાંસીની સજા
• લખનઉમાં ટેરર ફેલાવવા બદલ સજા
• ગઈકાલે ભોપાલ ટ્રેન બ્લાસ્ટમાં એનઆઈએ કોર્ટે ફટકારી હતી 7 આતંકીઓને ફાંસી 

સીરિયા અને ઈરાનના ખૂંખાર આતંકવાદી સંગઠન  ISIS છેલ્લા કેટલાક સમયથી ભારતમાં આતંકી ગતિવિધિઓને જન્મ આપી રહ્યું છે. ગઈકાલે એનઆઈએ કોર્ટે ભોપાલ ઉજ્જેન લોકલ ટ્રેન બ્લાસ્ટ કેસમં 9 આતંકીઓને દોષી ઠેરવીને 7ને ફાંસી સજા ફટકારી હતી અને 1ને આજીવન કારાવાસની સજા આપી છે હવે આજે લખનઉની એનઆઈએ કોર્ટે પણ ટેરર કેસમાં 7 આતંકીઓને મોતની સજા ફટકારી છે. 

લખનઉની વિશેષ એનઆઈએ કોર્ટે સાતને ફટકારી ફાંસી 

લખનઉની વિશેષ એનઆઈએ કોર્ટે ઈસ્લામિક સ્ટેટ (આઈએસઆઈએસ)ના સાત આતંકીઓને ફાંસીની સજા અને કાનપુર આતંકી ષડયંત્ર કેસમાં એકને આજીવન કેદની સજા સંભળાવી છે. જે કટ્ટરપંથી ગુનેગારોને ફાંસીની સજા ફટકારવામાં આવી છે તેમાં મોહમ્મદ ફૈઝલ, ગૌસ મોહમ્મદ ખાન, મોહમ્મદ અઝહર, અતિક મુઝાફર, મોહમ્મદ દાનિશ, મોહમ્મદ સૈયદ મીર હુસૈન અને આસિફ ઇકબાલનો સમાવેશ થાય છે. એક મોહમ્મદ આતિફ ઉર્ફે આસિફ ઈરાનીને આજીવન કેદની સજા ફટકારવામાં આવી હતી.  2017માં કાનપુરમાં તમામ આઠ દોષિતોની ધરપકડ કરવામાં આવી હતી. આ સજા સંભળાવતા વિશેષ એનઆઈએ કોર્ટના જજ વી.એસ.ત્રિપાઠીએ અવલોકન કર્યું હતું કે આ કેસ રેરેસ્ટ ઓફ ધ રેર કેસમાં આવે છે અને દોષિતોને કડકમાં કડક સજાના હકદાર છે.

શું કર્યું હતું આતંકીઓએ 
આ કેસની એફઆઈઆર 8 માર્ચ, 2017ના રોજ લખનઉના એટીએસ પોલીસ સ્ટેશનમાં નોંધવામાં આવી હતી. વાસ્તવમાં એટીએસને પ્રતિબંધિત આતંકી સંગઠન આઈએસઆઈએસના સભ્યોની દેશભરમાં અલગ અલગ જગ્યાઓ પર બ્લાસ્ટ કરવાની યોજના વિશે માહિતી મળી હતી. કાનપુર એટીએસએ પહેલા મોહમ્મદ ફૈઝલની ધરપકડ કરી હતી અને બાદમાં તેના ખુલાસાઓને પગલે એટીએસના જાસૂસોએ અન્ય લોકોને પકડવાની કાર્યવાહી કરી હતી. સરકારી વકીલના જણાવ્યા મુજબ આરોપીએ ઉન્નાવના ગંગા ઘાટ પર ટેસ્ટ બ્લાસ્ટ કર્યો હતો. તપાસમાં એવો પણ દાવો કરવામાં આવ્યો હતો કે આરોપીઓ કાનપુર-ઉન્નાવ રેલવે ટ્રેકને બ્લાસ્ટ કરવાની યોજના ધરાવે છે અને ત્યાં પણ બોમ્બ પ્લાન્ટ કરવામાં આવ્યો હતો. દશેરાની ઉજવણી દરમિયાન તેઓએ વિવિધ સ્થળોએ બોમ્બ પણ લગાવ્યા હતા.

ભોપાલ-ઉજ્જેન ટ્રેન બ્લાસ્ટના સાત આતંકીઓને ફાંસીની સજા 

2017 ભોપાલ-ઉજ્જેન ટ્રેન બ્લાસ્ટ કેસના આઠ આરોપીઓમાંથી 7ને એનઆઈએ કોર્ટે ફાંસીની સજા તો 1ને આજીવન કારાવાસની સજા ફટકારી હતી. 7 માર્ચ, 2017ની સવારે મધ્યપ્રદેશના શાજાપુરમાં થયેલા આ બ્લાસ્ટમાં ISISના  ખોરાસન મોડ્યુલના આતંકીઓની ભૂમિકા સામે આવી હતી. 8 માર્ચ, 2017ના રોજ લખનઉના કાકોરી વિસ્તારમાં એટીએસ દ્વારા એન્કાઉન્ટરમાં ખોરાસણ મોડ્યુલ સાથે સંકળાયેલા કાનપુરના આતંકવાદી સૈફુલ્લાને ઠાર મારવામાં આવ્યો હતો, જ્યારે મોહમ્મદ ફૈઝલ, ગૌસ મોહમ્મદ ખાન, મોહમ્મદ અઝહર, આતિફ મુઝફ્ફર, મોહમ્મદ દાનિશ, સૈયદ મીર હુસૈન, આસિફ ઇકબાલ ઉર્ફે રોકી અને મોહમ્મદ આતિફ ઉર્ફે આતિફ ઇરાનીની ધરપકડ કરવામાં આવી હતી.