રંગોત્સવનો તહેવાર ધૂળેટી કેટલાક પરિવારો માટે શોકમય બન્યો છે. ધૂળેટીના દિવસે રાજ્યમાં અલગ અલગ દુર્ઘટનામાં પાણીમાં 8 લોકોના ડૂબી જવાની ઘટના સામે આવી છે. જેમાં બોટાદમાં 4, સુરતમાં 2 અને રાજકોટમાં 1 યુવક જ્યારે વડોદરામાં પણ એક યુવક ડૂબી જતા મોત નિપજ્યું છે.
કેનાલમાં ન્હાવા પડેલ 14 વર્ષીય કિશોરનું મોત
વડોદરાના પાદરા ખાતે પસાર થતી નર્મદા કેનાલમાં ન્હાવા પડેલ 14 વર્ષીય કિશોરનું મોત નિપજ્યં હતું. ત્યારે પાદરાનાં તાજપુરા રોજ પર આવેલ રામ રેસીડેન્સીમાં રહેતા કિશોર સ્મિત આશિષ ખરાદીનું મોત નિપજ્યું હતું. કેનાલમાં હાથ પગ ધોવા ગયા હતા. તે દરમ્યાન કેનાલમાં ડૂબી ગયા હતા. ત્યારે બંને બાળકોને કેનાલમાંથી બહાર કાઢી સારવાર અર્થે ખસેડવામાં આવ્યા હતો. જ્યારે મૃતકને સરકારી દવાખાને ખસેડવામાં આવ્યો હતો.
બોટાદમાં તણાયા 4 યુવકો
બોટાદમાં હોળી રમીને કેનાલમાં ન્હાવા પડેલા ચાર યુવકોના ડૂબી જવાથી મોત નીપજ્યાં છે. મળતી માહિતી અનુસાર, બોટાદના સેથળી ગામ પાસે કેનાલમાં ચાર યુવકો તણાયા હતા. આ અંગેની જાણ સ્થાનિકો દ્વારા ફાયર વિભાગને કરવામાં આવતા ફાયરની ટીમ તાત્કાલિક બનાવ સ્થળે દોડી આવી હતી. આ દરમિયાન કેનાલમાંથી 4 યુવકોને મૃત હાલતમાં બહાર કાઢવામાં આવ્યા છે. આ અંગેની જાણ થતાં મામલતદાર સહિત પોલીસની ટીમ પણ ઘટના સ્થળે દોડી આવી છે. પોલીસની પ્રાથમિક તપાસમાં ચારેય યુવકો બોટાદ શહેરના પાળીયાદ રોડ પર આવેલી અશોક વાટિકાના રહેવાસી હોવાનું સામે આવ્યું છે. હાલ આ મામલે વધુ તપાસ હાથ ધરવામાં આવી છે.
સુરતમાં ડૂબી જવાથી 2ના મોત
સુરતમાંથી પણ આવો જ દુઃખદ બનાવ સામે આવ્યો છે. ધૂળેટીને લઈને ન્હાવા પડેલા બે યુવકોના ડૂબી જવાથી મોત નીપજ્યાં છે. મળતી માહિતી અનુસાર, કોઝવેમાં 2 યુવકો ન્હાવા માટે પડ્યા હતા. આ દરમિયાન તેઓ અચાનક ડૂબ્યા હતા. સ્થાનિકો દ્વારા આ અંગેની જાણ પોલીસ અને ફાયર વિભાગને કરવામાં આવતા ફાયર અને પોલીસની ટીમ તાત્કાલિક બનાવ સ્થળે દોડી આવી હતી. ફાયર વિભાગની ટીમ દ્વારા બંને યુવકોને કોઝવેમાંથી બહાર કાઢી તેઓને સારવાર અર્થે હોસ્પિટલ ખાતે ખસેડવામાં આવ્યા હતા. જોકે, તેઓને સારવાર મળે તે પહેલા જ બંને યુવકોનું મોત નીપજ્યું હતું. હાલ પોલીસ દ્વારા આ યુવકો કોણ અને ક્યાંના છે તે અંગે તપાસ કરવામાં આવી રહી છે.
રાજકોટમાં ડેમમાં ડૂબી જતા એક યુવકનું મોત
રાજકોટમાં પણ ડૂબી જવાથી એક યુવકનું મોત નીપજ્યું છે. 19 વર્ષીય યુવકના મોતથી પરિવારમાં શોકનું મોજુ ફરી વળ્યું છે. મળતી માહિતી અનુસાર, ધૂળેટી રમ્યા બાદ યુવકો આજી ડેમમાં ન્હાવા પડ્યાં હતા. જે પૈકી એક યુવકનું ડૂબી જતાં મોત નિપજ્યું છે. ફાયર વિભાગની ટીમ દ્વારા 19 વર્ષીય યુવકના મૃતદેહને ડેમમાંથી બહાર કાઢવામાં આવ્યો છે. જોકે, કેટલા યુવકો આજી ડેમમાં ન્હાવા ગયા હતા તે અંગેની માહિતી હજુ સુધી આવી નથી.