કાર્યવાહી / સુરત: માસ્ક કેમ નથી પહેર્યું? પોલીસે યુવાનને આડેધડ માર મારી કોમામાં પહોંચાડ્યો, કોર્ટેના આદેશથી પોલીસકર્મીઓ થરથર કાંપ્યા

• સુરતના ઉમરા પોલીસ સ્ટેશનના 3 પોલીસકર્મી સામે ગુનો નોંધવા આદેશ
• પોલીસકર્મી સામે હત્યાના પ્રયાસનો ગુનો નોંધવા સેશન્સ કોર્ટનો આદેશ
• માસ્ક નહીં પહેરવા બદલ યુવાનને પોલીસકર્મીઓએ માર્યો હતો માર

આશરે 6 મહિના અગાઉ નાઈટ કર્ફ્યૂના નિયમ દરમિયાન સુરતના ઉમરા વિસ્તારમાંના વેસુ VIP રોડ પર આવેલા એક કાફેમાંથી યુવાન બહાર નીકળી રહ્યો હતો. ત્યાં ઉમરા પોલીસના 3 જવાનો આવી ચડયા હતા ને રાત્રિ કર્ફ્યૂના ભંગનો આરોપ લગાવી યુવકને ડરાવી વાનમાં બેસાડયો હતો. જે બાદ યુવક અને પોલીસ જવાનો વચ્ચે ઉગ્ર બોલાચાલી થતાં તેણે ઘેરીને ઢોર માર મારવામાં આવ્યો હતો. યુવકને એટલી ગંભીર ઈજાઓ પહોંચી હતી કે યુવક કોમામાં જતો હર્યો હતો. જે બાદ ઉમરા પોલીસે પોતાના પોલીસકર્મીઓ સામે નોંધી ફરિયાદ ન હતી પંરતુ ઉલ્ટા ચોર કોટવાલનો ડાટે કહેવતની જેમ પોલીસે યુવાને ચાલુ વાનમાંથી કૂદ્યો હોવાનું કહ્યું હતું. સમગ્ર મામલે પરિવારજનોએ યુવકને ન્યાય અપાવવા કોર્ટની શરણ લીધી હતી. જેમાં સુરતના ઉમરા પોલીસ સ્ટેશનના 3 પોલીસકર્મી સામે ગુનો નોંધવા આદેશ કરવામાં આવ્યો છે.

'તમને પોલીસનો પાવર દેખાડીએ કહી માર માર્યો'
જો સમગ્ર કેસ પર નજર કરીએ તો ફરિયાદી અંસારી કામીલનો પુત્ર સમીર 22 જુન, 2021એ મિત્ર ઇમરાન શેખ, સાદ ખાન, આતિફ શેખ અને અંસારી અખ્તર સાથે VIP રોડ પર કાફેમાંથી 9 વાગ્યાની આસપાસ બહાર નીકળ્યો હતો ત્યારે ઉમરા પોલીસના નિતેશ, ધનસુખ તથા અન્ય એક પોલીસ કર્મીએ તમામ યુવાનોને કર્ફ્યૂ ભંગના ગુનામાં રોક્યા હતા. અને ફરિયાદીના પૂત્રને સવાલ કર્યો હતો કે કેમ માસ્ક પહેર્યું નથી. તેથી સમીરે જવાબ આપ્યો હતો કે તે સમયના નિયમ મુજબ કર્ફ્યૂ 10 વાગ્યે શરૂ થાય છે અને હાલ 9 વાગ્યા છે. આવો જવાબ સાંભળી પોલીસ જવાનો ઉશ્કેરાઈ ગયા હતા અને અમને સમયનું ભાન કરાવીશ હવે તને પોલીસનો પાવર દેખાડીએ એવું કહી વાનમાં બેસાડી આડેધડ માર માર્યો હતો. 

હત્યાના પ્રયાસનો ગુનો નોંધી તપાસ કરો: સેશન્સ કોર્ટ 
સમગ્ર મામલે  પોલીસ કમિશનર અજય તોમરને પણ ફરિયાદી કરવામાં આવી હતી. પણ યોગ્ય જવાબ ન મળતા કોર્ટે આજે નિતેશ, ધનસુખ સહિત 3 કર્મીઓ સામે ગુનો નોંધવા આદેશ કર્યો છે. સેશન્સ કોર્ટ મામલાને ગંભીરતાથી લઈ હત્યાના પ્રયાસનો ગુનો નોંધી તપાસ કરવા આદેશ કર્યો છે જે માટે ઉચ્ચ કક્ષાના અધિકારીઓને જવાબદારી સોંપી કોર્ટને રિપોર્ટ કરવા ફરમાન જાહેર કર્યું છે.