પરીક્ષા / ગુજરાત યુનિ.ની ઓનલાઇન પરીક્ષા પહેલાં જ મોક ટેસ્ટમાં સર્વર ડાઉન, સત્તાધીશોના પણ જવાબ આપવામાં ધાંધિયા

• કોરોનાકાળમાં ગુજરાત યુનિવર્સિટી દ્વારા ઓનલાઈન પરીક્ષાનું આયોજન
• ફાઈનલ પરીક્ષા પહેલા મોક ટેસ્ટ આપવી ફરજીયાત 
• ફાઈનલ પરીક્ષા આપ્યા પહેલાની પરીક્ષામાં યુનિવર્સિટીના સર્વર જ ડાઉન 
• સત્તાધીશો જવાબ આપવાની બદલે એકબીજાને ખો આપી રહ્યા છે

ગુજરાતની કોલેજ સંસ્થાનોમાં ગુજરાત યુનિવર્સિટીથી હજારો વિદ્યાર્થીઓ અભ્યાસ કરી રહ્યા છે. એવામાં અંતિમ સેમેસ્ટરમાં અભ્યાસ કરી રહેલા વિદ્યાર્થીઓ માટે ઓનલાઈન પરીક્ષાનું આયોજન કરવામાં આવ્યું હતું. જોકે આ પરીક્ષામાં યુનિવર્સિટીની તૈયારીઓની પોલ ખુલી ગઈ છે. આટલી મોટી યુનિવર્સિટી જ્યારે હજારો વિદ્યાર્થીઓને ફરજીયાતપણે પરીક્ષા આપવાનું કહી રહી છે ત્યાં પરીક્ષા આપ્યા પહેલા તેના સર્વર જ ડાઉન થઇ જાય છે. 

આટલું જ નહીં પહેલીવાર સવારમાં સર્વર ડાઉન થઇ જવાના કારણે જે વિદ્યાર્થીઓ પરીક્ષા આપી શક્યા નહીં તે લોકો માટે યુનિવર્સિટી દ્વારા ફરીથી સાંજના સમયે પરીક્ષાનું આયોજન કરવામાં આવ્યું જેને રિમોક ટેસ્ટ નામ આપવામાં આવ્યું પરંતુ ગુજરાત યુનિવર્સસિટીના સર્વર સુધરી જાય તો ચમત્કાર કહેવાય ! જોકે વિદ્યાર્થીઓને ફરીથી તે જ હાલાકીનો સામનો કરવો પડ્યો અને તે પરીક્ષા આપી શક્યા નહીં.

સત્તાધીશોની ખુલાસો આપવામાં પીછેહઠ; ફોન ઉપાડવાના બંધ કરી દીધા 

આશ્ચર્યજનક વાત એ છે કે આ મુદ્દે ગુજરાત યુનિવર્સીટીના ઉપકુલપતિ જગદીશ ભાવસારને ફોન કરીને વિગત પૂછતાં તેમણે ઉદ્ધતાઈ પૂર્વક એટલું જ કહ્યું હતું કે તમે પરીક્ષા નિયામકને પૂછો. એમ કહીને તેમણે ફોન કાપી નાખ્યો હતો.યુનિવર્સિટીના કુલપતિ હિમાંશુ પંડ્યાએ પણ ફોન ઉપાડ્યો નહોતો.

આ ઉપરાંત ગુજરાત યુનિવર્સીટીના રજીસ્ટ્રારે ફોન પણ ઉપાડવાની તસ્દી નહોતી લીધી. આ સાથે પરીક્ષા વિભાગના કલ્પેન વોરાએ પણ ફોન કર્યા છતાં ઉપાડ્યો નહોતો.  આવામાં લાગી રહ્યું છે કે સત્તાધીશોને વિદ્યાર્થીઓના ભવિષ્યની કોઈ ચિંતા નથી અને તેઓ એકબીજાને જ ખો આપી રહ્યા છે. 

વિદ્યાર્થી સંગઠનોમાં પડઘા

બીજી તરફ વિદ્યાર્થી સંગઠનના NSUIના નારાયણ ભરવાડે કહ્યું હતું કે આ સમસ્યા 10માં સેમિસ્ટરમાં ભણી રહેલા LLBના વિદ્યાર્થીઓને થઇ હતી અને વિદ્યાર્થીઓએ પણ સત્તાધીશોને સંપર્ક કરવાની કોશિશ કરી હતી. વિદ્યાર્થીઓ અટવાઈ ગયા હતા અને તેમણે પારાવાર કોશિશ કરી હતી પરંતુ તેઓ કોઈની સંપર્ક કરી શક્યા નહોતા. એવામાં આગામી પરીક્ષાઓ માટે વિદ્યાર્થીઓમાં તણાવ વધ્યો છે. 

નારાયણનું કહેવું છે કે આ સર્વરનો કોન્ટ્રાક્ટ ભાજપના IT સેલના ઓળખીતાઓએ લીધો હોય એવું બની શકે. આ મદ્દે ABVPના પ્રતિક મિસ્ત્રી સાથે વાતચીત કરતા તેમણે કોઈ ટિપ્પણી આપવાનું ટાળ્યું હતું અને તેમણે કહ્યું હતું કે ABVP વિદ્યાર્થીઓનો આ મુદ્દો પરીક્ષા નિયામક અને સત્તાધીશો સુધી આવતી કાલે લઇ જશે.

ગુજરાત યુનિવર્સિટી દ્વારા 30 તારીખે ઓનલાઈન પરીક્ષાનું આયોજન કરવામાં આવ્યું છે. આ પરીક્ષા માટે પહેલા વિદ્યાર્થીઓએ પોતાના, નંબર, ઈમેલ વગેરે દ્વારા પાસવર્ડ જનરેટ કર્યો. યુનિવર્સિટી દ્વારા જાહેર કરવામાં આવેલ આદેશ અનુસાર જે પણ વિદ્યાર્થીએ ઓનલાઈન પરીક્ષા આપવી તેણે ત્રણ ડેમો અને બે મોક પરીક્ષા આપવાની રહેશે અને આટલું જ નહીં મોક ટેસ્ટ તો ફરજીયાત છે.

યુનિવર્સિટીના આદેશ અનુસાર મોક ટેસ્ટ આપેલ નહીં હોય તે વિદ્યાર્થીને ફાઈનલ એક્ઝામ આપવા દેવામાં આવશે નહીં. પરંતુ જ્યારે વિદ્યાર્થીઓ ફાઈનલ પરીક્ષા પહેલાની પરીક્ષા આપવા બેઠા તો યુનિવર્સિટીના સર્વર જ કામ નથી કરી રહ્યા. 

• સળગતા સવાલો : 
• યુનિવર્સિટીએ શા માટે આવા ટેસ્ટ પહેલા પોતાની સિસ્ટમ ટેસ્ટ નાં કરી ? 
• વિદ્યાર્થીઓની ફીસ લેવામાં રસ ધરાવતી યુનિવર્સિટીને પોતાની સિસ્ટમ ચકાસવાનો સમય નથી ? 
• હજારો વિદ્યાર્થીઓની એક્ઝામ લેવાની હોય અને પ્રાઈવેટ સર્વર પ્રોવાઈડરને કોન્ટ્રાક્ટ અપાયો હોટ ત્યારે પહેલા કેમ લોડ ટેસ્ટ ન કરાવ્યો ? 
• જો ફાઈનલ પરીક્ષામાં આવું થાય તો વિદ્યાર્થીઓના ભવિષ્યનું શું ? 
• જો આવા સર્વરના કારણે વિદ્યાર્થી પરીક્ષા ન આપી શકે તો તેના માટે જવાબદાર કોણ ? 

યુનિવર્સિટીના આ કામ કરતા બંધ થયેલા સર્વરના ઘણા બધા વિદ્યાર્થીઓને મુશ્કેલીનો સામનો કરવો પડી રહ્યો છે અને આ જોતા સવાલ છે થાય છે કે ડેમો ટેસ્ટ અને મોક ટેસ્ટમાં યુનિવર્સિટીના સર્વરના આ હાલ છે તો ફાઈનલ એક્ઝામમાં શું થશે ? શું આ રીતે વિદ્યાર્થીઓ પરીક્ષા આપશે ? શું આવું જ છે યુનિવર્સિટીનું પૂર્વઆયોજન?