રસી / કોવિશિલ્ડ બનાવનારી કંપનીએ સરકારને લખ્યો પત્ર, આ મુદ્દે તત્કાળ મદદની કરી માંગણી

• મોદી સરકારને સીરમ કંપની દ્વારા પત્ર લખાયો 
• અમેરિકાના નવા કાયદાને ધ્યાને લઈને પત્ર લખ્યો 
• કોવિશિલ્ડ રસી માટે અમુક કાચો માલ યુએસથી આવે છે

કોરોના રસી બનાવનારી ભારતની પ્રમુખ કંપની સીરમ ઇન્સ્ટિટ્યૂટ ઓફ ઇન્ડિયાને અમેરિકન સરકાર દ્વારા ડિફેન્સ પ્રોડક્શન એક્ટના અમલથી આ રસી બનાવવા માટેના મટિરિયલની ખરીદી કરવામાં મુશ્કેલી પડી રહી છે. સીરમ સંસ્થાએ કેન્દ્ર સરકારને આ મામલે દખલ કરવા વિનંતી કરી છે. SII ના સરકારી અને નિયમનકારી બાબતોના નિયામક પ્રકાશ કુમારસિંહે વાણિજ્ય સચિવ અનૂપ વધાવન અને વિદેશ સચિવ હર્ષવર્ધન શ્રિંગલાને પત્ર લખ્યો છે.

કોવિશિલ્ડ રસીનો ઉપયોગ વિશ્વભરમાં થઈ રહ્યો છે

તેમણે પત્રમાં કહ્યું કે SII દ્વારા ઉત્પાદિત કોવિશિલ્ડ રસી ભારત અને દુનિયાભરમાં વ્યાપકપણે ઉપયોગમાં લેવામાં આવી રહી છે અને લાખો લોકોને રસી આપવામાં આવી છે. સિંહે કહ્યું હતું કે સીરમ ઇન્સ્ટિટ્યૂટ નોવાવાક્સ (યુએસ), કોડેજેનિકસ (યુએસ), વગેરે જેવી વિવિધ સંસ્થાઓ સાથે તકનીકી સહયોગથી અન્ય વિવિધ કોરોના રસી પ્રોજેક્ટ્સ પર કામ કરી રહી છે, જેના માટે તેને રો મટિરિયલ તરીકે ઘણી જરૂરી વસ્તુઓ ખરીદવાની જરૂર છે. વિવિધ વિદેશી ઉત્પાદકો, ખાસ કરીને યુ.એસથી આ મામલે આયાત પર આધાર રાખવો પડી રહ્યો છે.

અમેરિકન સરકારનો નવો કાયદો 

તેમણે પત્રમાં કહ્યું, 'ડિફેન્સ પ્રોડક્શન એક્ટ દ્વારા યુએસ દ્વારા બે એડવાન્સ્ડ સિસ્ટમ, ડિફેન્સ પ્રાયોરિટીઝ અને એલોકેશન સિસ્ટમ પ્રોગ્રામ અને હેલ્થ રિસોર્સને પ્રાધાન્યતા અને ફાળવણી સિસ્ટમની સ્થાપના કરી છે. આ અગ્રિમ યુનિટ હેઠળ, રસીના ઉત્પાદન માટે જરૂરી ઔદ્યોગિક રિસોર્સના ઉત્પાદન અથવા વિતરણ માટેના અન્ય કરારો કરતા સરકારી અને ખાનગી કંપનીઓ વચ્ચે અથવા ખાનગી પક્ષો વચ્ચેના કેટલાક કરારને અગ્રતા આપવામાં આવશે. '

કાચા માલની ઉપલબ્ધતા ન હોવાને કારણે સમસ્યાઓ થઈ શકે છે

સિંહે કહ્યું કે આનો અર્થ એ છે કે જો અમેરિકન ઉત્પાદકોના ઓર્ડરને ઉપરોક્ત સિસ્ટમ હેઠળ અગ્રતા આપવામાં આવે છે, તો તેઓને અન્ય દેશોના ઉત્પાદકોના ઓર્ડર કરતાં પ્રાધાન્ય મળશે. જેનો મતલબ કે રોગચાળાને નાબૂદ કરવા માટે આખી દુનિયા માટે કોવિડ -19 રસીને જે મોટા પાયે બનાવવાની જરૂર છે. પરંતુ જો યુએસ તરફથી આ આવશ્યક ઉત્પાદનોનો સમયસર પુરવઠો નહીં મળે તો આ એક ગંભીર સ્થિતિ સર્જાઇ શકે છે, જેના પરિણામે રસીણન ઉત્પાદનને અસર થતાં તેની અછત પણ સર્જાઇ શકે છે.