કોરોના વાયરસ / વિશ્વભરના લોકોને અપાશે ભારતની આ કોરોના વેક્સીન, WHOએ ઇમરજન્સી ઉપયોગને આપી દીધી મંજૂરી

• વિશ્વભરમાં ભારતનો ડંકો
• વિશ્વભરમાં લાગશે સીરમની કોરોના વેક્સીન
• WHOએ આપી મંજૂરી
• સીરમ ઈન્સ્ટિટ્યૂટે બનાવી છે વેક્સીન

હાલમાં જ ભારતના સીરમ ઈન્સ્ટિટ્યૂટ ઓફ ઈન્ડિયાએ બનાવેલી ઓક્સફોર્ડ-એસ્ટ્રાજેનેકાની કોરોના વેક્સીનને WHOની મંજૂરી મળી છે. આ સાથે વિશ્વના ગરીબ દેશના લોકોને કોરોનાની આ વેક્સીન લગાવવામાં આવશે.  

WHOએ આપી મંજૂરી

WHOએ સોમવારે કોરોનાની 2 વેક્સીનને ઈમરજન્સી ઉપયોગ માટે મંજૂરી આપી છે. આ બંને વેક્સીન ઓક્સફર્ડ એસ્ટ્રાજેનેકાએ બનાવી છે. એક વેક્સીનને ભારતની સીરમ ઈન્સ્ટીટ્યૂટે બનાવી છે તો અન્ય વેક્સીન દક્ષિણ કોરિયાની એસકે બાયો નામની કંપનીએ બનાવી છે. 

WHOના પ્રમુખે કહી આ વાત

WHOના પ્રમુખ ટેડ્રોસ એડહાનૉમે કહ્યું કે આ ગ્રીન સિગ્નલની સાથે હવે કોવેક્સ પ્રોગ્રામના આધારે અનેક દેશોમાં આ વેક્સીન પહોંચવાનો રસ્તો ખૂલી ગયો છે. ઉલ્લેખનીય છે કે કોવેક્સ પ્રોગ્રામના આધારે દુનિયાના નિર્ઘન દેશને WHOની મદદથી કોરોનાની વેક્સીન પહોંચાડાશે. WHOએ આપેલી માહિતી અનુસાર દુનિયાના જે દેશોને અત્યાર સુધી વેક્સીન મળી નથી અને જ્યાંની આબાદી કોરોનાનો ખતરો સહન કરી રહી છે ત્યાં હવે કોરોના વેક્સીનેશન અભિયાન શરૂ કરાશે. 

ઉલ્લેખનીય છે કે WHO વેક્સીનના ઉપયોગની મંજૂરા આપતા પહેલા તેની સુરક્ષા, ગુણવત્તાનું અધ્યયન કરે છે. આ અપ્રૂવલ બાદ વેક્સીન મંગાવવામાં ખચકાતા દેશ પોતાના દેશમાં વેક્સીનેશન શરૂ કરી શકશે.