રશિયાના રાષ્ટ્રપતિ વ્લાદિમીર પુટીને આજે વિશ્વની સૌથી પહેલી કોરોના વાયરસની રસી શોધી લીધી હોવાનો દાવો ઠોકી દીધો છે. વાયરસનો પગપેસારો જેમ જેમ વધી રહ્યો છે તેમ વહેલામાં વહેલી તકે રસી શોધવા માટે દબાણ પણ વધી રહ્યું છે ત્યારે વિશ્વમાં સૌથી વધુ રસી બનાવતી ભારતીય કંપનીએ દાવો કર્યો છે કે આ વર્ષના અંત સુધી વાયરસની રસી આવી જશે.
ભારતમાં કોરોના વાયરસની રસી પર કામ કરી રહી છે સીરમ ઇન્સ્ટીટયુટ
ડિસેમ્બર સુધીમાં રસી આવી જવાનો દાવો
ઓક્સફર્ડ સાથે પણ આ કંપનીએ કર્યો છે કરાર
કોરોના વાયરસના કારણે વિશ્વભરમાં હાહાકાર છે અને ભારતમાં પણ સતત કેસમાં વધારો થઇ રહ્યો છે ત્યારે સીરમ ઇન્સ્ટીટયુટના CEO આદર પૂનાવાલાએ કહ્યું છે કે દેશને આ વર્ષના અંત સુધીમાં કોરોના વાયરસની રસી મળી જશે. સીરમ ઇન્સ્ટીટયુટ દુનિયા સૌથી મોટી વેક્સીન નિર્માતા કંપની છે. અને વર્તમાનમાં આ કંપનીએ ઓક્સફર્ડ યુનિવર્સિટી સાથે રસીનું ઉત્પાદન કરવા માટે કરાર કર્યો છે
CNBC-TV18ને આપેલ ઇન્ટરવ્યુમાં પૂનાવાલાએ કહ્યું કે તેમની કંપની ડિસેમ્બરની શરૂઆતમાં કોરોના વાયરસની રસી લોન્ચ કરી દેશે. પૂનાવાલાએ કહ્યું કે, અમે બે અઠવાડિયામાં જ વેક્સીનનું ટ્રાયલ કરવા જઈ રહ્યા છે. તે ટ્રાયલ ICMRની સાથે કરવામાં આવશે. અમે ઓગસ્ટના અંત સુધીમાં વેક્સીનનું કામ શરુ કરી દઈશું.
સાતમી ઓગસ્ટે આ કંપનીએ GAVIઅને બિલ એન્ડ મેલિંડા ગેટ્સ ફાઉન્ડેશન સાથે ભાગીદારી કરી હતી. GAVI કંપનીનો લક્ષ્ય 2021ના અંત સુધીમાં વેક્સીનની 200 કરોડ ડોઝ તૈયાર કરવાનો છે. જ્યારે બિલ એન્ડ મેલિંડા ગેટ્સ ફાઉન્ડેશન દ્વારા 11 અબજ રૂપિયાનું ફંડ આપવામાં આવ્યું છે.
નોંધનીય છે કે આ રસીની કિંમત શું હશે તે વિશે પૂનાવાલાએ કંઈ સ્પષ્ટતા ન કરી. તેમણે કહ્યું કે અમને ત્રણ ડોલર પર ફંડીંગ મળી છે જે ખાસ કિંમત છે. લાયસન્સ મળ્યા બાદ તે રસીની કિંમત થોડી વધારે હશે. ફાઈનલ કિંમતની જાહેરાત બે મહિનામાં કરવામાં આવશે.
નોંધનીય છે કે સીરમ ઇન્સ્ટીટયુટ વિશ્વની સૌથી મોટી રસી બનાવતી કંપની છે. દુનિયાની 60થી 70 ટકા રસી અહિયાંથી જ તૈયાર થાય છે. આ કંપનીને વિશ્વ સ્વાસ્થ્ય સંગઠન દ્વારા માન્યતા પ્રાપ્ત છે અને આશરે 170 દેશોમાં રસીકરણ કરવામાં આવે છે.