જમ્મૂ-કાશ્મીરમાં અલગાવવાદને પ્રોત્સાહન આપનાર મોટા નેતાઓમાંથી એક યાસીન મલિકની શુક્રવારે મોડી રાત્રે ધરપકડ કરવામાં આવી છે. યાસીન મલિક જમ્મૂ-કાશ્મીર લિબ્રેશન ફ્રંટના અધ્યક્ષ છે. એક મળતા અહેવાલ મુજબ ઘાટીમાં પોલીસ અને અર્ધ સૈનિક દળોને હાઇ અલર્ટ પર રાખવામાં આવ્યાં છે.
કેન્દ્રીય ગૃહમંત્રાલયે અર્ધ સૈનિક દળની 100 કંપનીઓને જમ્મૂ-કાશ્મીર મોકલી છે. જો કે હજુ સુધી બીજા કોઇ નેતાની ધરપકડ અથવા અટકાયત કરવામાં આવી હોય તેવા સમાચાર મળેલ નથી.
યાસીન મલિકની ધરપકડ એટલા માટે પણ મહત્વની છે કે બે દિવસ બાદ સોમવારે જમ્મૂ-કાશ્મીરને વિશેષ દરજ્જો આપનારા સંવિધાનની ધારા 35-A પર સુપ્રીમ કોર્ટમાં સુનાવણી હાથ ધરવામાં આવશે. યાસીન મલિકને શ્રીનગરના માઇસુમામાં આવેલા ઘરથી સુરક્ષાદળોએ ધરપકડ કરી છે.
ત્યાર બાદ તેની પુછપરછ માટે કોઠીબાગ પોલીસ સ્ટેશન લઇ જવામાં આવ્યાં. એવુ માનવામાં આવી રહ્યું છે કે સંવિધનની ધારા 35-A પર સુનાવણી પહેલા પ્રશાસન દ્વારા સુરક્ષાને લઇને આ પગલું ભરવામાં આવ્યું છે.
35-A ધારામાં જમ્મૂ-કાશ્મીરની બહારનો કોઇપણ વ્યક્તિ રાજ્યમાં સ્થાવર મિલ્કત ખરીદી શકતો નથી. બીજા રાજ્યનો કોઇપણ વ્યક્તિ અહીંનો નાગરિક બની શકતો નથી. રાજ્યની કોઇપણ છોકરી બહારના છોકરા સાથે લગ્ન કરે છે તો તેના બધા અધિકાર સમાપ્ત થઇ જાય છે.સંવિધાનની આ ધારાને સુપ્રિમ કોર્ટમાં પડકારવામાં આવી છે.