વિકેટકીપર-બેટ્સમેન ટિમ પેને ઓસ્ટ્રેલિયાની ટેસ્ટ ટીમના કેપ્ટનપદેથી રાજીનામું આપી દીધું છે.
ટીમ પેનને અશ્લીલ મેસેજ ભારે પડ્યો
ટીમની કેપ્ટનશિપ છોડી દેવી પડી
ટીમ પેને મેસેજ કર્યા હોવાની વાત સ્વિકારી
ટિમ પેને આજે સવારે હોબાર્ટમાં પ્રેસ કોન્ફરન્સ કરીને કેપ્ટનશિપ છોડવાનો નિર્ણય જાહેર કર્યો, જોકે તે એક ખેલાડી તરીકે ટીમ સાથે જોડાઈ રહેવા ઇચ્છે છે. જોકે હવે ટિમ પેનનું એશીઝમાં રમવું પણ શંકાસ્પદ લાગી રહ્યું છે.
2017માં તાસ્માનિયાની એક મહિલા કર્મચારીને કરેલા અશ્લીલ મેસેજ જાહેર થયા બાદ પેને કેપ્ટનશિપ છોડવાનો નિર્ણય કર્યો છે. પ્રેસ કોન્ફરન્સ દરમિયાન ભીની આંખે ટિમ પેને આ ઘટના અંગે પોતાના પરિવાર અને ઓસ્ટ્રેલિયન ક્રિકેટ ચાહકોની માફી માગી. આગામી મહિને ઈંગ્લેન્ડ સામે રમાનારી એશીઝ પહેલાં ઓસ્ટ્રેલિયાને બહુ મોટો ઝટકો લાગ્યો છે.
ઓસ્ટ્રેલિયન સમય અનુસાર બપોરે 2.30 વાગ્યે યોજાયેલી પ્રેસ કોન્ફરન્સમાં ટિમ પેને પત્રકારો સમક્ષ કહ્યું, ''આજે હું ઓસ્ટ્રેલિયાની પુરુષ ટીમના કેપ્ટનપદેથી હટી જવાની જાહેરાત કરું છું. આ અવિશ્વસનીયરૂપથી મુશ્કેલ નિર્ણય છે, પરંતુ મારા, મારા પરિવાર અને ક્રિકેટ માટે યોગ્ય છે. મારા નિર્ણયની પૃષ્ઠભૂમિના રૂપમાં લગભગ ચાર વર્ષ પહેલાનો એક મામલો છે. હું એક ભૂતપૂર્વ મહિલા સહકર્મી સાથે ટેક્સ્ટ એક્સચેન્જમાં સામેલ હતો. એ સમયે એક્સચેન્જ સંપૂર્ણપણે સીએ ઇન્ટિગ્રિટી યુનિટ તપાસનો વિષય હતો, જેમાં ભાગ લીધો. એ તપાસ અને ક્રિકેટ તાસ્માનિયા એચઆર તપાસમાં એક જ સમયે જાણવા મળ્યું હતું કે ક્રિકેટ ઓસ્ટ્રેલિયાની આચારસંહિતાનું કોઈ ઉલ્લંઘન થયું નહોતું. જોકે હું છૂટી ગયો હતો. મને એ ઘટના અંગે બહુ જ અફસોસ હતો અને આજે પણ છે જ. મેં એ સમયે મારી પત્ની અને પરિવાર સાથે વાત કરી હતી. હું તેમની માફી અને સમર્થન માટે ખૂબ જ આભારી છું. અમે વિચાર્યું હતું કે આ ઘટના હવે ભૂતકાળ બની ચૂકી છે અને હું સંપૂર્ણપણે ટીમ પર ધ્યાન કેન્દ્રીત કરી શકું છું.''
ટિમ પેને વધુમાં જણાવ્યું, ''જોકે મને તાજેતરમાં જ જાણવા મળ્યું કે આ પર્સનલ ટેક્સ્ટ એક્સચેન્જ જાહેર થવા જઈ રહી છે. મને મારી પત્ની, મારો પરિવાર અને અન્યોને પહોંચેલી ઠેસ અને દર્દ માટે ઊંડો ખેદ છે. હું ઓસ્ટ્રેલિયન ચાહકોની માફી માગું છું કે મારા વ્યવહારે એશીઝ પહેલાં આપણી રમતને પ્રભાવિત કરી છે. પ્રશંસકો અને ક્રિકેટ સમુદાયને થયેલી નિરાશા બાબતે પણ હું માફી માગું છું. મારો પરિવાર હંમેશાં મારી સાથે ઊભો રહ્યો છે.''
2018ના સેન્ડ પેપરકાંડ બાદ ઓસ્ટ્રેલિયાની ટેસ્ટ ટીમનું નેતૃત્વ સંભાળનારા ટિમ પેનના દ્વારા કરવામાં આવેલા કાંડની તપાસ ઓસ્ટ્રેલિયન ક્રિકેટ બોર્ડ કરશે. ટિમ પેન પરિણીત છે અને ત્રણ બાળકનો પિતા પણ છે.
ટિમ પેને મહિલા સહકર્મચારીને કેટલીક એવી તસવીરો મોકલી હતી, જે કોઈ પણ રીતે યોગ્ય ઠેરવી શકાય તેવી નહોતી. જણાવવામાં આવી રહ્યું છે કે ટિમ પેને પોતાની સાથે કામ કરતી એક મહિલાને પોતાના પ્રાઇવેટ પાર્ટની તસવીર મોકલી હતી. સાથે સાથે અશ્લીલ મેસેજ પણ મોકલ્યા હતા. એ જ કારણ છે કે ટિમ પેને તાત્કાલિક અસરથી ટેસ્ટ ટીમની કેપ્ટનશિપ છોડવી પડી છે. જોકે હજુ સુધી ક્રિકેટ ઓસ્ટ્રેલિયા તરફથી કોઈ સત્તાવાર નિવેદન આપવામાં આવ્યું નથી.
ટિમ પેનનાં રાજીનામા બાદ હવે પેટ કમિન્સ ઓસ્ટ્રેલિયાના 47મો કેપ્ટન બનવાની રેસમાં સૌથી આગળ છે. જો કમિન્સને કેપ્ટન બનાવાશે તો 65 વર્ષ પહેલી વાર એવું બનશે કે કોઈ ફાસ્ટ બોલર ઓસ્ટ્રેલિયન ટીમનો કેપ્ટન બનશે