અત્યારે જાહેરાતોનું પ્રમાણ એટલુ વધી ગયુ છે કે પ્રોડક્ટ તરફ આકર્ષવા જાહેરાત કરતી કંપનીઓ ગમે તે હદે જતા ખચકાતી નથી. પ્રોડક્ટનું વેચાણ વધે તે માટે જાહેરાતો પર લાખો રુપિયાનો ખર્ચો કરવામાં આવે છે. સમાચાર પ્રસાર માધ્યમોમાં અવારનવાર આવી જાહેરાતો બતાવીને ગ્રાહકોને આકર્ષવા માટે વિવિધ દાવાઓ કરવામાં આવે છે પરંતુ આવી જ એક જાહેરાત કે જે પોતાના દાવાઓ સાબિત કરવામાં નિષ્ફળ નીવડી છે.
સેન્સોડાઇનને ફટકાર્યો ર.10લાખનો દંડ
સવાર ઉઠતાની સાથે આપણે ચા પીધા પહેલા બ્રશ કરીએ. બ્રશ કરવામાં પણ પાછી ઘરમા જેટલા સભ્યો એટલી ટૂથપેસ્ટ. કારણ કે એટલી બધી ટૂથપેસ્ટમાં વેરાયટી જોવા મળે છે કે દરેક લોકો તેની તરફ આકર્ષાય. ત્યારે દાંતોમાં ઝણઝણાટી મહેસૂસ કરવા પર અત્યારે બધાના માઇન્ડમાં સેન્સોડાઇન ટૂથપેસ્ટનું નામ આવે. ક્યાં આપકે દાંતોમે ઠંડા યા ગરમ ખાને સે ઝણઝણાટી હોતી હૈ, આવી જાહેરાતો તો કરવામાં આવે છે પરંતુ આ જાહેરાતોના દાવા કેટલા સાચા ? કંપની પોતાના દાવાઓ સાબિત ન કરી શકતા સેન્ટ્રલ કન્ઝ્યુમર પ્રોટેક્શન ઓથોરિટીએ સેન્સોડાઇનને 10 લાખનો દંડ ફટકાર્યો છે.
સાત દિવસમાં જાહેરાત હટાવવા આદેશ
સેન્ટ્રલ કન્ઝ્યુમર પ્રોટેક્શન ઓથોરિટીએ સેન્સોડાઇન પર 10 લાખ રૂપિયાનો દંડ લાદ્યો છે, જે પોતાને "વિશ્વની ભલામણ કરેલ દંત ચિકિત્સા ટૂથપેસ્ટ અને વિશ્વની નંબર વન સંવેદનશીલતા ટૂથપેસ્ટ" તરીકે વર્ણવે છે. આવી ભ્રામક જાહેરાતો બતાવવાના કારણે આ કાર્યવાહી કરવામાં આવી છે. માહિતી જાહેર કરતી વખતે, CCPAએ કહ્યું છે કે કંપનીએ ટીવી, OTT, YouTube તેમજ અન્ય સોશિયલ મીડિયા પ્લેટફોર્મ પરથી 'વિશ્વના દંત ચિકિત્સકની ભલામણ કરેલ ટૂથપેસ્ટ અને વિશ્વની નંબર વન સેન્સિટિવિટી ટૂથપેસ્ટ' ધરાવતી આ જાહેરાતને 7 દિવસની અંદર દૂર કરવી જોઈએ.
સેન્સોડાઇનને કેમ ફટકાર્યો દંડ ?
આ સાથે એવું કહેવામાં આવ્યું છે કે સેન્સોડાઈન કંપનીએ ગ્રાહકોને ભ્રામક જાહેરાતો બતાવી છે. 9 ફેબ્રુઆરીના રોજ, સેન્સોડાઇને વિદેશી દંત ચિકિત્સકોના પ્રમોશન પર જાહેરાતો બતાવવા પર પ્રતિબંધ મૂકવામાં આવ્યો હતો. CCPAનું કહેવું છે કે સેન્સોડાઈન કંપની જાહેરાતમાં વિશ્વની નંબર વન ટૂથપેસ્ટ હોવાનો દાવો કરે છે તે દાવાને યોગ્ય ઠેરવવા માટે કંપની કોઈ ખાતરીપૂર્વકનો પુરાવો આપી શકી નથી. તેમની પાસે આ સંબંધમાં એવો કોઈ અભ્યાસ કે સામગ્રી નથી. જાહેરાતોમાં બ્રિટન સહિત અન્ય ઘણા દેશોના દંત ચિકિત્સકો સેન્સોડાઈન ફ્રેશ જેલ અને સેન્સોડાઈન રેપિડ રિલીફ અપનાવવાની સલાહ આપી રહ્યા છે.